ຂັນໂມງໃຫຍ່ໃຈກາງເມືອງປາກເຊ ສ້າງສໍາເລັດແລ້ວ!!

      ພິທີມອບ-ຮັບຂັນໂມງໃຫຍ່ດັ່ງກ່າວ ໄດ້ມີຂຶ້ນໃນວັນທີ 17 ກັນຍາ 2016 ຜ່ານມາ, ທີ່ບໍລິເວນຂັນໂມງໃຫຍ່ຕໍ່ໜ້າ ສະໜາມບີນເມືອງປາກເຊ, ໂດຍການໃຫ້ ກຽດເຂົ້າຮ່ວມຂອງທ່ານ ນິພອນ ວຽງປະເສີດ ຫົວໜ້າຈັດຕັ້ງ ແຂວງຈໍາປາ ສັກ, ມີທ່ານ ເລວັນແຢ່ງ ຄະນະປະຈໍາ ພັກແຂວງດົງນາຍ ສສ ຫວຽດນາມ, ທ່ານ ສຸລິວັນ ສະຫວັດທະສີນເຈົ້າ ເມືອງໆປາກເຊ, ບັນດາທ່ານຫົວໜ້າພະ ແນກ, ຮອງພະແນກການທີ່ກ່ຽວຂ້ອງ, ພ້ອມດ້ວຍທ່ານຜູ້ອໍານວຍການ, ຮອງ ອໍານວຍການ ນັກວິຊາການພາຍໃນບໍລິສັດເຂົ້າຮ່ວມ.

    ທ່ານ ຕາວັນ ພົມພະຈັນ ຜູ້ອໍານວຍ ການບໍລິສັດ ເອັກສຕຣາສໍາຫຼວດອອກແບບທີ່ປຶກສາ ແລະກໍ່ສ້າງໄດ້ກ່າວວ່າ: ໂຄງການກໍ່ສ້າງດັ່ງກ່າວແມ່ນໄດ້ເລີ່ມ ລົງມືກໍ່ສ້າງມາແຕ່ຕົ້ນເດືອນມີນາ ແລະ ໄດ້ມີການວາງສີລາລຶກໃນຕົ້ນເດືອນມິຖຸນາ 2015, ໂດຍພື້ນຖານການນໍາໃຊ້ ແບບກໍ່ສ້າງທີ່ໄດ້ຜ່ານການຊີ້ນໍາ, ຄົ້ນ ຄົວ, ອອກແບບ-ຄິດໄລ ແລະຮອງຮັບ ຢ່າງເປັນທາງການຈາກບໍລິສັດທີ່ປຶກສາ, ຄະນະກໍາມະການຄຸ້ມຄອງໂຄງການ, ອໍານາດການປົກຄອງ ແລະແຂວງຈໍາ ປາສັກ, ຊຶ່ງແບບດັ່ງກ່າວປະກອບມີຄື: ຂະໜາດເສັ້ນຜ່າໃຈກາງທັງໝົດ 13 ແມັດ, ຖານລຸ່ມເປັນໂຄງສ້າງຮາກຖານ, ເສົາ, ຄານດິນ, ພື້ນເປຕົງເສີມເຫຼັກ, ສ່ວນກາງເປັນໂຄງສ້າງໂລຫະ, ແຜ່ນຂັນ-ລາຍຂັນ, ຕິບເຂົ້າ, ໂມງໃຫຍ່ ແລະຈອມສຸດລວມຄວາມສູງທັງໝົດ 6,50 ແມັດ, ນອກຈາກນີ້ແມ່ນຊິ້ນສ່ວນປະກອບຕິດ ຕັ້ງໂມງໃຫຍ່ 2 ໜ້າ, ປະດັບປະດາໄຟ ຟ້າເຍືອງແສງ, ລະບົບນໍ້າພຸ, ດອກໄມ້ ປະດັບ ແລະອື່ນໆລວມມູນຄ່າກໍ່ສ້າງທັງ ໝົດ 738 ລ້ານກວ່າກີບ.

    ຢ່າງໃດກໍຕາມໃນໄລຍະທີ່ດໍາເນີນການກໍ່ສ້າງບໍລິສັດຮັບເໝົາ, ທີ່ປຶກສາ, ຄະນະກໍາມະການຄຸ້ມຄອງໂຄງການໄດ້ ປຶກສາຫາລືປັບປຸງດັດແກ້ຊີ້ນສ່ວນຂັນ, ຕິບເຂົ້າປ່ຽນມາເປັນການນໍາໃຊ້ໂລຫະທອງປະສົມທີ່ສາມາດແກະສະລັກລາຍ, ດັດໂຄ້ງ, ຕັດແຕ່ງໄດ້ສະດວກ ແລະສວຍງາມຕາມແບບລາຍທີ່ກໍານົດ, ພ້ອມທັງ ໄດ້ຮັບການອະນຸມັດດັດແກ້ເພີ່ມເຕີມ ຈາກຄະນະກໍາມະການ, ອໍານາດການ ປົກຄອງເມືອງ ແລະແຂວງ ຊຶ່ງມີມູນຄ່າ ດັດແກ້ເພີ່ມ 660 ລ້ານກີບ, ໃນນັ້ນເຈົ້າ ຂອງໂຄງການຄືເມືອງປາກເຊເຫັນດີ ຈ່າຍໃຫ້ບໍລິສັດ 500 ລ້ານກີບ, ສ່ວນ ທີ່ເຫຼືອແມ່ນບໍລິສັດປະກອບສ່ວນເຂົ້າຊ່ວຍ 160 ລ້ານກີບ, ຊຶ່ງໄດ້ເຮັດໃຫ້ມູນ ຄ່າລວມໂຄງການມີທັງໝົດ 1.398 ລ້ານກີບ ແລະການກໍ່ສ້າງມາຮອດວັນຕົ້ນ ເດືອນສິງຫາ 2016 ແມ່ນໄດ້ສໍາເລັດ ຢ່າງສົມບູນ, ດັ່ງນັ້ນທາງບໍລິສັດຈິ່ງພ້ອມມອບໃຫ້ອໍານາດການປົກຄອງເມືອງ ປາກເຊກໍຄືອໍານາດການປົກຄອງແຂວງ ຈໍາປາສັກນໍາໃຊ້, ດູແລເບິ່ງແຍງຕໍ່ໄປ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.