ຄັອບກຽມຊັອບ!!!ຫົງທຸ່ມງົບ 100 ລ້ານປອນດຶງນັກເຕະ

 

ຫົງແດງ ລີເວີພູ ພ້ອມທຸ່ມເມັດເງິນມະຫາສານ 100 ລ້ານປອນໃຫ້ ເຈິເກັນ ຄັອບ ນາຍໃຫຍ່ຂອງທີມເພື່ອເສີມທັບຊຳເມີນີ້ໂດຍມີ ເຟີຈິວ ຟານ ໄດ໊ ກອງຫຼັງຂອງ ເຊົາແຮມຕັນ ກັບ ໂມຮາເໝັດ ຊາລ້າ ປີກຂອງ ໂຣມ້າ ເປັນເປົ້າໝາຍຫຼັກ.

 

ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ກຽມທຸ່ມເງິນ 100 ລ້ານປອນເພື່ອດຶງ ເຟີຈິວ ຟານ ໄດ໊ ກອງຫຼັງ ເຊົາແຮມຕັນ ກັບ ໂມຮາເໝັດ ຊາລ້າ ປີກຈອມເວດມົນຂອງ ອາແອສ ໂຣມ້າ ມາເສີມທັບຊ່ວງຊຳເມີນີ້ ຈາກການລາຍງານຂອງ ເດິ ເທເລກຣາຟ ສື່ດັງຂອງເມືອງຜູ້ດີເມື່ອວັນພຸດທີ່ຜ່ານມາ.

 

ເຟນເວ ສະປອດ ກຣຸບ ກຸ່ມເຈົ້າທຶນຂອງ “ຫົງແດງ” ກຽມທຸ່ມເງິນກ້ອນດັ່ງກ່າວໃຫ້ ເຈິເກັນ ຄັອບ ຜູ້ຈັດການທີມໃຊ້ຊື້ນັກເຕະທີ່ຕ້ອງການ ຫຼັງຈາກທີ່ສາມາດຄວ້າໂຄຕ້າໄປລຸຍ ຢູຟາ ແຊມປຽນ ລີກ ລະດູການໜ້າໄດ້ຕາມເປົ້າ ໂດຍນາຍໃຫຍ່ເລືອດເບຍໝາຍຕາເຊັນເຕີແບັກທີມຊາດໂຮນລັງເຊິ່ງຖືກ “ນັກບຸນ” ຕັ້ງຄ່າຫົວໄວ້ສູງເຖິງ 50 ລ້ານປອນ ເຊັ່ນດຽວກັບປີກທີມຊາດອີຢິບທີ່ຢູ່ໃນລິສນັກເຕະທີ່ຢາກໄດ້.

 

ນອກຈາກ 2 ຄົນດັ່ງກ່າວແລ້ວ ອະເລັກ ອັອກເຫຼດ-ຊຳເບີເລນ ປີກຂອງ ອາເຊນອນ, ນາບິວ ເກອິຕ້າ ກອງກາງຂອງ ແອເບ ໄລຊິກ ແລະ ຄຣິສຕຽນ ພູລິຊິດ ມິດຟິວຂອງ ໂບຣຸສເຊຍ ດອດມູນ ກໍຢູ່ໃນຂ່າຍທີ່ ຄັອບ ໝາຍຫົວໄວ້ເຊັ່ນກັນ.