ກົມອຸຕຸເຕືອນ ອາກາດໜາວຈະເຢັນລົງ 24-26 ກຸມພານີ້

ກົມ​ອຸຕຸນິຍົມ ແລະ ອຸ​ທົກ​ກະສາດ ກະຊວງ​ຊັບພະຍາກອນ​ທຳມະ​ຊາດ ແລະ ສິ່ງແວດລ້ອມ ໄດ້ແຈ້ງ​ສະພາບ​ອາກາດ ໃນ​ວັນ​ທີ 24-26 ກຸມພາ​ນີ້ວ່າ: ອາກາດ​ໜາວ​ເຢັນ​ຈາກ​ປະເທດ​ຈີນ ຈະ​ເພີ່ມ​ກຳລັງ​ແຮງ​ຂຶ້ນ​ຕື່ມ​ອີກເທື່ອ​ໃໝ່ ແຜ່​ລົງ​ມາ​ປົກ​ຄຸມ​ຢູ່​ທົ່ວທຸກ​ພາກ​ຂອງ​ປະເທດ​ລາວ ແລະ ສົມທົບ​ກັບ​ກະແສ​ຕາເວັນ​ອອກ-ຕາເວັນ​ອອກສຽງ​ເໜືອ​ພັດ​ປົກຄຸມ ເຊິ່ງ​ຈະ​ເຮັດ​ໃຫ້​ອຸນຫະພູມອາກາດ​ໜາວ​ເຢັນ​ລົງ​ຕື່ມ​ອີກ 3-5 ອົງສາ ໃນ​ແຕ່​ລະ​ພາກ ພ້ອມຈະ​ມີ​ຝົນ​ຟ້າ​ຄະນອງ ຟ້າ​ເຫຼື້ອມ ຟ້າຮ້ອງ ແລະ ລົມ​ພັດ​ແຮງ​ບາງທ້ອງຖິ່ນ ສະເພາະ​ເຂດ​ພູ​ສູງ ພູດອຍ ບັນດາ​ແຂວງ​ພາກ​ເໜືອ ໄຊ​ສົມບູນ ເມືອງ​ດາກ​ຈຶງ ແລະ ເຂດ​ພູ​ພຽງ​ບໍລິເວນ ອາກາດ​ຈະໜາວ​ເຢັນ​ຫຼາຍ.

ດັ່ງນັ້ນ ຈຶ່ງ​ຂໍ​ແຈ້ງ​ເຕືອນ​ເຖິງປະຊາຊົນ ອຳນາດ​ການ​ປົກຄອງ ແລະ ອົງ​ການຈັດຕັ້ງ​ທຸກ​ພາກສ່ວນ ທີ່​ອາໄສ​ຢູ່ແຂວງ​ຜົ້ງ​ສາລີ ຫົວພັນ ຊຽງ​ຂວາງ ຫຼວງ​ນ້ຳ​ທາ ອຸດົມ​ໄຊ ບໍ່​ແກ້ວ ຫຼວງ​ພະ​ບາງ ນະຄອນຫຼວງ​ວຽງ​ຈັນ ແຂວງວຽງ​ຈັນ ໄຊ​ສົມບູນ ແຂວງ​ບໍ​ລິຄຳ​ໄຊ ແລະ ແຂວງ​ຄຳ​ມ່ວນ ຈົ່ງມີ​ສະຕິ ກຽມພ້ອມ​ຮັບ​ມື​ກັບ​ສະພາບ​ການ​ປ່ຽນແປງ​ຂອງ​ອຸນຫະພູມ ເຊິ່ງ​ອາດ​ຈະ​ມີ​ຜົນ​ກະທົບ​ຕໍ່ສຸຂະພາບ ໂດຍ​ສະເພາະ ເດັກນ້ອຍ ແລະ ຜູ້​ເຖົ້າອາດ​ເຈັບ​ປ່ວຍໄດ້​ງ່າຍ ໃຫ້​ມີ​ສະຕິ​ຕໍ່​ສະພາບ​ດັ່ງກ່າວ ທີ່​ອາດ​ຈະ​ເກີດ​ມີ​ຕົ້ນໄມ້​ຫັກ ແລະ ເຮືອນ​ຊານ​ເປ່​ເພ ພ້ອມ​ໃຫ້ຕິດຕາມ​ການ​ລາຍ​ງານ​ສະພາບອາກາດ​ ຈາກ​ກົມ​ອຸຕຸນິຍົມ ເປັນປົກກະຕິ.

ແຫຼ່ງຂ່າວ: ໜັງສືພິມ ວຽງຈັນໃໝ່. 

ບົດຄວາມໃຫມ່ໆ