ຂະບວນຄາລາວານຊ້າງ ກຽມພ້ອມແລ້ວທີ່ຈະເຂົ້າຮ່ວມງານສະຫຼອງ ເມືອງມໍລະດົກໂລກ ຫຼວງພະບາງ

ໃນວັນທີ 7 ທັນວານີ້, ຊ້າງຈໍານວນ 20 ເຊືອກ ໄດ້ຂ້າມຝາກເຂົ້າມາຍັງເຂດເມືອງຫຼວງພຣະບາງແລ້ວ ເພື່ອກຽມພ້ອມເຂົ້າຮ່ວມການເດີນຂະບວນສະຫຼອງເມືອງຫຼວງພະບາງ ເປັນເມືອງມໍລະດົກໂລກ ຄົບຮອບ 20 ປີ ແລະ ຈະໄດ້ມີພິທີບາສີສູ່ຂວັນໃຫ້ຊ້າງໃນວັນທີ 8 ທັນວານີ້, ພ້ອມນັ້ນ, ກໍ່ຈະໄດ້ເຂົ້າຮ່ວມຂະບວນແຫ່ທີ່ຈັດຂື້ນໃນວັນທີ 9 ທັນວາ ຢູ່ທີ່ເດີ່ນພຣະທາດຫຼວງເມືອງ ແລະ ແຂວງຫຼວງພະບາງ.
ນອກຈາກນັ້ນ, ຈະມີການຈັດມິດຕີ້ງ ແຫ່ກ້ອນຂະບວນຕ່າງໆ ແຕ່ວັດທາດນ້ອຍຫາວັດຊຽງທອງ ຈຳນວນ 50 ກ້ອນຂະບວນ. ຈັດໃຫ້ມີການແຂ່ງຂັນສະແດງສິລະປະວັນນະຄະດີ ແລະ ແຂ່ງຂັນກີລາພື້ນເມືອງປະເພດຕ່າງໆ.
ເມືອງຫຼວງພະບາງໄດ້ຮັບປະກາດເປັນເມືອງມໍລະດົກໂລກ ແຫ່ງທຳອິດຂອງປະເທດລາວ ໂດຍມີຄຸນສົມບັດເຂົ້າຫຼັກເກນການພິຈາລະນາ 3 ຂໍ້, ຈາກ 6 ຂໍ້, ເຊິ່ງໃນນັ້ນມີໜື່ງ, ມີອິດທິພົນຢ່າງສູງເໜືອການເວລາອັນຍາວນານ ຫຼື ມີອິດທິພົນພາຍໃນເຂດວັດທະນະທຳຂອງໂລກ ອັນກ່ຽວເນື່ອງກັບພັດທະນາການທາງສະຖາປັດຕະຍະກຳສິລະປະອັນເປັນເອກະລັກໂດດເດັ່ນການວາງຜັງເມືອງ, ສອງ, ເປັນຕົວຢ່າງອັນຊັດເຈນຂອງຮູບແບບອາຄານສະຖານ ຫຼື ສະຖາປັດຕະຍະກຳ ທີ່ສະແດງໃຫ້ເຫັນເຖິງຂັ້ນຕອນອັນສຳຄັນມີໃນປະຫວັດສາດຂອງມະນຸດ ແລະ ສາມ, ເປັນຕົວຢ່າງອັນຊັດເຈນຂອງການຕັ້ງຖິ່ນຖານຊຸມຊົນມະນຸດ ຫຼື ສະແດງໃຫ້ເຫັນການໃຊ້ພື້ນທີ່ເຊິ່ງເປັນຮູບພາບທີ່ສະແດງເຖິງວັດທະນະທຳ. 


ເມືອງຫຼວງພຣະບາງ ເມືອງແຫ່ງມໍລະດົກໂລກແຫ່ງທຳອິດຂອງ ສປປ ລາວ ໃນດ້ານການອະນຸລັກຄວາມເກົ່າແກ່ໄວ້ໄດ້ດີທີ່ສຸດໃນອາຊີຕາເວັນອອກສ່ຽງໃຕ້ ແລະ ຍັງເປັນສະຖານທີ່ທ່ອງທ່ຽວອັນດັບຕົ້ນໆຂອງປະເທດລາວ. ແນ່ນອນວ່າສະຖານທີ່ແຫ່ງນີ້ ຍັງຄົງຄວາມເປັນທໍາມະຊາດຄວາມບໍລິສຸດຂອງອາກາດ ພ້ອມກັບວິຖີຊີວິດອັນລຽບງ່າຍຂອງຜູ້ຄົນທີ່ຍັງຄົງໃຫ້ເຫັນ