ຂ່າວອຸບັດຕິເຫດຮອບປີ 2015 ພົບວ່າມີຜູ້ເສຍຊິວິດ 101 ຄົນບັນຫາຫລັກຍ້ອນດື່ມສິ່ງມືນເມົາ ແລະ ຂັບຂີ່ລະເມີດກົດ

ປີ 2015 ອຸບັດເຫດເກີດຂຶ້ນຢູ່ແຂວງຈຳປາສັກຫຼຸດລົງກວ່າປີຜ່ານມາ ແຕ່ຄວາມເສຍຫາຍພັດສູງກວ່າ. ສຳລັບສາເຫດສ່ວນໃຫຍ່ແມ່ນຍ້ອນການດື່ມສິ່ງມຶນເມົາ, ໃຊ້ຄວາມໄວເກີນກຳນົດ, ປ່ຽນທິດທາງ, ແຊງບໍ່ຮັບປະກັນ ແລະ ອື່ນໆ ທ່ີເກີດຈາກສະຕິການຂັບຂີ່ຍັງຕ່ຳ.
ທ່ານ ເພັດສາຄອນ ແກ້ວວົງເພັດ ຮອງຫົວໜ້າພະແນກຈະລາຈອນແຂວງ ໃຫ້ສຳພາດວ່າ: ໃນ 1 ປີ ຜ່ານມາມີອຸບັດເຫດເກີດຂຶ້ນທັງໝົດ 525 ລາຍທຽບໃສ່ປີຜ່ານມາຫຼຸດລົງ 6 ລາຍ ມີຜູ້ໄດ້ຮັບບາດເຈັບ 944 ລາຍ ທຽບໃສ່ປີຜ່ານມາ ເພີ່ມຂຶ້ນ 71 ຄົນ, ມີຜູ້ເສຍຊີວິດ 101 ຄົນ ຍິງ 11 ຄົນ, ທຽບໃສ່ປີຜ່ານມາຫຼຸດລົງ 13 ຄົນ. ພາຫະນະເປ່ເພ 943 ຄັນ ທຽບໃສ່ປີຜ່ານມາຫຼຸດລົງ 16 ຄັນ, ໃນນັ້ນເປ່ເພເລັກນ້ອຍ 396 ຄັນ, ເພສົມຄວນ 523 ຄັນ, ໃຊ້ການບໍ່ໄດ້ 24 ຄັນ, ຄະດີທີ່ຍັງດຳເນີນມີ 118 ລາຍ, ຄະດີຕົກລົງກັນແລ້ວມີ 307 ລາຍ,ຄະດີສົ່ງໄອຍະການ 100ລາຍ. ເຊິ່ງສົ່ງຜົນເສຍຫາຍເປັນມູນຄ່າທັງໝົດ 8.268 ລ້ານກ່ວາກີບ ທຽບໃສ່ປີຜ່ານມາ ເພີ່ມຂຶ້ນ 446 ລ້ານກວ່າກີບ. ສາເຫດທີ່ພາໃຫ້ເກີດອຸບັດເຫດ ສ່ວນໃຫຍ່ແມ່ນຍ້ອນການດື່ມສິ່ງມຶນເມົາ, ໃຊ້ຄວາມໄວເກີນກຳນົດ, ປຽ່ນທິດທາງ, ແຊງບໍ່ຮັບປະກັນ, ບໍ່ປ່ອຍສິດ, ແລ່ນຜິດທາງ, ເຕັກນິກບໍ່ຮັບປະກັນ, ລ່ວງປ້າຍຫ້າມ ແລະ ອື່ນໆ. 
ສຳລັບວຽກງານທີ່ພົ້ນເດັ່ນໃນ 1 ປີຜ່ານມາ ແມ່ນສາມາດກັກຢຶດຢາໄອໄດ້ 13 ກິໂລ ກັບ 4 ຖົງ,ປະເພດຢາບ້າໄດ້ 78.703ເມັດ. ເຊິ່ງໃນ 1 ປີຕໍ່ໜ້າທາງພະແນກຈະລາຈອນຈະເອົາໃຈໃສ່ສຶກສຶກສາອົບຮົມດ້ານການເມືອງແນວຄິດໃຫ້ແກ່ກຳລັງຕຳຫຼວດຈະລາຈອນໃຫ້ມີຄຸນທາດການເມືອງໜັກແໜ້ນມີຫຼັກໝັ້ນສິນທຳປະຕິວັດ, ເອົາໃຈໃສ່ແກ້ໄຂໃຫ້ປາກົດການຫຍໍ້ທໍ້ຕ່າງໆ ທີ່ເກີດຂຶ້ນຢູ່ໃນກຳລັງ ແລະ ຕີຖອຍບັນດາຫາງ ສຽງວິພາກວິຈານຈາກສັງຄົມໃຫ້ໄດ້. ຈັດຕັ້ງກຳລັງ, ກະກຽມບັນດາເອກະສານ, ວັດຖຸອຸປະກອນຕ່າງໆ ກ່ຽວ ກັບກົດລະບຽບຈະລາຈອນລົງເຜີຍແຜ່ໂຄສະນາປູກຈິດສຳນຶກໃຫ້ບັນດານັກຂັບຂີ່ທັງໃນສະຖານທ່ີຕ່າງໆ ແລະ ຕາມເສັ້ນທາງ, ເອົາໃຈໃສ່ເພີ່ມທະວີການເຮັດວຽກງານຈັດສັນຄວາມເປັນລະບຽບຮຽບຮ້ອຍຕາມເສັ້ນ ທາງໂດຍເນັ້ນໜັກໃສ່ເຂດຊຸມຊົນ,ສາມແຍກ-ສີ່ແຍກ,ຕະຫຼາດແຕ່ລະແຫ່ງ ແລະ ຄິວລົດສາຍເໜືອ-ສາຍໃຕ້. ເອົາໃຈໃສ່ກວດກາພາຫະນະພາກສ່ວນທີ່ລະເມີດກົດລະບຽບການສັນຈອນໂດຍສະເພະແມ່ນຜູ້ທີ່ບໍ່ໃສ່ໝວກກັນກະທົບ, ດັດແປງສະພາບເຕັກນິກ, ບໍ່ຕິດປ້າຍ ຫຼື ຕິດປ້າຍບໍ່ຖືກຕ້ອງ ແລະ ອື່ນໆ. 
ຈາກນັ້ນທ່ານຍັງຮຽກຮ້ອງມາຍັງຜູ້ໃຊ້ລົດໃຊ້ຖະໜົນໃຫ້ເອົາໃຈໃສ່ເປັນເຈົ້າການນຳກັນໃນການປະຕິ ບັດກົດລະບຽບຈະລາຈອນ, ແລະ ໃຫ້ກຽດເຊິ່ງກັນ ແລະ ກັນໃນການຂັບຂີ່ລົດ ເພື່ອຫຼຸດຜ່ອນການເກີດອຸບັດ ເຫດ ໂດຍສະເພາະໃນປີໃໝ່ສາກົນທ່ີຈະມາເຖິງນີ້. ຂ່າວ-ພາບ: ທ້ອງຖິ່ນ
 

Pathedlao Lao

ບົດຄວາມໃຫມ່ໆ