ຂ້າເຈົ້າ-ເຜົາຕົນ ຜົນຈາກການດື່ມສຸລາ-ເສບຢາເສບຕິດ

ຂຶ້ນຊື່ວ່າສິ່ງເສບຕິດ ແລະຂອງມຶນເມົາ ຖ້າຫາກໃຜໄປມົ້ວສຸມເສບສົມກັບມັນແລ້ວລ້ວນແຕ່ເປັນຫົນທາງນຳໄປສູ່ຄວາມຫາຍະນະຕໍ່ຕົນເອງ, ຄອບຄົວ ແລະສັງຄົມ. ດັ່ງທີ່ພວກເຮົາໄດ້ເຫັນຂ່າວຄາວເຫດການທີ່ເກີດຂຶ້ນໃນສັງຄົມເປັນປະຈຳ ບໍ່ວ່າຈະເປັນ ເມົາເຫຼົ້າ-ເມົາຢາເສບຕິດແລ້ວອາລະວາດຜິດຖຽງກັນກັບໝູ່ເພື່ອນ, ລູກເມຍ ບາງຄັ້ງກໍຕົບຕີກັນ ຮຸນແຮງໄປຈົນຮອດເຂັນຂ້າເອົາຊີວິດ ບໍ່ເວັ້ນແມ້ແຕ່ພໍ່ແມ່ຜູ້ໃຫ້ກຳເນີດພຽງເພາະອາລົມຊົ່ວວູບຍ້ອນຄວາມມຶນເມົາ, ບາງຄົນເກີດອຸບັດເເຫດຕາມທ້ອງຖະໜົນ, ບາງກໍລະນີປ່ວງບ້າກະທຳຊຳເລົາຜູ້ຍິງ ແລະເດັກ, ຂົ່ມຂືນແລ້ວຂ້າ ແລະອື່ນໆ. ກໍລະນີຫຼ້າສຸດທີ່ຖືກນຳເອົາມາເຜີຍແຜ່ກັນຕາມໂລກໂຊຊຽວກໍແມ່ນເຫດການທີ່ເກີດຂຶ້ນກັບຄອບຄົວໜຶ່ງເມື່ອຜູ້ເປັນນ້ອງຊາຍອາລະວາດປ່ວງບ້າຍ້ອນດື່ມເຫຼົ້າ ແລະເສບຢາເສບຕິດ (ຜົນການກວດເລືອດຂອງແພດພົບສານເສບຕິດໃນຮ່າງກາຍ) ບວກກັບໂທສະເລີຍເອົາໄຟເຜົາເຮືອນ ຈົນລາມໄໝ້ໃສ່ຕົວເອງ ແລະອ້າຍເຂີຍ ກາຍເປັນເລື່ອງເປັນລາວອັນນຳຄວາມເດືອດຮ້ອນມາສູ່ຄອບຄົວ ແລະຄວາມເຈັບປວດຢ່າງແສນທໍລະມານມາສູ້ຜູ້ກໍ່ເຫດ ແລະຜູ້ເຄາະຮ້າຍທີ່ບໍ່ຮູ້ຫຍັງເລີຍ. ສະນັ້ນ, ຈິ່ງຢາກຝາກໃຫ້ເປັນອຸທາຫອນສອນໃຈແກ່ສັງຄົມວ່າ ການໃຊ້ຊີວິດທຸກຄັ້ງຕ້ອງດຳລົງຢູ່ໃນສະຕິ, ບໍ່ເອົາຕົນເອງໄປເກືອກກົ້ວກັບອະບາຍະມຸກ ແລະສິ່ງມຶນເມົາສິ່ງເສບຕິດທັງຫຼາຍທັງປວງ ຄວນຕັ້ງໜ້າທຳມາຫາກິນ ແລະສ້າງຄອບຄົວໃຫ້ມີຄວາມອົບອຸ່ນ-ເຂົ້າອົກເຂົ້າໃຈເຊິ່ງກັນ ແລະກັນ. ສຳລັບຜູ້ໃດຫາກທຳຜິດພາດໄປແລ້ວ ກໍບໍ່ໄດ້ຫຍຽບຫຍາມຊໍ້າຕື່ມແຕ່ປະການໃດ ສັງຄົມພ້ອມທີ່ຈະໃຫ້ໂອກາດໃນການແກ້ໄຂ ແລະປັບປຸງຕົນເອງໃຫ້ເປັນຄົນຮູ້ຜູ້ດີໃນພາຍພາກໜ້າ ເພາະສັງຄົມລາວເປັນສັງຄົມທີ່ໃຫ້ໂອກາດສະເໝີ.