ຄອນເຕໝາຍຫົວປາສຕໍເຣເສີມທັບແດນກາງ

 

ສື່ເຜີຍຂ່າວ ອັນໂຕນິໂອ ຄອນເຕ ນາຍໃຫຍ່ຂອງ ເຊວຊີ ພ້ອມທີ່ຈະດຶງໂຕ ຮາເວຍ ປາສຕໍເຣ ເພເມກເກີຂອງ ປາຣີ ແຊັງ-ແຊັກແມັງ ມາເສີມທັບເດືອນມັງກອນນີ້ ຫຼັງສໍ່ແວວວ່າຈະເລ ເຊສ ຟາເບຣກັສ ມິດຟິວຂອງທີມ ແບບຢືມໂຕພ້ອມຍັງເລັງ ມາເຊໂລ ໂບຣໂຊວິດ ກອງກາງຂອງ ອິນເຕີ ມິລານ ອີກຄົນໜຶ່ງພ້ອມ.

 

ອັນໂຕນິໂອ ຄອນເຕ ຜູ້ຈັດການທີມ ເຊວຊີ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າວາງແຜນທີ່ຈະດຶງໂຕ ຮາເວຍ ປາສຕໍເຣ ມິດຟິວຕົວບຸກຂອງ ປາຣີ ແຊັງ-ແຊັກແມັງ ທີມມະຫາເສດຖີຂອງ ລີກແອັງ ມາເສີມທັບໃນຊ່ວງເປີດຕະຫຼາດຊື້ຂາຍນັກເຕະຮອບສອງເດືອນມັງກອນນີ້ ຈາກການລາຍງານເມື່ອວັນຈັນທີ່ຜ່ານມາ.

 

ນາຍໃຫຍ່ຄົນອີຕາລີຕ້ອງການປັບປຸງແຜງກອງກາງຂອງທີມ ເຊວຊີ ຫຼັງຈາກທີ່ ເຊສ ຟາເບຣກັສ ມີຄວາມເປັນໄປໄດ້ວ່າອາດຈະຖືກຕົ້ນສັງກັດປ່ອຍອອກຈາກທີມໃນຮູບແບບການຢືມໂຕ ເນື່ອງຈາກວ່ານັກເຕະກາຍເປັນຕົວສຳຮອງຢ່າງເຕັມຕົວໃນລະດູການນີ້ຈົນເກືອບຈະບໍ່ໄດ້ຮັບໂອກາດລົງສະໜາມເລີຍ.

 

ເຖິງວ່າມິດຟິວທີມຊາດສະເປນໄດ້ອອກມາປິດຂ່າວລືເລື່ອງການຍ້າຍທີມໂດຍການປະກາດວ່າຕ້ອງການຢູ່ສູ້ຕໍ່ໄປໃນຖິ່ນ ສະແຕມຝອດ ບຣິດ ແຕ່ວ່າ ຄອນເຕ ກໍຍັງຄົງສະແດງຄວາມສົນໃຈ ປາສຕໍເຣ ແລະ ມາເຊໂລ ໂບຣໂຊວິດ ມິດຟິວ ອິນເຕີ ມິລານ ທີມດັງຂອງອີຕາລີໃນຖານະເປົ້າໝາຍການເສີມທັບຊ່ວງເດືອນມັງກອນນີ້.