ກຸ່ມຫັດຖະກຳຕ່ຳຫູກ ອ່າງນ້ຳຫຸມ ສ້າງລາຍຮັບຄອບຄົວໜຶ່ງຫຼາຍກວ່າ 1 ລ້ານກີບ

ທ່ານ​ນາງ ຄຳ​ພາ ແກ້ວ​ສະຫວ່າງ ຫົວໜ້າ​ກຸ່ມ​ຫັດຖະກຳ​ຕ່ຳຫູກ​ບ້ານ​ອ່າງ​ນ້ຳ​ຫຸມ ໄດ້​ລາຍງານ​ຕໍ່​ທ່ານ ທອງ​ລຸນ ສີ​ສຸ​ລິດ ນາຍົກ​ລັດຖະມົນຕີ ໃນ​ໂອກາດ​ລົງໄປ​ຢ້ຽມຢາມ​ການ​ຜະລິດ​ຢູ່​ເມືອງນາ​ຊາຍ​ທອງ ນະຄອນຫຼວງ​ວຽງຈັນ ​ວ່າ: ກຸ່ມ​ຫັດຖະກຳ​ຕ່ຳຫູກບ້ານ​ອ່າງ​ນ້ຳ​ຫຸມ ໄດ້​ສ້າງຕັ້ງ​ກຸ່ມໃນ​ເດືອນ​ຕຸລາ 2016 ເປັນຕົ້ນ​ມາ ມີ​ສະມາຊິກ​ພາຍ​ໃນ​ກຸ່ມທັງ​ໝົດ 90 ຄອບຄົວ ຜະລິດ​ຕະ​ພັນ​ທີ່​ຕ່ຳສ່ວນ​ໃຫຍ່​ແມ່ນ​ຕ່ຳ​ຕີນ​ສີ້ນ​ເຮັດດ້ວຍ​ໄໝ​ມັນ ແລະ ໄໝ​ມະນີ​ກັດ ຈຳໜ່າຍ​ສົ່ງ​ໃຫ້​ຕະຫຼາດ​ຂົວ​ດິນ ແລະ ຕະຫຼາດ​ເຊົ້າ ສ່ວນ​ໜຶ່ງ​ໄດ້ຕ່ຳ​ໃຫ້​ໂຮງຮຽນ​ຕ່າງໆ ສຳລັບ​ຜະລິດ​ຕະ​ພັນ​ຕີນ​ສີ້ນ​ທີ່​ຕ່ຳ​ໄດ້​ຂາຍ​ດີ ແມ່ນ​ໄລຍະ​ເດືອນ​ຕຸລາ​ຫາເດືອນເມສາ ເຊິ່ງ​ໄລຍະ​ນີ້​ ຜະລິດ​ຕະ​ພັນທີ່​ຕ່ຳ​ໃຫ້​ລູກ​ຄ້າ​ແມ່ນ​ບໍ່​ພຽງພໍ​ກັບຄວາມ​ຕ້ອງການ​ຂອງ​ຕະຫຼາດ ສະນັ້ນ ໃນຕໍ່ໜ້າ​ຈຶ່ງ​ຕ້ອງການຂະຫຍາຍ​ການ​ຕ່ຳ ແຕ່​ກໍ່​ຍັງ​ບໍ່​ມີທຶນ​ພຽງພໍ ຈຶ່ງ​ຮຽກຮ້ອງ​ໃຫ້​ພາກສ່ວນ​ກ່ຽວຂ້ອງ​ໃຫ້ການ​ຊ່ວຍເຫຼືອ ນຳ​ເອົາ​ທຶນ​ດອກ​ເບ້ຍ​ຕ່ຳ​ມາສະໜອງ ເພື່ອ​ຂະຫຍາຍ​ການ​ຕ່ຳອອກ​ໄປ​ໃຫ້​ເອື້ອຍ​ນ້ອງ​ແມ່ຍິງ​ໄດ້ມີ​ວຽກ​ເຮັດ​ງານ​ທຳ ແລະ ໄດ້​ຮັບລາຍ​ຮັບ​ເພີ່ມ ​ປະກອບສ່ວນ​ສ້າງເສດຖະກິດ​ໃຫ້​ນັບ​ມື້​ນັບ​ເຂັ້ມແຂງຂຶ້ນ.
ສຳລັບ​ລາຍ​ຮັບ​ໃນ​ປັດຈຸບັນ​ນີ້ ສະມາຊິກ​ພາຍ​ໃນ​ກຸ່ມ​ແມ່ນ​ໄດ້ມີ​ລາຍ​ຮັບ​ສະເລ່ຍ​ ຈາກ​ການ​ຈຳໜ່າຍ​ຜະລິດ​ຕະ​ພັນ ປະມານ 1,2 ຫາ 1,8 ລ້ານ​ກວ່າ​ກີບ​ຕໍ່​ເດືອນ ເຊິ່ງ​ກໍ່​ຖື​ໄດ້​ວ່າເປັນ​ລາຍ​ຮັບ​ທີ່​ໝັ້ນທ່ຽງ​ເຂົ້າ​ມາ​ຮັບ​ໃຊ້​ໃນ​ແຕ່​ລະຄອບຄົວ.