ກົມພະລະ ແລະ ສິລະປະສຶກສາ ຈັດແຂ່ງ ຂັນກິລາຕ້ອນຮັບວັນຄູແຫ່ງຊາດ ຄົບ ຮອບ 20 ປີ

ໃນ​ວັນ​ທີ 18 ກັນຍາ ຜ່ານ​ມາ ທີ່​ສະໜາມກິລາ​ເຈົ້າ​ອານຸວົງ ​ເມືອງ​ຈັນທະ​ບູລີ ນະຄອນຫວງ​ວຽງ​ຈັນ3 ອົງການຈັດຕັ້ງມະຫາຊົນຂອງ ກົ​ມພະລະ ​ແລະສິລະ​ປ​ະສຶກສາ ກະຊວງ ​ສຶກສາ​ທິການ ​ແລະ ກິລາ, ວິທະຍາ​ໄລ ສິລະ​ປະ​ສຶກສາ ​ແລະ ວິທະຍາ​ໄລ ພະລະສຶກສາ ຮ່ວມ​​ຈັດ​ແຂ່ງຂັນ​ກິລາ 5 ປະ​ເພດ ປະກອບ​ມີ ​ແລ່ນ​ໄຖ່, ຄີບປິ່ງ​ປ່ອງ, ​ແລ່ນສາມ​ຂາ, ດຶງ​ເຊືອກ ​ແລະ ປິດ​ຕາ​ເຕະບານ ​ເພື່ອ​ສ້າງ​ຂະ​ບວນການ​ຕ້ອນຮັບ​ວັນ​ຄູ​ແຫ່ງ​ຊາດ (7 ຕຸລາ) ຄົບຮອບ 20 ປີ ທີ່​ໃກ້​ຈະ​ມາ​ເຖິງ​ນີ້, ພາຍ​​ໃຕ້​ການ​ເປັນ​ປະທານ​ຂອງ ທ່ານ ບຸນ​ສຸກ ທິລະ​ສັກ ຫົວໜ້າ​ກົມພະລະ ​ແລະ ສິລະ​ປ​ະສຶກສາ ກະຊວງ​ສຶກສາ​ທິການ ​ແລະ ກິລາ, ມີ​ຜູ້​ອຳນວຍ​ການ, ຕ່າງ​ໜ້າຄະນະ​ອຳນວຍ​ການ​ຂອງວິທະຍາ​ໄລ ສິລະ​ປະ​ສຶກສາ ​ແລະ ວິທະຍາ​ໄລ ພະລະສຶກສາ ​ພ້ອມດ້ວຍຄະນະ, ພະນັກງານລັດຖະກອນ, ວິຊາການ, ນັກກິລາແລະ ນັກສຶກສາ ເຂົ້າຮ່ວມ.

ໂອກາດດັ່ງກ່າວ ທ່ານ ບຸນ​ສຸກ ທິລະ​ສັກ ໄດ້ກ່າວເຖິງຈຸດປະສົງຂອງ​ງານ​ວ່າ: ເພື່ອເປັນການຊົມເຊີຍຜົນສຳເລັດຂອງກອງປະຊຸມໃຫຍ່ຂອງອົງຄະນະ ພັກກະຊວງສຶກສາທິການ ແລະ ກິລາ ຄັ້ງທີ VIII ​ຜ່ານ​ມາ, ຊົມ​ເຊີຍ​ຜົນສຳ​ເລັດ​ສ້າງ​ຂະ​ບວນການ​ຂອງ​ກົມ​ພະລະ ​ແລະ ສິ​ລະ​ປະ​ສຶກສາ, ວິທະຍາ​ໄລ ພະລະສຶກສາ ​ແລະ ວິທະຍາ​ໄລ ສິລະ​ປະ​ສຶກສາ ​ເພື່ອ​ຕ້ອນຮັບ​ວັນ​ສຳຄັນ​ຕ່າງໆ​ຂອງ​ຊາດ ທີ່​ຈະ​ມາ​ເຖິງ​ນີ້ ​ໂດຍ​ສະ​ເພາະ ການ​ແຂ່ງຂັນ​ດັ່ງກ່າວ ​ແມ່ນ​ຈັດ​ຕັ້ງ​ຂຶ້ນ​ເພື່ອ​ສ້າງ​ຂະ​ບວນການ​ຄຳນັບຮັບ​ຕ້ອນ​ວັນ​ຄູ​ແຫ່ງ​ຊາດ ຄົບຮອບ 20 ປີ ທີ່​ຈະ​ມາ​ເຖິງ​ນີ້. ສຳລັບ ການຈັດກິດຈະກຳຄັ້ງນີ້ ກໍ່ແມ່ນບັນດາ​ອົງການ​ຈັດ​ຕັ້ງ​ມະຫາຊົນ​ຊາວ​ໜຸ່ມ, ​ແມ່ຍິງ ແລະ ກຳມະບານເປັນເຈົ້າການ. ​ເພື່ອສ້າງ​ບັນຍາກາດ​ເບີກບານ​ມ່ວນ​ຊື່ນ ​ແລະ ​ເສີມ​ຂະຫຍາຍ​ຄວາມ​ສາມັກຄີເຊິ່ງກັນ ແລະ ກັນ. ສຳລັບການ​ແຂ່ງຂັນ​ຄັ້ງ​ນີ້ ປະກອບ​ມີ 5 ປະ​ເພດ​ກິລາ​ຄື:  ແລ່ນ​ໄຖ່, ຄີບປິ່ງ​ປ່ອງ, ​ແລ່ນສາມ​ຂາ, ດຶງ​ເຊືອກ ​ແລະ ປິດ​ຕາ​ເຕະບານ.

ທີ່ມາ http://kpl.gov.la/