ກາໝີສະດຸ້ງ!!ກຣິສມັນສໍ່ເຈັບຕີນນັດດາບີເມືອງມາດຣິດ

 

ມາກາ ສື່ຂອງສະເປນລະບຸ ອອງຕວນ ກຣິສມັນ ຫົວຫອກຂອງ ແອັດ ມາດຣິດ ມີອາການຕີນບວມຈາກຕອນຫຼິ້ນໃຫ້ຝຣັ່ງຈົນອາດຈະອົດລົງຊ່ວຍທີມໃນເກມກັບ ເຣອັນ ມາດຣິດ ວັນເສົາທີ 19 ພະຈິກນີ້ ໂດຍເຈົາຖືເປັນກຳລັງຫຼັກຂອງ “ກາໝີ” ເມື່ອຍິງໃນລີກໄປແລ້ວເຖິງ 6 ລູກ.

 

ອອງຕວນ ກຣິສມັນ ກອງໜ້າຂອງ ແອັດເລຕິໂກ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນອາດຈະອົດລົງເກມລີກນັດດາບີແມັດແຫ່ງນະຄອນມາດຣິດທີ່ຕົ້ນສັງກັດຂອງເຂົາຈະເປີດບ້ານ ບິເຊັນເຕ ກັນເດຣອນ ພົບກັບ ເຣອັນ ມາດຣິດ ວັນເສົາທີ 19 ພະຈິກນີ້ ຫຼັງຈາກທີ່ມີອາການຕີນບວມ ຕາມການລາຍງານຂອງ ມາກາ ສື່ຊື່ດັງຂອງແດນກະທິງ.

 

ກຣິສມັນ ຫາກໍຊ່ວຍໃຫ້ທີມຊາດຝຣັ່ງເອົາຊະນະ ສະວີເດັນ ໃນເກມບານໂລກ 2018 ຮອບຄັດເລືອກໂຊນເອີຣົບ ກຸ່ມເອ 2-1 ເມື່ອວັນສຸກທີ່ຜ່ານມາແຕ່ເຂົາເບິ່ງຄືວ່າຈະມີອາການເຈັບຈົນຖືກປ່ຽນຕົວອອກຈາກສະໜາມໃນນາທີ 88.

 

ຖ້າວ່າ ກຣິສມັນ ລົງຫຼິ້ນບໍ່ໄດ້ມັນກໍຖືເປັນຂ່າວຮ້າຍຢ່າງໃຫຍ່ຫຼວງສຳລັບ ແອັດ ມາດຣິດ ເພາະປັດຈຸບັນເປັນດາວຊັນໂວສູງສຸດຂອງທີມໃນລະດູການນີ້ ໂດຍຍິງໃນລີກໄປແລ້ວ 6 ລູກ ແລະ ເປັນສ່ວນໜຶ່ງທີ່ເຮັດໃຫ້ທີມເປັນອັນດັບ 4 ຂອງລີກຢູ່ຕອນນີ້.