ຂົວນ້ຳຂອງ ເມືອງເງິນ ແຂວງໄຊຍະບູລີ ເມືອງປາກແບງ ແຂວງອຸດົມໄຊ ໃກ້ສຳເລັດແລ້ວ

 ຂົວຂ້າມນໍ້າຂອງຈາກປາກແບງ-ເມືອງເງິນຈະເປີດໃຊ້ບໍລິການທ້າຍເດືອນພະຈິກນີ້.ໂຄງການກໍ່ສ້າງຂົວຂ້າມນ້ຳຂອງປາກແບງ-ເມືອງເງິນພາຍຫຼັງທີ່ໄດ້ເລີ່ມລົງມືກໍ່ສ້າງແຕ່ທ້າຍປີ 2012 ຈົນມາເຖິງປະຈຸບັນໜ້າວຽກໂດຍລວມແມ່ນໃກ້ສຳເລັດແລ້ວເຫຼືອ ພຽງແຕ່ 7% ທີ່ກຳລັງສືບຕໍ່ໃນຂະນະນີ້ ສ່ວນຜູ້ຮັບຜິດຊອບໂຄງການໄດ້ເຜີຍໃຫ້ຮູ້ວ່າ ໃນທ້າຍເດືອນພະຈິກນີ້ຈະເປີດໃຫ້ໃຊ້ ຢ່າງເປັນທາງການ .
   ອີງຕາມການລາຍງານຂອງທ່ານ ລີຢີ້ງ ໄຊເຍ່ຍຊ່າງ ຮອງຫົວໜ້າໂຄງການໃຫ້ສຳພາດກັບທີມຂ່າວເສດຖະກິດ-ສັງຄົມວ່າ : ໂຄງການກໍ່ສ້າງຂົວຂ້າມນ້ຳຂອງປາກແບງ-ເມືອງເງິນໄດ້ເລີ່ມລົງມືກໍ່ສ້າງຕັ້ງແຕ່ທ້າຍເດືອນທັນວາ 2012 ຕົກມາຮອດ ເດືອນສິງຫາຂອງປີນີ້ ໜ້າວຽກໂດຍລວມຂອງໂຄງການສຳເລັດສະເລ່ຍໄດ້ 92,37% ໃນນີ້ວຽກການກໍ່ສ້າງຂ້າງຂົວພາກ ສ່ວນເທິງໄດ້ 92,71% ແລະ ຄາດວ່າໝົດເດືອນນີ້ໃຫ້ສຳເລັດ.
   ສຳລັບແຜນການໃນທ້າຍເດືອນໜ້າທາງໂຄງການໄດ້ຕັ້ງເປົ້າໝາຍໄວ້ວ່າທຸກໜ້າວຽກຂອງໂຄງສ້າງແມ່ນຈະໃຫ້ສຳເລັດ 100% ສ່ວນວຽກເກັບລາຍລະອຽດແມ່ນຈະໄດ້ຍົກໄປສືບຕໍ່ປະຕິບັດໃນຕົ້ນເດືອນພະຈິກ ແລະ ໃນຕອນທ້າຍເດືອນດຽວກັນ ກໍຈະໄດ້ມີພິທີເປີດນຳໃຊ້ຂົວຢ່າງເປັນທາງການ.
    ໂຄງການກໍ່ສ້າງຂົວຂ້າມນ້ຳຂອງລະຫວ່າງເມືອງປາກແບງ ແຂວງອຸດົມໄຊ ຫາ ເມືອງເງີນ ແຂວງໄຊຍະບູລີເປັນໂຄງການ ໜື່ງທີ່ເຊື່ອມຕໍ່ເສັ້ນທາງຊຶ່ງຈະຊ່ວຍອຳນວຍຄວາມສະດວກໃນການຄົມມະນາຄົມຂອງເຂດແຂວງພາກເໜືອ ແລະ ທັງເປັນ ເສັ້ນທາງເຊື່ອມຕໍ່ກັບບັນດາປະເທດທີ່ມີຊາຍແດນຕິດຈອດເຊັ່ນ: ປະເທດໄທ,ຫວຽດນາມ,ແລະປະເທດຈີນ ໃນການກໍ່ສ້າງ ແມ່ນໃຊ້ງົບທັງໝົດ 30,89 ລ້ານໂດລາ ຫຼື ເທົ່າກັບ 200 ກວ່າຕື້ກີບ. ໂດຍບໍລິສັດກໍ່ສ້າງຂົວທາງຈາກ ສປ ຈີນ ເປັນຜູ້ຮັບ ເໝົາກໍ່ສ້າງ.