ຄຳໄພ ສົມຊະນະ ຈະທຸ້ມເງິນສ້າງ ເສັ້ນທາງໃໝ່ຈາກ ເມືອງສັງທອງເຊື່ອມຕໍ່ຫາເມືອງນາຍຊາຍທອງ.

ທ່ານ ຄຳໄພ ສົມຊະນະ ຈະໃຊ້ເງິນສ່ວນຕົວຫຼາຍຕື້ກີບຫຍໍ້ເສັ້ນທາງແຕ່ເມືອງສັງທອງຫາເມືອງນາຊາຍທອງນະຄອນຫຼວງວຽງຈັນທີ່ມີຄວາມຍາວ 45 ກິໂລແມັດ ໃນຄະນະນີ້,ໃຫ້ເຫຼືອພຽງແຕ່ 18 ກິໂລແມັດ ໂດຍການສ້າງເສັ້ນທາງໃໝ່ປູຢາງແຕ່ບ້ານສຳພັນນາຊາຍແດນເມືອງສັງທອງແລະເມືອງສີໂຄດຕະບອງຕັດພູພະນັງຜ່ານແຫຼ່ງທ່ອງທ່ຽວນ້ຳຕົກຕາດຊອນແດນຫົງພູສູງສວນອຸທິຍານພຶກສາຊາດຊຸມຊົນສະມາຄົມອາຊຽນເຊື່ອມຕໍ່ເສັ້ນທາງຫາເມືອງນາຊາຍທອງເພື່ອເປັນຂອງຂວັນໃຫ້ຊາວນະຄອນຫຼວງວຽງຈັນ.

ທ່ານ ຄໍາໄພ ສົມຊະນະ ປະທານບໍລິສັດ ກຸ່ມຄໍາໄພສົມຊະນະແຈ້ງໃຫ້ສື່ມວນຊົນວ່າ: ປະຈຸບັນໂຄງການສ້າງເສັ້ນທາງດັ່ງກ່າວກຳລັງຢູ່ໃນຂັ້ນຕອນການສຳຫຼວດ ຄາດຄະເນວ່າຈະໄດ້ລົງມືກໍ່ສ້າງໄວໆນີ້ ຖ້າຫາກສຳເລັດກໍ່ຈະສ້າງຄວາມສະດວກສະບາຍໃຫ້ແກ່ປະຊາຊົນ , ຂົນສົ່ງສິນຄ້າ ພ້ອມທັງສ້າງເງື່ອນໄຂອໍານວຍຄວາມສະດວກໃນການສ້າງແຫຼ່ງທ່ອງທ່ຽວອີກ ຊື່ງມູນຄ່າແລະຄວາມກວ້າງຂອງເສັ້ນທາງຍັງບໍ່ສາມາດເປີດເຜີຍໄດ້ເພາະຍັງລໍຖ້າວິຊາການຄິດໄລ່ແລະອອກແບບເສັ້ນທາງຢູ່, ເຖິງຢ່າງໃດກໍ່ຕາມໂຄງການນີ້ຈະເກີດແນ່ນອນ.

ໂດຍຄຽງຄູ່ກັບການສ້າງເສັ້ນທາງບໍລິສັດກໍ່ພັດທະນາສອງຟາກທາງໃຫ້ກາຍເປັນສະຖານທີ່ທ່ອງທ່ຽວແບບອະນຸລັກທຳມະຊາດພູພະນັງແບບຍືນຍົງປະຈຸບັນລັດກໍ່ໄດ້ເພີ່ມເນື້ອທີ່ດິນໃຫ້ແກ່ບໍລິສັດຕື່ມອີກ 7 ພັນເຮັກຕາ ເພື່ອເປັນຈຸດທ່ອງທ່ຽວແລະພັກຜ່ອນໃຫ້ແກ່ຄົນລາວແລະຕ່າງປະເທດ ປະຈຸບັນ ບໍລິສັດໄດ້ພັດທະນາແລ້ວເກືອບຮ້ອຍຕື້ກີບ ໂດຍການສ້າງພື້ນຖານໂຄງລ່າງອອ້ມສະຖານທີ່ທ່ອງທ່ຽວ, ສ້າງຕາຂ່າຍໄຟຟ້າ,ຫໍປະຊຸມແລະຕູບພັກຜ່ອນຮ້ອຍກວ່າຕູບ ແລະປັບປຸງບໍລິເວນອ່າງເກັບນ້ຳຫ້ວຍຊອນຫ້ວຍຊົ້ວ ເພື່ອດຶງດູດນັກທ່ອງທ່ຽວແລະຈະສ້າງນ້ຳຕົກສູງ 60 ແມັດ ໂດຍເອົາພູສອງໜ່ວຍເປັນຂອບອ່າງເກັບນ້ຳ ຊຶ່ງຈະໃຊ້ທືນຫຼາຍຕື້ກີບທັງນີ້ກໍ່ເພື່ອຄຳນັບຮັບຕ້ອນສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 40 ປີ.