ກິກເປີດສາກເຈລະຈາຄຸມຫົງຂາວແທນກຸຍໂດລິນ

 

ຄວາມຝັນໃນການເປັນຜູ້ຈັດການທີມເຕັມຕົວອາດຈະກາຍເປັນຈິງສຳລັບ ໄຣອັນ ກິກ ອະດີດນັກເຕະຂອງ ແມນຢູ ແລະ ທີມຊາດເວວ ຫຼັງຈາກຫຼ້າສຸດເລີ່ມຕົ້ນລົມກັບບອດບໍລິຫານຂອງ ສະວອນຊີ ກ່ຽວກັບເລື່ອງນັ່ງຕັ່ງນາຍໃຫຍ່ຄົນໃໝ່ແທນ ຟຣານເຊສໂກ້ ກຸຍໂດລິນ ທີ່ກຳລັງກົດດັນຢ່າງໜັກ ຫຼັງຈາກທີ່ນຳທີມເກັບໄຊໄດ້ພຽງນັດດຽວຈາກ 6 ເກມ.

 

ໄຣອັນ ກິກ ຕຳນານປີກ ແມນເຊສເຕີ ຢູໄນເຕັດ ເປີດສາກການເຈລະຈາກັບ ສະວອນຊີ ຊີຕີ້ ສະໂມສອນດັງຂອງ ພຣີເມຍລີກ ກ່ຽວກັບການເຮັດໜ້າທີ່ຄຸມບັງຫຽນທັບ ຫົງຂາວ ແທນທີ່ ຟຣານເຊສໂກ້ ກຸນໂດລິນ ຜູ້ຈັດການທີມຄົນອີຕາລີທີ່ເຮັດຜົນງານໃນຊ່ວງເລີ່ມຕົ້ນລະດູການໄດ້ບໍ່ດີ ຈາກການລາຍງານຂອງ “ເດິ ທາມ” ສື່ຊັ້ນນໍາເມື່ອວັນຈັນທີ່ຜ່ານມາ.

 

ກຸຍໂດລິນ ທີ່ໄດ້ຮັບການແຕ່ງຕັ້ງຄຸມບັງຫຽນເມື່ອເດືອນມັງກອນທີ່ຜ່ານມາກຳລັງຕົກຢູ່ພາຍໃຕ້ຄວາມກົດດັນຢ່າງໜັກຫຼັງຈາກທີ່ນຳທັບ “ຫົງຂາວ” ເກັບໄຊຊະນະໄດ້ພຽງນັດດຽວຂະນະທີ່ເປັນການປລາໄຊເຖິງ 4 ຈາກ 6 ນັດລວມເຖິງນັດຫຼ້າສຸດທີ່ເປີດບ້ານ ລິເວຕີ້ ສະເຕດ້ຽມ ເສຍໃຫ້ກັບ ແມນເຊສເຕີ ຊີຕີ້ 1-3 ເມື່ອວັນເສົາທີ່ຜ່ານມາ.

 

ດ້ານອະດີດດາວເຕະເວວເຈົ້າຂອງສາຍາ “ປີກພໍ່ມົດ” ຕັດສິນໃຈອໍາລາ ຜີສາດແດງ ທີ່ຢູ່ມາດົນເຖິງ 29 ປີຫຼັງຈາກທີ່ປະຕິເສດຮັບໜ້າທີ່ເປັນໜຶ່ງໃນສະຕາບໂຄດຂອງ ໂຊເຊ້ ມູຣິນໂຢ້ ເພື່ອເຮັດຕາມຄວາມຝັນໃນການເປັນຜູ້ຈັດການທີມຢ່າງເຕັມຕົວກັບສະໂມສອນອື່ນຕໍ່ໄປ ເຊິ່ງຫຼ້າສຸດມີລາຍງານວ່າເຂົາເລີ່ມຕົ້ນເຈລະຈາກັບບອດບໍລິຫານຂອງ ສະວອນຊີ ແລ້ວຫຼັງຈົບເກມເສຍ “ເຮືອໃບສີຟ້າ” 1-2 ຕົກຮອບ 32 ທີມສຸດທ້າຍຂອງ ອີເອຟແອວ ຕັບ ເມື່ອວັນພຸດຂອງອາທິດທີ່ຜ່ານມາ.