ຄົນທີ່ຟອມດີສຸດໃນທີມເປັນຫຍັງຕ້ອງຂາດ້ຽງ!!!

ແມນເຊສເຕີ ຢູໄນເຕັດ ຕ້ອງພົບກັບຂ່າວຮ້າຍອີກແລ້ວ ເມື່ອ ອອງໂຕນີ ມາຊິຢານ ນັກເຕະດ້າວລຸ້ງທີ່ກຳລັງຟອມດີຂອງທີມບາດເຈັບບໍລິເວນຕີນຊ້າຍຈົນຕ້ອງຖືກປ່ຽນໂຕອອກຈາກເກມທີມຊາດນັດອຸ່ນເຄື່ອງທີ່ ຝຣັ່ງ ທີມຂອງເຂົາເສຍໃຫ້ກັບ ອັງກິດ 0-2 ທີ່ ເວມບລີ ສະເຕດ້ຽມ ເມື່ອວັນອັງຄານທີ 17 ທີ່ຜ່ານມາ ຈົນອາດຈະເຮັດໃຫ້ເຂົາອົດລົງຫຼິ້ນໃນເກມລີກອາທິດນີ້.

ຍັງບໍ່ມີການເປີດເຜີຍວ່າອາການຂອງນັກເຕະອາຍຸ 19 ປີຄົນນີ້ໄດ້ຮັບບາດເຈັບຫຼາຍໜ້ອຍປານໃດ ແຕ່ວ່າສາມາດຍ່າງອອກຈາກສະໜາມເອງໄດ້ ຕອນຖືກປ່ຽນໃຫ້ ອອງຕວນ ກຣິສມັນ ລົງຫຼິ້ນໃນນາທີ 66 ຂອງເກມລ່າສຸດ ໂດຍທີ່ ດິດີເຢ ເດສຊອງ ນາຍໃຫຍ່ຂອງທີມກ່າວວ່າ “ເຂົາມີອາການເຈັບຫຼາຍ ແຕ່ມັນເປັນພຽງອາການບໍລິເວນປາຍຕີນຂອງເຂົາຊື່ໆ”.

ມາຊິຢານ ຍິງໄປແລ້ວ 5 ປະຕູໃນການລົງສະໜາມໃຫ້ ຜີສາດແດງ 14 ນັດ ລວມທຸກລາຍການ ນັບແຕ່ຍ້າຍມາຈາກ ອາເອສ ໂມນາໂກ ຍັກໃຫຍ່ຈາກ ລີກແອັງ ດ້ວຍຄ່າໂຕ 36 ລ້ານປອນ ເມື່ອວັນທີ 1 ກັນຍາທີ່ຜ່ານມາ ສ່ວນວັນເສົານີ້ ຜີສາດແດງ ຕ້ອງລົງຫຼິ້ນໃນ ພຣີເມຍລີກ ໂດຍການບຸກໄປຢາມ ວັດຝອດ ທີ່ ວິຄາເຣດ ໂຣດ.

................................................................................................................................................