ຂ່າວລື..ສື່ຜູ້ດີເຜີຍເປເອັດເລັງເບັນເຊມາເສີມຄົມ

 

ເດິ ຊັນ ສື່ກິລາຂອງຜູ້ດີຕີຂ່າວ ປາຣີ ແຊັງ-ແຊັກແມັງ ຄິດທີ່ຈະຊື້ ຄາຣິມ ເບັນເຊມາ ຫົວຫອກຂອງ ເຣອັນ ມາດຣິດ ມາຮ່ວມທີມກ່ອນຕະຫຼາດປິດໂດຍຈະໃຫ້ຄ່າໂຕສູງເຖິງ 50 ລ້ານປອນ.

 

ປາຣີ ແຊັງ-ແຊັກແມັງ ສະໂມສອນມະຫາເສດຖີຂອງ ລີກແອັງ ຝຣັ່ງກຳລັງພິຈາລະນາທີ່ຈະເດີນໜ້າເລື່ອງການດຶງໂຕ ຄາຣິມ ເບັນເຊມາ ກອງໜ້າຂອງ ເຣອັນ ມາດຣິດ ມາຮ່ວມທີມໃນມື້ສຸດທ້າຍຂອງຕະຫຼາດຊື້ຂາຍນັກເຕະ ຕາມການລາຍງານຂອງ ເດິ ຊັນ ສື່ຊື່ດັງຂອງປະເທດອັງກິດ.

 

ປັດຈຸບັນ ເອົາບາໂຣ ໂມຣາຕາ ເປັນຫົວຫອກໂຕເປົ້າຕົວເລືອກທຳອິດຂອງ ເຣອັນ ມາດຣິດ ໂດຍທີ່ ເບັນເຊມາ ເຮັດໄດ້ພຽງນັ່ງຢູ່ຂ້າງສະໜາມເພາະມີບັນຫາອາການບາດເຈັບບໍລິເວນຫຼັງ ແລະ ເຂົາກໍສ່ຽງທີ່ຈະເສຍຕຳແໜ່ງຕົວຈິງໃນທີມແບບຖາວອນແລ້ວ.

 

ທັງນີ້ ເດິ ຊັນ ຍັງລະບຸອີກວ່າ ເປເອັດເຊ ກຳລັງຄິດທີ່ຈະປ່ອຍ ເອດິສັນ ກາວານີ ດາວຍິງຂອງທີມໄປໃຫ້ກັບ ນາໂປລີ ຈົນຕ້ອງເບິ່ງຫາກອງໜ້າຄົນໃໝ່ ແລະ ເບັນເຊມາ ແມ່ນຄົນທີ່ເໝາະສົມໂດຍທີ່ທີມຈະທຸ່ມເງິນໃຫ້ສູງເຖິງ 50 ລ້ານປອນເພື່ອເປັນຄ່າຫົວຂອງນັກເຕະ.