ກຸນໂດກັນ ບໍ່ຟັນທຸງກັບອະນາຄົດເທື່ອ

 

ອີຄາຍ ກຸນໂດກັນ ຫ້ອງເຄື່ອງ ໂບຣຸສເຊຍ ດອດມູນ ທີ່ກຳລັງເປັນທີ່ໝາຍປອງ ແມນເຊສເຕີ ຊີຕີ ແລະ ຢູເວັນຕຸດ ເປີດເຜີຍກຳລັງລຸ້ນຄິດເລື່ອງຕົວເລືອກຕ່າງໆຢູ່ ແລະ ຍັງບໍ່ໄດ້ຕັດສິນໃຈວ່າຈະໄປລົງກັບທີມໃດໃນລະດູການໜ້າ.

 

ອີຄາຍ ກຸນໂດກັນ ກອງກາງຂອງ ໂບຣຸສເຊຍ ດອດມູນ ສະໂມສອນນຳຈາກ ບຸນເດສລີກາ ອອກມາຢືນຢັນວ່າ ຍັງບໍ່ຕັດສິນໃຈອະນາຄົດຂອງຕົນເອງເນື່ອງຈາກກຳລັງພິຈາລະນາຕົວເລືອກຕ່າງໆຢູ່ກັບກະແສຂ່າວລືທີ່ ຢູເວັນຕຸດ ກັບ ແມນ ຊີຕີ 2 ທີມໃຫຍ່ຈາກ ເອຣົບ ກຳລັງໃຫ້ຄວາມສົນໃຈຢູ່.

 

ກອງກາງທີມຊາດ ເຢຍລະມັນ ເຫຼືອສັນຍາກັບຕົ້ນສັງກັດຈົນຮອດເດືອນມິຖຸນາປີ 2017 ແລະ ຕົກເປັນຂ່າວກັບ “ເຮືອໃບສີຟ້າ” ແລະ “ມ້າລາຍ” ຢ່າງໃດກໍຕາມ ເຂົາກໍຈັດການອັດຂ່າວລືໂດຍການຈົດປາກກາຕໍ່ສັນຍາສະບັບໃໝ່ກັບ “ເສືອເຫຼືອງ” ອີກ 2 ປີ ເມື່ອປີ 2015 ແຕ່ລ່າສຸດ ກຸນໂດກັນ ເຜີຍວ່າຍັງບໍ່ຮັບປະກັນກ່ຽວກັບອະນາຄົດຂອງຕົນເອງໃນລະດູການໜ້າ.

 

“ມັນຍັງບໍ່ຕັດສິນໃຈ ແລະ ແນ່ນອນວ່າທຸກຢ່າງຕ້ອງພິຈາລະນາຢ່າງຮອບຄອບຫຼາຍເພາະເຈົ້າມີອາຊີບທີ່ມີເວລາຈຳກັດ ແຕ່ບອກຕາມຕົງວ່າຍັງເປີດກວ້າງຢູ່ ຂ້ອຍຮູ້ເຖິງສິ່ງທີ່ຂ້ອຍມີກັບສະໂມສອນຂອງຂ້ອຍ ແລະ ຂ້ອຍຈະບໍ່ລືມ ແຕ່ຂໍເວົ້າອີກເທື່ອວ່າການຕັດສິນໃຈນັ້ນແນ່ນອນວ່າຍັງບໍ່ໄດ້ເກີດຂຶ້ນແຕ່ຢ່າງໃດ” ກຸນໂດກັນ ກ່າວກັບ “ບິລ” ສື່ດັງຈາກແດນໄສ້ກອກ.

 

ສຳລັບ ກຸນໂດກັນ ຍ້າຍມາຈາກ ເນິນແບັກ ມາຟາດແຄ່ງໃນຮັງ ຊິກນັນ ອິດູນາ ພາກ ເມື່ອປີ 2011 ແລະ ຊ່ວຍທີມເປັນແຊມບຸນເດສລີກາ ແລະ ເດເອຟເບ ເມື່ອລະດູການ 2011-2012, ເດເອຟເບ ຊຸບເປີຄັບ ປີ 2013 ລວມເຖິງການລົງຫຼິ້ນຮອບຊິງຊະນະເລີດ ຢູຟາ ແຊມປຽນລີກ ປີ 2013 ຂະນະທີ່ລະດູການນີເຂົາຍັງຍິງໃຫ້ທີມຂອງ ໂທມັສ ທູເຄິນ 2 ປະຕູ ລວມທຸກລາຍການ.