ຂຶ້ນຊື່ວ່າ ໂຈນ ຈະເກັ່ງມາແຕ່ໃສກໍໜີເຈົ້າໜ້າທີ່ບໍ່ພົ້ນ

     ດັ່ງຄະດີທີ່ເກີດຂຶ້ນຢູ່ເມືອງວຽງຄຳ ແຂວງວຽງຈັນ ພາຍຫຼັງເຈົ້າໜ້າທີ່ໜ່ວຍ ງານສະກັດກັ້ນ ແລະຕ້ານຢາເສບຕິດ ປກສ ເມືອງວຽງຄຳ ໄດ້ຮັບຂໍ້ມູນຂ່າວ ຈາກພົນລະເມືອງດີວ່າ: ຢູ່ຂອບເຂດຖິ່ນ ຍຸງມີຄົນບໍ່ດີເຄື່ອນໄຫວລັກລອບຄ້າ-ຂາຍຢາເສບຕິດປະເພດຢາບ້າ ຈາກນັ້ນ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງວຽງຄຳ ໄດ້ສົມທົບກັບເຈົ້າໜ້າທີ່ພະແນກສະກັດ ກັ້ນ ແລະຕ້ານຢາເສບຕິດ ປກສ ແຂວງ ວຽງຈັນຂຶ້ນບັນຊີເປົ້າໝາຍ, ຕິດຕາມ ເປົ້າໝາຍທີ່ມີການເຄື່ອນໄຫວຄ້າ-ຂາຍ ຢາເສບຕິດປະເພດຢາບ້າຢູ່ຂອບເຂດ ເມືອງວຽງຄຳ ໃນທີ່ສຸດກໍ່ສາມາດຈັບຕົວ ເປົ້າໝາຍໄດ້ 1 ຄົນຊຶ່ ທ້າວ ແຫຼວຄຳ ອາຍຸ 44 ປີ ວ່າງງານ ຢູ່ບ້ານຖິ່ນຍຸງ ເມືອງ ວຽງຄຳ ແຂວງວຽງຈັນ, ໃນຄັ້ງວັນທີ 5 ຕຸລາ 2016 ເວລາປະມານ 10:00 ໂມງ ພ້ອມຂອງກາງຢາບ້າ 156 ເມັດ ທີ່ຊຸກເຊື່ອງໄວ້ລີ້ນຊັກໂຕະແຕ່ງໜ້າ ແລະມີ ສາຍຄໍຄ້າຍຄືຄຳ 1 ເສັ້ນໜັກ 5 ບາດ, ໂທ ລະສັບ 3 ໜ່ວຍ, ເງິນກີບ 2 ລ້ານ ກວ່າກີບ ມາທຳການສືບສວນ-ສອບ ສວນ.

     ຜ່ານການສືບສວນ-ສອບສວນຂອງ ເຈົ້າໜ້າທີ່ໃນເບື້ອງຕົ້ນ ທ້າວ ແຫຼວຄຳ ໄດ້ຮັບສາລະພາບວ່າ: ຢາບ້າຈຳນວນ 156 ເມັດ ທີ່ເຈົ້າໜ້າທີ່ກວດພົບເຫັນໃນ ຄັ້ງນີ້ ແມ່ນເປັນຂອງຕົນເອງແທ້ ຊຶ່ງຢາ ບ້າຈຳນວນດັ່ງກ່າວໄດ້ໄປຊີ້ນຳຊາຍຄົນໜຶ່ງບໍ່ຊາບຊື່ ຢູ່ບ້ານຫຼັກ 52 ເມືອງ ໂພນໂຮງ ແຂວງວຽງຈັນ ໃນຄັ້ງວັນທີ 4 ຕຸລາ 2016 ຈຳນວນ 159 ເມັດ ໃນລາຄາ 1,6 ລ້ານກີບ ເມື່ອຊື້ຢາບ້າມາ ແລ້ວ ທ້າວ ແຫຼວຄຳ ໄດ້ຊຸກເຊື່ອງໄວ້ ເຊົ້າມື້ຕໍ່ມາເວລາ 7:00 ໂມງ ໄດ້ມີຊາວ ໜຸ່ມໄວໜຸ່ມຢູ່ບ້ານດຽວກັນມາຊື້ຢາບ້າ 3 ເມັດ ໃນລາຄາ 50.000 ກີບ ພໍມາ ຮອດເວລາ 10 ໂມງ ຂອງວັນທີ 5 ຕຸລາ 2016 ເຈົ້າໜ້າທີ່ຈິ່ງເຂົ້າຈັບຕົວ ພ້ອມ ທັງກວດພົບເຫັນຢາບ້າຈຳນວນ 156 ເມັດ ທີ່ຊຸກເຊື່ອງຢູ່ໃນລິ້ນຊັກໂຕະຂອງ ຜູ້ກ່ຽວ ແລະຜູ້ກ່ຽວໃຫ້ຮູ້ຕື່ມອີກວ່າ: ໄດ້ ເລີ່ມຄ້າ-ຂາຍຢາບ້າມາແຕ່ເດືອນສິງຫາ 2016 ຜ່ານມາ ແລະໄດ້ໄປຊື້ຢາບ້ານຳ ຊາຍບໍ່ຊາບຊື່ ອາຍຸປະມານ 30 ປີຢູ່ບ້ານ ຫຼັກ 52 ຫຼາຍຄັ້ງ ຊື້ຄັ້ງລະ 50 ເມັດ ແລ້ວເອົາມາຂາຍໃຫ້ຊາວໜຸ່ມຢູ່ພາຍໃນ ບ້ານດຽວກັນ ຂາຍໃນລາຄາ 1 ເມັດຕໍ່ 15.000-20.000 ກີບ ເມື່ອຂາຍໝົດ ແລ້ວກໍ່ເອົາໄປໃຊ້ຈ່າຍຫຼີ້ນກິນຟຸມເຟືອຍ ເງິນອີກສ່ວນໜຶ່ງແມ່ນເອົາໄປຊື້ຢາບ້າ ມາຂາຍອີກ ແລະຄຳ 5 ບາດ ພ້ອມໂທ ລະສັບ 3 ໜ່ວຍ ແມ່ນຕົນເອງໄດ້ເອົາເງິນ ອຸດໜູນບຳເນັດຂອງພໍ່ໄປຊື້.

     ເຈົ້າໜ້າທີ່ໃຫ້ຮູ້ຕື່ມອີກວ່າ: ໄລຍະ ຜ່ານມາຜູ້ກ່ຽວເຄີຍຖືກໂທດມາແລ້ວ 1 ຄັ້ງ ຈຳຄຸກ 5 ປີ 6 ເດືອນ ໃນຂໍ້ຫາຄ້າ-ຂາຍຢາເສບຕິດປະເພດຢາບ້າ ເມື່ອພົ້ນໂທດອອກມາແລ້ວຜູ້ກ່ຽວກໍໄດ້ສືບຕໍ່ຄ້າ-ຂາຍຢາເສບຕິດອີກ ໃນທີ່ສຸດກໍ່ໄປບໍ່ ລອດຖືກເຈົ້າໜ້າທີ່ຈັບຕົວໄດ້ກ່ອນ ປະຈຸບັນເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງວຽງຄຳ ກຳລັງເລັ່ງສືບສວນ-ສອບສວນ ເພື່ອຂະຫຍາຍຜົນຊອກຫາກຸ່ມແກ້ງ, ຜູ້ຮ່ວມຂະບວນການມາລົງໂທດຕາມລະບຽບກົດໝາຍໃນຂັ້ນຕໍ່ໄປ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.