ກຽນໂອ້ພາທີມຂຶ້ນຈ່າຝູງແຕ່ໂຕຖືກໄລ່ອອກຈາກສະໜາມ

 

ມາຣິໂອ ບາໂລເຕລີ້ ຫົວຫອກຂອງ ນີດ ຖືກໄລ່ອອກຈາກສະໜາມຈາກການໄດ້ຮັບໃບເຫຼືອງທີສອງໃນເກມທີ່ທີມຊະນະ ລໍຣິຢົງ 2-1 ເຊິ່ງມັນຈະສົ່ງຜົນເສຍໃຫ້ກັບ ນີດ ຢ່າງຫຼວງຫຼາຍຫຼັງຈາກທີ່ ບາໂລ ກຳລັງຍິງໄດ້ຢ່າງຕໍ່ເນື່ອງຈົນເຮັດໃຫ້ທີມຂຶ້ນມານຳເປັນຈ່າຝູງອີກ.

 

ມາຣິໂອ ບາໂລເຕລີ້ ກອງໜ້າໂຕກຽນຂອງ ນີດ ຖືກໄລ່ອອກຈາກສະໜາມໃນເກມລີກຝຣັ່ງນັດທີ່ຕົ້ນສັງກັດເປີດບ້ານເອົາຊະນະ ລໍຣິຢົງ 2-1 ເມື່ອວັນອາທິດທີ່ຜ່ານມາ.

 

ເກມນີ້ເບິ່ງທ່າທີວ່າຈະອອກຜົນສະເໝີກັນແລ້ວແຕ່ວ່າ ຊຸບເປີ້ມາຣິໂອ້ ມາຍິງປະຕູໄຊໃຫ້ທີມໄດ້ໃນຊ່ວງ 4 ນາທີສຸດທ້າຍເຊິ່ງມັນເຮັດໃຫ້ ນີດ ຂຶ້ນເປັນຈ່າຝູງຂອງຕາຕາລາງຄະແນນໂດຍທີ່ເຂົາສະໃຈແລ້ວແກ້ເສື້ອສະຫຼອງປະຕູຈົນໄດ້ຮັບໃບເຫຼືອງ.

 

ຢ່າງໃດກໍຕາມໃນຊ່ວງທົດເວລາບາດເຈັບນັ້ນ “ຊຸບເປີ້ມາຣິໂອ້” ມາຖືກໃບເຫຼືອງທີສອງເປັນໃບແດງໄລ່ອອກຈາກສະໜາມຈາກຈັງຫວະທີ່ເບິ່ງຄືວ່າຈະໄປປະທະກັບກອງຫຼັງຂອງຄູ່ແຂ່ງເຊິ່ງມັນກໍຖືເປັນເລື່ອງທີ່ໂຊກຮ້າຍກັບຕົ້ນສັງກັດຢ່າງໃຫຍ່ຫຼວງເພາະວ່າຕອນນີ້ ບາໂລເຕລີ້ ກຳລັງຢູ່ໃນຊ່ວງທີ່ຟອມລະເບີດອີກເທື່ອໜຶ່ງເຊິ່ງຍິງໄປແລ້ວ 5 ລູກໃນລະດູການນີ້.

 

ບົດຄວາມໃຫມ່ໆ