ຄູ່ຄວນ!! ມາເນໄດ້ລາງວັນນັກເຕະເທບຫົງແດງ

 

ຊາດິໂອ ມາເນ ປີກຊາວເຊເນເກົາຂອງ ລີເວີພູ ໄດ້ລາງວັນນັກເຕະດີເດັ່ນຂອງທີມປະຈຳຊີຊັນ 2016-2017 ຈາກການໂຫວດຂອງແຟນບານ ຫຼັງຈາກທີ່ເຂົາໂຊຟອມເທບສຸດໂດຍເຂົາຍັງໄດ້ລາງວັນນັກເຕະດີເດັ່ນຈາກການໂຫວດຂອງເພື່ອນຮ່ວມທີມດ້ວຍ.

 

ຊາດິໂອ ມາເນ ປີກຕົວເກັ່ງຂອງ ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ໄດ້ຮັບການໂຫວດຈາກແຟນບານໃຫ້ເປັນນັກເຕະດີເດັ່ນຂອງທີມປະຈຳລະດູການ 2016-2017 ຫຼັງຈາກທີ່ເຂົາເຮັດຜົນງານໄດ້ຢ່າງເທບ.

 

ເຖິງວ່າຈະຫາກໍຍ້າຍມາຈາກ ເຊົາແຮມຕັນ ເມື່ອຊ່ວງຊຳເມີທີ່ຜ່ານມາແຕ່ວ່າດາວເຕະເຊເນເກົາກໍຫຼິ້ນໄດ້ຢ່າງໂດດເດັ່ນຈົນເປັນໜຶ່ງໃນກຳລັງສຳຄັນທີ່ເຮັດໃຫ້ທີມເປັນອັນດັບ 3 ຂອງລີກຢູ່ໃນຕອນນີ້ ເຊິ່ງນັ້ນເຮັດໃຫ້ແຟນໆສ່ວນໃຫຍ່ໂຫວດໃຫ້ເຂົາເປັນເຈົ້າຂອງລາງວັນນີ້ ເອົາຊະນະຄູ່ແຂ່ງຄື ຟີລິບ ຄູຕິນໂຢ, ໂຣແບໂຕ ຟີມິໂນ ແລະ ອະດຳ ລາລັນນາ ໄປໄດ້.

 

ນອກຈາກນີ້ ມາເນ ຍັງໄດ້ລາງວັນນັກເຕະດີເດັ່ນຂອງທີມປະຈຳລະດູການນີ້ຈາກການໂຫວດຂອງບັນດານັກເຕະໃນທີມຊຸດໃຫຍ່ຂອງ “ຫົງແດງ” ອີກດ້ວຍ ຂະນະທີ່ລາງວັນດາວລຸ້ງຕົກເປັນຂອງ ເທຣນ ອະເລັກຊານເດີ-ອາໂນນ ແບັກຂວາເລືອດຜູ້ດີ.

 

ສຳລັບລາງວັນທີ່ໜ້າສົນໃຈໃນສາຂາອື່ນໆນັ້ນມີຢ່າງເຊັ່ນປະຕູດີເດັ່ນປະຈຳລະດູການອັນໄດ້ແກ່ລູກຍິງຂອງ ເອັມເຣ ຊານ ໃນເກມກັບ ວັດຝອດ, ເບັນ ວູດເບີນ ທີ່ໄດ້ລາງວັນນັກເຕະອະຄາເດມີ ແລະ ລູຄັສ ເລວາ ມິດຟິວນັກເຕະແຊມບາເຊິ່ງໄດ້ລາງວັນນັກເຕະຊົງຄຸນຄ່າຈາກການຮັບໃຊ້ທີມມາຄົບ 10 ປີເປັນຕົ້ນ.

 

ບົດຄວາມໃຫມ່ໆ