ກຸ່ມບໍລິສັດມັງກອນຄຳ ມອບຄອມພິວເຕີ ໃຫ້ສະພາແຫ່ງຊາດ

ຂປລ. ກຸ່ມບໍລິສັດ ມັງກອນຄຳ ນຳໂດຍທ່ານ ດຣ. ແອນດຣິວ ຢາງ, ປະທານບໍລິສັດ ໄດ້ນຳເອົາຄອມ ພິວເຕີ (ໂນດບຸກ) ຈຳນວນ 100 ຊຸດ ລວມມູນຄ່າທັງໝົດ 299.900.000 ກີບ ມາມອບໃຫ້ແກ່ ສະພາແຫ່ງຊາດ ໃນວັນທີ 22 ກໍລະກົດ 2015 ນີ້ ໂດຍແມ່ນທ່ານ ວິເສດ ສະແຫວງສຶກສາ ຮອງຫົວໜ້າຫ້ອງວ່າການ ສະພາແຫ່ງຊາດ ເປັນຜູ້ຮັບ, ໂດຍມີ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ  ເຂົ້າຮ່ວມເປັນສັກຂີພິຍານ.

ທ່ານນາງ ປານີ ຢາທໍ່ຕູ້ ໄດ້ກ່າວສະແດງຄວາມຂອບໃຈ ຕໍ່ບໍລິສັດດັ່ງກ່າວ ທີ່ໃຫ້ການຊ່ວຍເຫລືອໃນຄັ້ງນີ້ ເຊິ່ງເປັນການປະກອບສ່ວນ ອັນສຳຄັນເຂົ້າໃນການຮ່ວມມື ລະຫວ່າງ ສອງປະເທດ ລາວ-ເກົາຫລີ, ເວົ້າສະເພາະ ລະຫວ່າງ ກຸ່ມບໍລິສັດມັງກອນຄຳ ກັບສະພາແຫ່ງຊາດ,  ພ້ອມທັງຢືນຢັນ ຈະນຳເອົາອຸປະກອນ ຈຳນວນດັ່ງກ່າວ ໄປນຳໃຊ້ເຂົ້າໃນ ວຽກງານຕ່າງໆ ພາຍໃນສະພາແຫ່ງຊາດ ໃຫ້ເກີດຜົນປະໂຫຍດສູງສຸດ ເຊິ່ງສະພາແຫ່ງຊາດ ມີແຜນຈະຕິດຕັ້ງລະບົບ ຫໍສະໝຸດເອເລັກໂຕນິກ ໃສ່ຫ້ອງວ່າການ ສະພາແຫ່ງຊາດ ແນໃສ່ການຄຸ້ມຄອງລະບົບຂໍ້ມູນ ເອເລັກໂຕນິກ ເພື່ອຕອບສະໜອງຄວາມຕ້ອງການ ຂອງສູນກິດຈະກຳ ທາງດ້ານວັດທະນະທຳ./. ຂອບໃຈທີ່ມາ http://kpl.gov.la/detail.aspx?id=4967