ຄົນລາວຜູ້ທຳອິດທີ່ໄດ້ຮັບລາງວັນສິງຄຳ “ບຸກຄົນຕົ້ນແບບແຫ່ງປີ” ປະຈຳປີ 2016

     ທ້າວ ລັດຖະເທວາ ພຸດທະວົງ(Mr.Ratthatava Phouthavong)ຄົນລາວຜູ້ທຳອິດທີ່ໄດ້ຮັບລາງວັນເຫມຣາດ ຫລື ລາງວັນສິງຄຳ “ບຸກຄົນຕົ້ນແບບແຫ່ງປີ” ປະຈຳປີ 2016(ພ.ສ2559) ຈາກປະເທດໄທ ໂດຍໄດ້ຮັບໃນສາຂາຜູ້ນຳດ້ານວັດທະນະທຳຕົ້ນແບບ.


      ໃນວັນອາທິດ, ວັນທີ່ 25 ກັນຍາ 2016 ທີ່ຜ່ານມາຢູ່ທີ່ນະຄອນຫລວງບາງກອກ, ປະເທດໄທ, ໄດ້ມີພິທີປະທານລາງວັນເຫມຣາດ ຫລື ລາງວັນສິງຄຳ “ບຸກຄົນຕົ້ນແບບແຫ່ງປີ” ປະຈໍາປີ 2016(ພ.ສ2559)ຂຶ້ນເປັນປີທຳອິດທີ່ສູນປະຊຸມທຳມະສາດຣັງສິດ,  ລາງວັນດັ່ງກ່າວນີ້ແມ່ນຈັດຂຶ້ນໂດຍມູນນິທິດິນດີນໍ້າໃສແຫ່ງປະເທດໄທ ໂດຍໄດ້ຮັບກຽດເປັນປະທານມອບລາງວັນໃນພິທີອັນສະຫງ່າລາສີດັ່ງກ່າວໂດຍໝ່ອມເຈົ້າ ມົງຄົນສະເຫລີມ ຍຸຄົນ ເຊື້ອພະວົງແຫ່ງຣາດຊະອານາຈັກໄທ, ລາງວັນດັ່ງກ່າວເປັນການມອບໃຫ້ແກ່ບຸກຄົນ, ອົງກອນ ແລະ ໜ່ວຍງານຕົວຢ່າງທີ່ຊ່ວຍເຫລືອສັງຄົມ, ເປັນແບບຢ່າງທີ່ດີຂອງສັງຄົມໄທໃນດ້ານວັດທະນະທຳ, ຈາລິຍະທໍາ ແລະ ຫລັກສິນທຳອັນດີ, ໃຊ້ຫລັກທໍາໃນການບໍລິຫານອົງກອນ, ບໍລິຫານບຸກຄົນ ແລະ ສ້າງຄຸນປະໂຫຍດຕໍ່ພຣະພຸດທະສາສະໜາ, ສັງຄົມ, ຕະຫລອດເຖິງປະເທດຊາດເປັນສຳຄັນ, ໂດຍພິຈາລະນາມອບໃຫ້ແກ່ບຸກຄົນອົງກອນ ແລະ ໜ່ວຍງານຕາມຄຸນນະສົມບັດດັ່ງກ່າວທີ່ໄດ້ຜ່ານການຄັດເລືອກຜົນງານການເຄື່ອນໄຫວໃນທີ່ຜ່ານມາຈາກຄະນະກຳມະການຜູ້ຊົງຄຸນນະວຸດໂດຍໄດ້ຈຳແນກລາງວັນບຸກຄົນຕົ້ນແບບແຫ່ງປີອອກເປັນຈຳນວນ 5 ສາຂາດັ່ງນີ້ : 
1.    ສາຂາຜູ້ນຳສິນລະທຳຕົ້ນແບບ
2.    ສາຂາຜູ້ນຳດ້ານວັດທະນະທຳຕົ້ນແບບ
3.    ສາຂາຜູ້ນຳພັດທະນາອົງກອນ ແລະ ຜູ້ນຳທ້ອງຖິ່ນຕົ້ນແບບ
4.    ສາຂາຜູ້ນຳພິທັກປ່າຮັກສາສິ່ງແວດລ້ອມຕົ້ນແບບ
5.    ສາຂາຜູ້ນຳວິຊາການ ແລະ ການສຶກສາຕົ້ນແບບ
   ໂດຍອີງຕາມຜົນງານການເຄື່ອນໄຫວໃນທີ່ຜ່ານມາທີ່ໄດ້ສົ່ງໃຫ້ຄະນະກຳມະການພິຈາລະນາແລ້ວເຫັນວ່າຕະຫລອດໄລຍະເວລາທີ່ຜ່ານມາທ້າວ ລັດຖະເທວາ ພຸດທະວົງ ເປັນຄົນລາວຜູ້ໜຶ່ງໃນບັນດາຄົນລາວຫລາຍໆທ່ານໃນປະເທດລາວເຮົາທີ່ປະພຶດປະຕິບັດຕົວເປັນແບບຢ່າງທາງດ້ານການຮັກສາວັດທະນະທຳ, ຮີດຄອງປະເພນີອັນດີງາມໂດຍສະເພາະຮີດສິບສອງຄອງສິບສີ່ປະເພນີຂອງລາວເຮົາໄດ້ດີ ແລະ ໄດ້ປະກອບສ່ວນຢ່າງຕັ້ງໜ້າໃນການເຜີຍແຜ່ຂໍ້ມູນຂ່າວສານດ້ານວັດທະນະທຳລາວເຮົາໃຫ້ສາກົນໄດ້ຮັບຮູ້ໃນຫລາຍດ້ານໃນທີ່ຜ່ານມາ ແລະ ຜົນງານບາງສ່ວນແມ່ນຖືໄດ້ວ່າເປັນສະເໜ່ທີ່ສ້າງຄວາມປະທັບໃຈໃນວັດທະນະທຳລາວໃຫ້ກັບພີ່ນ້ອງຊາວໄທນຳດ້ວຍ, ດັ່ງນັ້ນເພື່ອເປັນການເສີມສ້າງສາຍພົວພັນມິດຕະພາບອັນດີງາມລະຫວ່າງພີ່ນ້ອງລາວ-ໄທໃຫ້ມີຄວາມໝັ້ນຍືນຍິ່ງໆຂຶ້ນໄປ ແລະ ເປັນການສ້າງກຳລັງໃຈໃຫ້ຮັກສາຄວາມດີງາມເຫລົ່ານີ້ຕໍ່ໄປ, ຄະນະກຳມະການຜູ້ຊົງຄຸນວຸດທິຈາກມູນນິທິດິນດີນໍ້າໃສແຫ່ງປະເທດໄທໄດ້ພິຈາລະນາເຫັນດີມອບລາງວັນເຫມຣາດ ຫລື ລາງວັນສິງຄຳ“ບຸກຄົນຕົ້ນແບບແຫ່ງປີ” ປະຈຳປີ 2016(ພ.ສ2559) ຈາກປະເທດໄທ ໃຫ້ແກ່ ທ້າວ ລັດຖະເທວາ ພຸດທະວົງ(Mr.Ratthatava Phouthavong) ຈາກປະເທດລາວ, ໂດຍໄດ້ບັນທຶກໃນປຶ້ມປະຫວັດສາດໄທສຳລັບເຫດການຄັ້ງນີ້ວ່າເປັນຄົນລາວຜູ້ທຳອິດທີ່ໄດ້ຮັບລາງວັນເຫມຣາດ ຫລື ລາງວັນສິງຄຳ “ບຸກຄົນຕົ້ນແບບແຫ່ງປີ” ປະຈຳປີ 2016(ພ.ສ2559) ຈາກປະເທດໄທ ໂດຍໄດ້ຮັບໃນສາຂາຜູ້ນຳດ້ານວັດທະນະທຳຕົ້ນແບບ ແລະ ຖືວ່າແມ່ນຄົນລາວພຽງຜູ້ດຽວໃນຄັ້ງນີ້ທີ່ມີຊື່ໄດ້ຮັບການຄັດເລືອກຜົນງານຈາກຄະນະກຳມະການຜູ້ຊົງຄຸນວຸດທິໃຫ້ເດີນທາງມາຮັບລາງວັນເຫມຣາດ ຫລື ລາງວັນສິງຄຳ“ບຸກຄົນຕົ້ນແບບແຫ່ງປີ” ປະຈຳປີ 2016(ພ.ສ2559) ຮ່ວມກັບຜູ້ເຂົ້າຮັບລາງວັນທີ່ເປັນຄົນໄທ ແລະ ຄົນຕ່າງປະເທດໃນຈຳນວນ 200 ຄົນດ້ວຍກັນທີ່ນະຄອນຫລວງບາງກອກປະເທດໄທ.

ຂ່າວໂດຍ: Ratthatava Phouthavong