ການເກັບອາກອນມູນຄ່າເພີ່ມອາດຈະສົ່ງຜົນກະທົບຕໍ່ແມ່ຄ້າຊາວຂາຍ ແລະ ຜູ້ບໍລິໂພກ ຫຼື ບໍ? ເນື່ອງຈາກປະເທດເຮົານໍາເຂົ້າສິນຄ້າຫຼາຍກວ່າສົ່ງອອກ

      ຈາກການທີ່ກະຊວງການເງິນ ທີ່ເພີ່ນອອກ ຂໍ້ກຳນົດວ່າດ້ວຍການເກັບອາກອນມູນຄ່າເພີ່ມສຳລັບເຄື່ອງຂອງຕິດຕົວຜູ້ໂດຍສານ ໃນອັດຕາ 10/100 (10%) ຂອງເຄື່ອງທີ່ມີມູນຄ່າ 400,000 ກີບຂຶ້ນໄປ.

         ວ່າດ້ວຍການຄ້າລະຫວ່າງປະເທດ ປະເທດໃດທີ່ມີການຄ້າດີກໍ່ຄືສົ່ງອອກດີ ດຸນການຄ້າກໍຈະສູງ ເຮັດໃຫ້ເງິນເຂົ້າປະເທດຫຼາຍກວ່າອອກ ກົງກັນຂ້າມ ຖ້າມູນຄ່າການສົ່ງອອກຂອງປະເທດນັ້ນໆໜ້ອຍກວ່າການນຳເຂົ້າ ປະເທດກໍ່ຈະຂາດດຸນການຄ້າ ເຊິ່ງປະເທດລາວກຳລັງຜະເຊີນໜ້າກັບປັນຫານີ້.

        ອະທິບາຍ ດຸນການຄ້າ ແມ່ນຫຍັງ ກໍຄື ຄົນໆໜຶ່ງ ໃນກະເປົ່າເງິນ ເຈົ້າຖ້າເງິນອອກຫຼາຍກວ່າເຂົ້າ ກະແປວ່າເຈົ້າບໍ່ມີລາຍຮັບເຂົ້າ ເງິນກໍບໍ່ມີ ແຕ່ຖ້າເຈົ້າເງິນເຂົ້າຫຼາຍກວ່າອອກ ເຈົ້າກໍມີເງິນໃນກະເປົ່າ ແຕ່ໃນທີ່ນີ້ເຮົາເວົ້າເຖິງປະເທດ 

ໂດຍສະເພາະການຄ້າລະຫວ່າງຊາຍແດນ ລາວ-ໄທ ທີ່ນັບມື້ນັບເຕີບໂຕຂຶ້ນ ແລະ ປະເທດໄທເອງໄດ້ປຽບດຸນການຄ້າລາວເຮົາ ເພາະກະຄືທີ່ຮູ້ຄົນລາວມັກໄປໃຊ້ເງິນຢູ່ພຸ້ນ ເຮັດໃຫ້ລັດຖະບານເສຍດຸນການຄ້າໃຫ້ກັບປະເທດໄທຫຼາຍຕື້ກີບທຸກໆປີ.

        ໂດຍສະເພາະຊາຍແດນ ວຽງຈັນ-ໜອງຄາຍ ທີ່ມື້ໜຶ່ງມີການເດີນທາງໄປມາລະຫວ່າງກັນເຖິງ 10,000-20,000 ຄົນແລະເພີ່ມຂຶ້ນ 10% ທຸກປີ ສະເພາະປີ 2014 ມູນຄ່າການຊື້ຂາຍສູງເຖິງ 1.3 ແສນລ້ານບາດ ແຕ່ການນຳເຂົ້າສິນຄ້າມາລາວສູງເຖິງ 6 ໝື່ນລ້ານບາດ ສົ່ງອອກມີພຽງ 3 ພັນລ້ານ ທີ່ເຫຼືອແມ່ນສິນຄ້າຜ່ານແດນເຂົ້າອອກອີກ 6 ໝື່ນລ້ານ ສ່ວນຫຼາຍກໍ່ເປັນນຳເຂົ້າມາຈາກໄທ.   ແປງ່າຍໆກໍຄື ປະເທດລາວເຮົາຕ້ອງເສຍດູນການຄ້າ 

       ສະນັ້ນການອອກມາດຕະຖານແບບນີ້ຂອງທ່ານ ຮອງນາຍົກ ດ້ານເສດຖະກິດ ກໍເພື່ອໃຫ້ເກີດສົມດຸນການຄ້າ ເມື່ອນຳເຂົ້າກໍ່ຕ້ອງເກັບພາສີ ເພື່ອໄປທົດແທນດຸນທີ່ເສຍໄປ ເຖິງຈະໜ້ອຍ ກໍ່ຍັງດີກວ່າບໍ່ເຮັດຫຍັງ

       ເພາະຕອນນີ້ເຮົາເປີດປະຊາຄົມອາຊຽນ ສິນຄ້າກວ່າພັນຊະນິດ ຖືກຍົກເວັ້ນພາສີໝົດ ລາຍໄດ້ຂອງພາກລັດສ່ວນນີ້ກໍ່ຫາຍໄປ.

         ເຖິງຢ່າງໃດທາງແກ້ນີ້ເປັນການແກ້ປາຍເຫດ ສຳຄັນທີ່ສຸດປະເທດລາວເຮົາຕ້ອງດຶງດູດການລົງທຶນ ໂຮງຈັກໂຮງງານຜະລິດສິນຄ້ານີ້ເຂົ້າມາ ເພື່ອມາຜະລິດສິນຄ້າໃນປະເທດ ແບບທີ່ຫວຽດນາມກຳລັງເຮັດ ມູນຄ່າ FDI ຫຼື ການລົງທຶນໂດຍກົງຂອງຫວຽດເຕີບໂຕສູງທີ່ສຸດໃນອາຊຽນ ເພາະຫວຽດນາມເຂົ້າຮ່ວມເປັນສະມາຊິກ TPP ຂອງອາເມຣິກາ 

         ຜົນດີຄື ຈະເຮັດໃຫ້ຄົນຫວຽດນາມ ບໍ່ຈຳເປັນຕ້ອງໄປຊື້ສິນຄ້າໃນຕ່າງປະເທດອີກຕໍ່ໄປ ເພາະມີຜະລິດໃນປະເທດໝົດ SAMSUNG, APPLE ໄປຕັ້ງໂຮງງານຢູ່ຫັນໝົດແລ້ວ ເພາະຫວຽດເອງກໍ່ປະສົບປັນຫາເສຍດູນການຄ້າຄືລາວ

        ການທີ່ປະເທດລາວຈະດຶງນັກລົງທຶນເຂົ້າມາໃນປະເທດ ສຳຄັນທີ່ສຸດຄືເລື່ອງ ຕົ້ນທຶນໃນການຜະລິດ ບໍ່ວ່າຈະເປັນພາສີ, ຄ່າໄຟຟ້າ, ໂຄງສ້າງພື້ນຖານທີ່ດີ ແລະ ທັນສະໄໝ, ແລະ ສຳຄັນທີ່ສຸດ ຊັບພະຍາການມະນຸດ ຫຼື ຄົນ ຕ້ອງເຂັ້ມແຂງ ແລະ ເກັ່ງ ເຮົາຕ້ອງພັດທະນາສິ່ງເຫຼົ່ານີ້ໃຫ້ດ່ວນທີ່ສຸດ ບໍ່ຊັ້ນ ເຂົາກໍ່ບໍ່ກ້າມາລົງທຶນ.

ແຫຼ່ງຂ່າວ: ນັກການເງິນ