ຄອສຕ້າຢັນບໍ່ກັບເຊວຊີ-ຂໍໄປຫຼິ້ນໃຫ້ໝີ

 

ປະກາດຊັດເຈນ!!! ດີເອໂກ້ ຄອສຕ້າ ກອງໜ້າທີມຊາດສະເປນ ຢັນຂໍກັບໄປຫຼິ້ນໃຫ້ ແອັດ ມາດຣິດ ທີມດຽວເທົ່ານັ້ນ ບໍ່ຂໍຢູ່ກັບ ເຊວຊີ ຫຼື ສະໂມສອນໃດໆເຖິງວ່າ “ກາໝີ” ບໍ່ສາມາດລົງທະບຽນນັກເຕະໃໝ່ໄດ້ຈົນຈະຮອດເດືອນມັງກອນກໍຕາມ.

ດີເອໂກ້ ຄອສຕ້າ ກອງໜ້າ ເຊວຊີ ປະກາດຢືນຢັນວ່າ ຈະບໍ່ກັບໄປຫຼິ້ນໃຫ້ ເຊວຊີ ອີກແລ້ວ ແລະ ຮຽກຮ້ອງໃຫ້ທີມດັງແຫ່ງກຸງລອນດອນຍອມປ່ອຍຕົວອອກເພື່ອທີ່ຈະໄດ້ກັບໄປຫຼິ້ນໃຫ້ ແອັດເລຕິໂກ້ ມາດຣິດ ອີກເທື່ອໜຶ່ງ.

ໃນເວລານີ້ ດາວຍິງທີມຊາດສະເປນອາຍຸ 28 ປີ ກຳລັງຢູ່ທີ່ປະເທດເບຣຊິນບ້ານເກີດ ຫຼັງບໍ່ຢູ່ໃນແຜນການເຮັດທີມຂອງ ອັນໂຕນີໂອ ຄອນເຕ້ ນາຍໃຫຍ່ ເຊວຊີ ທີ່ພ້ອມທີ່ຈະຂາຍຖິ້ມໃຫ້ທີມອື່ນໃນຊຳເມີນີ້ ແຕ່ວ່າ ຄອສຕ້າ ຢືນຢັນວ່າຕ້ອງການໄປຫຼິ້ນໃຫ້ “ກາໝີ” ທີມດຽວເທົ່ານັ້ນ.

“ອະນາຄົດຂອງຂ້ອຍຊັດເຈນແລ້ວ ຂ້ອຍຕ້ອງການກັບໄປຫຼິ້ນໃຫ້ ແອັດເລຕິໂກ້ ມາດຣິດ ໃນລະດູການໜ້າ ແຕ່ບັນຫາແມ່ນ ເຊວຊີ ບໍ່ຕ້ອງການປ່ອຍຂ້ອຍອອກຈາກທີມແບບຟຣີໆ ຢ່າງໃດກໍຕາມຂອ້ຍຄິດວ່າ ສະຖານະການຈະໄດ້ທາງອອກໃນໄວໆນີ້ ຂ້ອຍຈະກັບໄປຫຼິ້ນໃນສະເປນ” ຄອສຕ້າ ເຜີຍ.

ທັງນີ້ “ກາໝີ” ຍັງບໍ່ສາມາດລົງທະບຽນນັກເຕະໃໝ່ຈົນກວ່າຈະຮອດເດືອນມັງກອນປີໜ້າ ເນື່ອງຈາກວ່າຖືກສະຫະພັນບານເຕະນາໆຊາດ (ຟີຟາ) ລົງໂທດແບນຫ້າມຊື້ນັກເຕະຈາກກໍລະນີເຊັນສັນຍານັກເຕະອາຍຸຕ່ຳກວ່າ 18 ປີແບບຜິດກົດ.