ຄືບໜ້າ!! ໂອຣິກີ ເຈັບຍາວຈົນໝົດລະດູການ

 

ສື່ດັງອັງກິດລະບຸ ດິວັອກ ໂອຣິກີ ຫົວຫອກຟອມຮ້ອນຕ້ອງນັ່ງຍາວໝົດລະດູການເປັນທີ່ຮຽບຮ້ອຍຫຼັງຂໍ່ຕີນຫົກມາຈາກເກມພົບກັບ ເອເວີຕັນ ແລະ ຍັງອົດລົງຊ່ວຍທີມຊາດແບນຊິກໃນລາຍການ ຢູໂຣ 2016 ອີກດ້ວຍ.

 

ດິວັອກ ໂອຣິກີ ກອງໜ້າໂຕເກັ່ງຂອງ ລີເວີພູ ສະໂມສອນດັງຈາກ ພຣີເມຍລີກ ໝົດສິດລົງສະໜາມຊ່ວຍທີມໃນເກມທີ່ເຫຼືອລະດູການນີ້ຮຽບຮ້ອຍ ເນື່ອງຈາກຈຳເປັນຕ້ອງພັກເປັນເວລາຍາວດົນເຖິງ 6 ອາທິດຫຼັງເຈັບຂໍ່ຕີນມາຈາກເກມລີກນັດເມີຊີໄຊດາບີແມັດທີ່ “ຫົງແດງ” ເປີດຮັງ ແອນຟິວ ອັດ ເອເວີຕັນ 4-0 ເມື່ອວັນພຸດທີ່ຜ່ານມາ ຈາກການລາຍງານຂອງ ເດິ ມິນເລີ ສື່ດັງຂອງເມືອງຜູ້ດີ.

ດາວເຕະອາຍຸ 21 ປີໄດ້ຮັບບາດເຈັບຮຸນແຮງບໍລິເວນຂໍ່ຕີນຈາກການຖືກ ຣາມິໂຣ ຟູເນດ ກອງຫຼັງຂອງ ເອເວີຕັນ ຢຽບເຂົ້າຢ່າງແຮງ ເຊິ່ງຫຼັງເກມ ເຈີເກັນ ຄັອບ ນາຍໃຫຍ່ ລີເວີພູ ລະບຸວ່າອາການບາດເຈັບຂອງນັກເຕະບໍ່ໄດ້ຮ້າຍແຮງເຖິງຂັ້ນກະດູກຫັກ.

 

ຢ່າງໃດກໍຕາມລ່າສຸດ ເດິ ມິນເລີ ລະບຸວ່າຜົນການສະແກນເມື່ອວັນພະຫັດຊີ້ແຈງວ່າເສັ້ນເອັນບາງສ່ວນບ່ອນຂໍ່ຕີນຂອງ ໂອຣິກີ ໄດ້ຮັບຄວາມເສຍຫາຍເຊິ່ງນັ້ນຈະເຮັດໃຫ້ເຂົາຕ້ອງພັກຍາວປະມານ 4-6 ອາທິດ ແລະ ຕ້ອງປິດສາກລະດູການນີ້ທັນທີ ນອກຈາກນັ້ນຍັງຕ້ອງລຸ້ນຢ່າງໜັກວ່າເຂົາຈະສົມບູນທັນເວລາລົງຊ່ວຍທີມຊາດໃນລາຍການ ຢູໂຣ 2016 ທີ່ປະເທດຝຣັ່ງຊ່ວງຊຳເມີນີ້ໄດ້ ຫຼື ບໍ່.