ການແຂ່ງຂັນຮ້ອງເພງຊີງຂັນລັດຖະມົນຕີກະຊວງສຶກສາທິການ ແລະ ກິລາ ຈັດຂຶ້ນຢູ່ນະຄອນຫຼວງວຽງຈັນ

ວັນທີ 11 ກຸມພາ 2016 ນີ້, ທີ່ນະຄອນຫຼວງວຽງຈັນ, ທ່ານ ບຸນສຸກ ທິລະສັກ ຫົວໜ້າກົມພະລະສຶກສາ ແລະ ສິລະປະສຶກສາ ໄດ້ຖະແຫຼງຂ່າວຈະມີການແຂ່ງຂັນຮ້ອງເພງ ຊິງຂັນທ່ານລັດຖະມົນຕີວ່າການກະຊວງສຶກສາທິການ ແລະ ກິລາວ່າ: ເພື່ອເປັນການສົ່ງເສີມນັກຮຽນຜູ້ທີ່ມັກໃນການຮ້ອງເພງ, ໄດ້ມີໂອກາດສະແດງຄວາມສາມາດ ແລະ ພອນສະຫັວນຂອງເຂົາເຈົ້າ, ສົ່ງເສີມນັກຮຽນໄດ້ໃຊ້ເວລາຫວ່າງເປັນປະໂຫຍດໃນການຮຽນຮູ້ສິລະປະ-ວັດທະນະທຳທັງພາຍໃນ ແລະ ຕ່າງປະເທດ ທີ່ມີຄວາມເປັນເອກະລັກຂອງຊາດ ແລະ ຫ່າງໄກຈາກສິງເສບຕິດ ແລະ ຫຼີກເວັ້ນຈາກປາກົດການຫຍໍ້ທໍ້ຕ່າງໆ.
ທ່ານກ່າວອີກວ່າ: ການແຂ່ງຂັນຮ້ອງເພງຄັ້ງນີ້, ຈະເນັ້ນເພງທີ່ມີລັກສະນະສາກົນ, ຮ້ອງດ່ຽວປະກອບດົນຕຣີ, ມີຈັງຫວະຊ້າ ແລະ ໄວ ເພື່ອຊີງທຶນການສຶກສາ ແລະ ມີໂອກາດເຂົ້າເປັນນັກຮ້ອງໃນຄ້າຍເພງທີ່ມີຊື່ສຽງໃນປະເທດນຳອີກ, ເຊິ່ງເປົ້າໝາຍຂອງຜູ້ສະໝັກເຂົ້າຮ່ວມການແຂ່ງຂັນ ແມ່ນນັກຮຽນ-ນັກສຶກສາ ມີອາຍຸລະຫວ່າງ 15-20 ປີ ບໍ່ເຄີຍສັງກັດຢູ່ຄ້າຍເພງໃດມາກ່ອນ ແລະ ຈະຈັດເປັນ 3 ຮອບຄື: ຮອບຄັດເລືອກຈະຈັດຂຶ້ນວັນທີ 27 ກຸມພາ 2016 ທີ່ສູນການຄ້າວຽງຈັນເຊັນເຕີ, ໂດຍຄັດເລືອກເອົາຜູ້ສຽງດີ 30 ຄົນ, ຂອງຈຳນວນຜູ້ສະໝັກທັງໝົດ, ຮອບທີສອງຈະຈັດຂຶ້ນວັນທີ 11 ມີນາ 2016 ທີ່ຫໍວັດທະນະທຳແຫ່ງຊາດ, ຊຶ່ງໃນຮອບນີ້ ຈະຄັດເລືອກເອົາຜູ້ສຽງດີ, ມີລີລາທ່າທາງດີ ແລະ ມີພອນສະຫວັນໃນການເປັນນັກຮ້ອງ 12 ຄົນ ແລະ ຮອບຊີງຊະນະເລີດ ຈະຈັດຂຶ້ນວັນທີ 5 ເມສາ 2016 ທີ່ຫໍວັດທະນະທຳແຫ່ງຊາດ, ເຊິ່ງມີມູນຄ່າລາງວັນ 80 ລ້ານກວ່າກີບ. 
ໂຄງການແຂ່ງຂັນຮ້ອງເພງຊີງຂັນລັດຖະມົນຕີກະຊວງສຶກສາທິການ ແລະ ກິລາຄັ້ງນີ້, ລາງວັນທີ 1 ຈະໄດ້ຮັບທຶນການສຶກສາ 15 ລ້ານກີບ ພ້ອມດ້ວຍຂັນລາງວັນ, ໃບກຽດຕິຄຸນ ແລະ ຂອງຂວັນຈາກຜະລິດຕະພັນແປັບຊີ ຈຳກັດ. ທີ 2 ໄດ້ຮັບທຶນການສຶກສາ 10 ລ້ານກີບ ພ້ອມໃບກຽດຕິຄຸນ ແລະ ຂອງຂວັນຈາກຜະລິດຕະພັນແປັບຊີ ແລະ ທີ 3 ໄດ້ຮັບທຶນການສຶກສາ 8 ລ້ານກີບ ພ້ອມໃບກຽດຕິຄຸນ. ນອກຈາກນີ້ຍັງມີລາງວັນການສະແດງດີເດັ່ນ ແລະ ລາງວັນມິດຕະພາບ.