ຄູຕີ້ ແຄ່ງດີເດັ່ນຫົງເດືອນມີນາ

 

ແຟນບານ ລີເວີພູ ໂຫວດໃຫ້ ຟິລິບເປ ຄູຕິນໂຢ ກອງກາງຂອງທີມເປັນນັກເຕະດີເດັ່ນຂອງ “ຫົງແດງ” ປະຈໍາເດືອນມີນາທີ່ຜ່ານມາໂດຍເອົາຊະນະທັງ ເອັມເຣ ຊານ, ອະດໍາ ລາລານາ ແລະ ໂຣແບໂຕ ຟີມີໂນ ຂະນະທີ່ເຂົາຮັບສຸດດີໃຈ ແລະ ມີກຳລັງໃຈໃນການເຮັດວຽກໜັກຕໍ່ໄປ.

 

ຟິລິບເປ ຄູຕິນໂຢ ມິດຟິວເລືອດແຊມບາຂອງ ລີເວີພູ ຍັກໃຫຍ່ຈາກ ພຣີເມຍລີກ ອັງກິດ ໄດ້ຮັບເລືອກໃຫ້ເປັນນັກເຕະດີເດັ່ນຂອງສະໂມສອນປະຈຳມີນາທີ່ຜ່ານມາ ຈາກການປະກາດຜົນລົງຄະແນນຂອງແຟນບານ “ຫົງແດງ” ເມື່ອວັນພຸດນີ້.

“ຄູຕີ້” ຫຼິ້ນໄດ້ຢ່າງດີເດັ່ນເມື່ອເດືອນຜ່ານມາໂດຍລົງສະໜາມ 4 ນັດຍິງໄດ້ 2 ປະຕູ ສົ່ງຜົນໃຫ້ແຟນບານໂຫວດໃຫ້ເອົາຊະນະທັງ ເອັມເຣ ຊານ, ອະດຳ ລາລານາ ແລະ ໂຣແບໂຕ ຟີມີໂນ ເຊິ່ງເຂົ້າຮອບມາໃນ 4 ຄົນສຸດທ້າຍ.

 

ດາວເຕະແຊມບາເຜີຍຫຼັງໄດ້ຮັບລາງວັນວ່າ “ຂ້ອຍມີຄວາມສຸກຫຼາຍ ຄືທີ່ເຄີຍເວົ້າຕະຫຼອດເວລາທີ່ຂ້ອຍໄດ້ຮັບລາງວັນ ມັນເປັນຄືກັບລາງວັນຕອບແທນສຳລັບຂ້ອຍ ແລະ ຊ່ວຍໃຫ້ຂ້ອຍມີຄວາມໝັ້ນໃຈຫຼາຍຂຶ້ນໃນການເຮັດວຽກ ແລະ ບັນລຸເປົ້າໝາຍຕໍ່ໄປ”.