ກິນ​ຜັກ­ບົ້ງ ເຮັດ​ໃຫ້​ຄົນຕາ​ຫວານ ແມ່ນ ຫຼື ບໍ່?

 

ດວງ​ຕາ​ທີ່​ມີ​ແວວ​ຫວານ​ຢາດຍ້ອຍ​ຂອງ​ສາວ​ນ້ອຍ-ສາວ​ໃຫຍ່​ໄດ້​ມາຍ້ອນ​ໃບ​ຜັກ­ບົ້ງ​ແທ້​ຫວະ? ເພາະ​ໄດ້​ຍິນເພິ່ນ​ວ່າ ກິນ​ຜັກ­ບົ້ງ​ແລ້ວ​ຕາ​ຫວານ

ດັ່ງນັ້ນ ບົດ​ສາ­ລະ​ໜ້າ​ຮູ້​ປະ­ຈຳ​ອາ­ທິດ​ນີ້​ຜູ້ຮຽບ​ຮຽງ​ຈິ່ງ​ຂໍ​ພາ​ທ່ານ​ຜູ້​ອ່ານ​ໄປ​ຮູ້­ຈັກຄຸນ​ປະ­ໂຫຍດ​ຂອງ​ຜັກ­ບົ້ງ​ວ່າ​ມີ​ສ່ວນໃດ​ພາ­ໃຫ້​ເຮົາ​ຕາ​ຫວານ?

   ຜັກ­ບົ້ງເປັນ​ພືດ​ໃບ​ຂຽວ ແລະ​ມີສານ​ກຸ່ມ​ໜຶ່ງ​ທີ່​ກ່ຽວ­ຂ້ອງ​ໂດຍ​ກົງ​ກັບ​ສຸຂະ​ພາບ​ຕານັ້ນ​ກໍ​ຄື​ສານ​ໃນ​ກຸ່ມ​ແຄ​ໂຣ ທິ​ນອຍ (Carotenoid) ຊຶ່ງ​ສານ​ກຸ່ມນີ້​ມີ​ຢູ່​ຫຼາຍ​ຮ້ອຍ​ຊະ­ນິດ ແລະ​ແຕ່​ລະ​ຊະນິດ​ນັ້ນນັກ­ວິ­ທະ­ຍາ­ສາດ​ກໍ​ໄດ້​ຄົ້ນ​ພົບ​ວ່າມີ​ສ່ວນ​ປັບ​ປ່ຽນ​ໄປ​ເປັນ​ວິ­ຕາ­ມິນ A ໄດ້ຄື ເບ​ຕ້າ​ແຄ​ໂຣ​ທິນ ໂດຍ​ວິ­ຕາ­ມິນ A ນີ້​ເອງ​ທີ່​ຊ່ວຍ​ໃນ​ການ​ເບິ່ງ​ເຫັນ ຫຼື ຊ່ວຍໃນ​ການ​ເຮັດ​ວຽກ​ຂອງ​ຕາ (ສາຍ­ຕາ) ໃຫ້​ດີ​ຍິ່ງ​ຂຶ້ນ​ສ່ວນ​ລູ​ທິນ (Lutein) ກັບຊີ​ເອ​ແຊນ​ທີນ Zeaxanthin) ກໍ​ເປັນສານ​ອີກ​ຊະ­ນິດ​ໜຶ່ງ ຊຶ່ງ​ຢູ່​ໃນ​ກຸ່ມ​ແຄ​ໂຣ ທິ​ນອຍ​ຄື​ກັນ.

   ດັ່ງ­ນັ້ນ ການ​ກິນ​ຜັກ­ບົ້ງ ຈິ່ງ​ຊ່ວຍເພີ່ມ​ປະ­ສິດ­ທິ­ພາບ​ໃນ​ການ​ເບິ່ງ​ເຫັນ ແລະ​ປ້ອງ​ກັນ­ແສງ​ໂດຍ​ສະ­ເພາະ​ແສງຟ້າ​ໃສ​ເຫຼື້ອມທີ່​ເຮັດ​ໃຫ້​ດວງ​ຕາ​ຂອງເຮົາ​ເສື່ອມ​ສະ­ພາບ​ລົງ​ຈາກ​ເຫດ­ຜົນດັ່ງ­ກ່າວ ຈິ່ງ​ມີ​ຄວາມ​ເຊື່ອມ​ໂຍງ​ກັບ​ວັດທະ­ນະ​ທຳ ການ​ຮັບ​ປະທານ​ຜັກ­ບົ້ງທີ່​ສັງ­ຄົມ​ທົ່ວ​ໄປ​ມັກ​ເວົ້າ​ເຖິງ​ແຕ່​ຖ້າ​ຈະກິນ​ດິບ​ກໍ​ຕ້ອງ​ແນ່​ໃຈ​ວ່າ​ຜັກ­ບົ້ງ​ໄດ້​ມາ​ຈາກ​ການ​ຜະ­ລິດ​ປອດ​ໄພ​ຈາກ​ສານພິດແທ້​ບໍ່? ແລະ​ຖ້າ​ປຸງ​ສຸກ​ກໍ​ບໍ່​ຄວນ​ໃຫ້ຜ່ານ​ຄວາມ​ຮ້ອນ​ດົນ​ເກີນ​ໄປ​ເພາະ​ຈະ​ເຮັດ​ໃຫ້​ຄຸນ​ປະ​ໂຍດ​ໃນ​ຜັກ­ບົ້ງ​ເສຍ​ໝົດ​ໄປ.