ຂັ້ນໄດຂັ້ນທຳອິດຂອງເສດຖີ


    ເສດຖີທຸກຄົນກໍບໍ່ໄດ້ລວຍຍ້ອນພໍ່ທັງໝົດ ຍັງມີອີກຫຼວງຫຼາຍທີ່ສູ້ຢັນດ້ວຍສີຝາມືເປົ່າຈົນໄດ້ດິບໄດ້ດີ ພວກເຂົາລ້ວນແຕ່ມີຈຸດເລີ່ມຕົ້ນທາງຄວາມຄິດຄືການວາງແຜນ ແລະມີເປົ້າໝາຍຊັດເຈນໃນຊີວິດ ສ່ວນຈຸດເລີ່ມຕົ້ນທາງການກະທຳຄືການປະຫຍັດນັ້ນເອງ.
    ການປະຫຍັດຂອງແຕ່ລະຄົນແຕກຕ່າງກັນ ຂຶ້ນກັບແນວທາງການບໍລິຫານເງິນ ແລະປັດໄຈອື່ນໆອີກຫຼາຍປະການ. ບາງຄົນຄິດວ່າຕົນເອງປະຫຍັດແຕ່ຍັງບໍ່ແມ່ນການປະຫຍັດທີ່ແທ້ຈິງ ເພາະອາດຈະມີວິທີທີ່ຈະປະຫຍັດໄດ້ຫຼາຍກວ່າທີ່ທ່ານຄິດ ລອງມາເບິ່ງຕົວຢ່າງນຳກັນ.
-    ທ້າວ ກ ເອົາເງິນຕິດກະເປົ໋າໄປການພຽງ 30.000ກີບຕໍ່ມື້ ແລະໃຊ້ຈ່າຍບໍ່ໃຫ້ເກີນນີ້.
-    ທ້າວ ຂ ເລືອກທີ່ຈະກິນເຂົ້າຄາບດຽວຕໍ່ມື້ ແຕ່ຕ້ອງກິນໃຫ້ອີ່ມ ຄາບລະ 15.000ກີບ ຖ້າຫິວກໍຈະຊື້ນົມກໍຈະຊື້ນົມມາກິນກ່ອງລະ 5000ກີບ ໂດຍລວມໃຊ້ເງິນມື້ລະ 20.000ກີບ.
ທ່ານອາດຄິດວ່າ ສອງຄົນນີ້ປະຫຍັດແລ້ວ ແຕ່ຄວາມຈິງມີວິທີທີ່ປະຫຍັດກວ່ານີ້ອີກຄື: ທ້າວ ຄ ເລືອກຊື້ໄຂ່ 30ໜ່ວຍມາຕົ້ມ ແລະຫຸງເຂົ້າເຕັມໝໍ້ໃສ່ຕູ້ເຢັນແລ້ວແບ່ງກິນໃນແຕ່ລະມື້ ຈະເປັນທາງເລືອກທີ່ປະຫຍັດກວ່າການໄປກິນເຂົ້າຕາມຮ້ານອາຫານທຸກໆຄາບ ເຊິ່ງວິທີນີ້ເປັນການປະຫຍັດທີ່ດີໃນຊ່ວງວິກິດການເງິນໃນກະເປົ໋າເຫຼືອບໍ່ພໍເທົ່າໃດພັນ.
ແຕ່ກໍບໍ່ໄດ້ໝາຍຄວາມວ່າທ່ານຈະຕ້ອງກິນເຂົ້າກັບໄຂ່ຕົ້ມໄປຕະຫຼອດຊີວິດເພື່ອປະຫຍັດ ແຕ່ມັນຄືການປຽບທຽບໃຫ້ໄດ້ຮູ້ວ່າທາງເລືອກຂອງການປະຫຍັດມີຢ່າງຫຼວງຫຼາຍ. ບາງຄົນຄັດຄ້ານວ່າປະຫຍັດເກີນໄປກໍບໍ່ດີ ເພາະຈະກາຍເປັນຄົນຂີ້ໜຽວ ແຕ່ຄວາມຈິງການປະຫຍັດກັບການຂີ້ຖີ່ຂີ້ໜຽວມີເສັ້ນບາງໆຂວາງກັ້ນຢູ່ຄື: 
-    ການປະຫຍັດຄືຊື້ແຕ່ສິ່ງທີ່ຈຳເປັນ ແລະມີປະໂຫຍດ ເຖິງວ່າສິ່ງນັ້ນຈະແພງກໍຈະຊື້ຖ້າຫາກຄຸ້ມຄ່າ.
-    ຄວາມຂີ້ຖີ່ຂີ້ໜຽວຄືບໍ່ຍອມໃຫ້ເງິນອອກຈາກກະເປົ໋າ, ເລືອກສິ່ງທີ່ລາຄາຖືກ ແລະໃຫ້ໄດ້ຈ່າຍເງິນໜ້ອຍທີ່ສຸດ.
ສະໄໝນີ້ເປັນຍຸກແຫ່ງຄວາມທັນສະໄໝຂອງວັດຖຸບໍ່ວ່າຈະເປັນອຸປະກອນເທັກໂນໂລຢີສຸດໄຮເທັກ, ລົດຍົນຫຼູຫຼາ, ເຄື່ອງສຳອາງຄໍເລັກຊັ້ນໃໝ່ຈາກຢີ່ຫໍ້ນຳເຂົ້າຈາກຕ່າງປະເທດ,....ຍິ່ງການໂຄສະນາຜ່ານສື່ຕ່າງໆນັບມື້ມີຄວາມວ່ອງໄວ ເຈາະກຸ່ມເປົ້າໝາຍໄດ້ຢ່າງທົ່ວເຖິງ ຈຶ່ງກາຍເປັນໂຕກະຕຸ້ນກິເລດຄວາມຢາກໄດ້ຢາກມີມາແກ່ຄົນໃນສັງຄົມໄດ້ຢ່າງງ່າຍດາຍ ກົງກັນຂ້າມກັບລາຍໄດ້ຂອງຄົນສ່ວນໃຫຍ່ທີ່ຍັງເທົ່າເກົ່າ(ແຕ່ຄ່າຄອງຊີບແພງຂຶ້ນກວ່າເກົ່າ) ຖ້າບໍ່ມີສະຕິໃນການໃຊ້ຈ່າຍອາດຈະພົບກັບບັນຫາການເງິນຝືດເຄືອງກໍເປັນໄດ້. ເທັກນິກການປະຫຍັດທ່ານສາມາດເຮັດໄດ້ງ່າຍໆຄື: 
-    ກ່ອນຈະຊື້ສິນຄ້າຊະນິດໃດກໍຕາມພິຈາລະນາໃຫ້ດີວ່າຕ້ອງຊື້ເພາະຈຳເປັນ ຫຼືຊື້ເພາະຢາາກໄດ້. ຖ້າແມ່ນເຫດຜົນທີສອງໃຫ້ລອງກັບເຮືອນເມືອຕັດສິນໃຈໃໝ່ ບາງທີມື້ໜ້າທ່ານອາດຈະເຊົາຢາກໄດ້ກໍເປັນໄດ້.
-    ຢ່າເລາະຫ້າງສັບພະສິນຄ້າ, ຕິດຕາມຮ້ານຂາຍເຄື່ອງອອນລາຍ, ກິນເຂົ້າຮ້ານອາຫານຫຼູຫຼາ, ຮ້ານເສີມສວຍລາຄາແພງ ເລື້ອຍໆເພາະມັນຈະເຮັດໃຫ້ທ່ານຈິດໃຈຄອນແຄນຈົນຕ້ອງຄວັກກະເປົ໋າເພີ່ມຂຶ້ນກວ່າປົກກະຕິ.
-    ກ່ອນຊື້ສິນຄ້າຄວນກວດສອບລາຄາຈາກຫຼາຍບ່ອນໆເພື່ອຊອກຫາບ່ອນທີ່ຖືກກວ່າ ຕົວຢ່າງສິນຄ້າປະເພດທີ່ຕ້ອງໃຊ້ໃນຊີວິດປະຈຳວັນເຊັ່ນ: ສະບູ, ຢາສີຟັນ, ຢາສະຜົມ...ຖ້າຫາກຢູ່ບ່ອນໃດຖືກທີ່ສຸດກໍໃຫ້ຊື້ໄວ້ເປັນແພັກເປັນໂຫຼຈະເປັນການປະຫຍັດກວ່າຊື້ຍ່ອຍໆ. ແຕ່ລະວັງຢ່າມົວແຕ່ຊື້ເພາະວ່າເປັນສິນຄ້າລາຄາຖືກຈົນລືມພິຈາລະນາຄຸນະພາບ ແລະຄວາມຈຳເປັນໃນການຊົມໃຊ້.
-    ຫຼຸດຜ່ອນການອອກນອກເຮືອນໃນວັນພັກຜ່ອນ, ກິດຈະກຳສັງສັນບ່ອນທີ່ມີເຫຼົ້າຢາປາແປ້ງ ຍິ່ງການພພະນັນຍິ່ງບໍ່ຕ້ອງເວົ້າເຖິງ.
ຫວັງວ່າບົດຄວາມນີ້ຈະເປັນແນວທາງໃຫ້ກັບທ່ານຜູ້ອ່ານທີ່ມີແນວຄິດຢາກຈະປະຫຍັດ ເພື່ອບິແບ່ງເງິຮຄຳໄວ້ເກັບທ້ອນ ເປັນການສ້າງຄງາມໝັ້ນຄົງໃຫ້ກັບຊີວິດ. ອ່ານຈົບແລ້ວ ເລີ່ມປະຕິບັດເລີຍເດີ!