ຂ້າກັນທາງອ້ອມ ຖ້າບໍ່ຍອມປ່ຽນແປງພຶດຕິກຳ

ຂະແໜງອາຫານ ແລະ ຢາ ພະແນກສາທາລະນະສຸກແຂວງຈຳປາສັກເປີດເຜີຍວ່າ:​ໃນປັດຈຸບັນອາຫານທະເລເຊັ່ນ: ປາ​ເມິກໜວດໃຫຍ່, ປາທູ ​ແລະ ລວມທັງ ເຫັດຫອມ ທີ່ປົນສານກັນບູດ. ຍັງມີພໍ່ຄ້າແມ່ຄ້າຈໍານວນໜຶ່ງຝ່າຝືນນໍາມາວາງຈໍາໜ່າຍຢູ່ຕະຫຼາດໃໝ່ປາກເຊ. ນອກນັ້ນຍັງປະກົດມີສິນຄ້າທີ່ໝົດອາຍຸ ເຊິ່ງສ່ວນໃຫຍ່ຈະເປັນປະເພດເຂົ້າໜົມ ແລະ ເຄື່ອງສຳອາງຕ້ອງຫ້າມຈຳນວນໜຶ່ງ ສິນຄ້າທັງໝົດນັ້ນມັນຈະສົ່ງຜົນຮ້າຍຕໍ່ຜູ້ບໍລິໂພກໂດຍກົງ.

ຕໍ່ກັບບັນຫາດັ່ງກ່າວທາງພາກລັດພວກເຮົາກໍໄດ້ກັກຍຶດສິນຄ້າດັ່ງກ່າວລວມມູນຄ່າ 2 ລ້ານກວ່າກີບ ໄປທຳລາຍຖິ້ມ ພ້ອມທັງເຮັດບົດບັນທຶກ ແລະ ສຶກສາອົບຮົມໃຫ້ແກ່ຜູ້ປະກອບການໃຫ້ເຂົ້າໃຈເຖິງຜົນຮ້າຍ ແລະ ຄວາມເປັນອັນຕະລາຍຂອງອາຫານທີ່ໝົດອາຍຸ ແລະ ອາຫານສົດທີ່ມີການປົນເປື້ອນສານກັນບູດ ໂດຍໄດ້ແນະນຳໃຫ້ຜູ້ຂາຍຕ້ອງໝັ່ນກວດກາເບິ່ງອາຍຸການຂອງສິນຄ້າ ແລະ ກວດເບິ່ງຄຸນນະພາບຂອງສິນຄ້າ ລວມທັງເຄື່ອງສຳອາງຕ່າງໆທີ່ນຳມາວາງຈຳໜ່າຍ ແລະ ຮູ້ວ່າສິ່ງໃດ ທີ່ທາງການອະນຸຍາດໃຫ້ຈຳໜ່າຍຊື້-ຂາຍໄດ້ ເພື່ອຮັບປະກັນບໍ່ໃຫ້ມີຜົນກະທົບຕໍ່ຜູ້ບໍລິໂພກ.

ຂ່າວ-ພາບ: ຄຳຫຼ້າ

ທີ່ມາ: ໜັງສືພິມຈໍາປາໃໝ່ ​ແລະ ໂຕະນໍ້າຊາ