ການສຶກສາຊີ້ ການດື່ມກາເຟ ເຮັດໃຫ້ອາຍຸຍືນຂຶ້ນ ອ່ານເບິ່ງບໍ່ເສຍຫາຍ !

 

ນັກວິໄຈລວບລວມຂໍ້ມູນຈາກຊາວອັງກິດປະມານ 500,000 ຄົນເປັນໄລຍະເວລາກວ່າ 10 ປີພົບວ່າຜູ້ທີ່ມັກດື່ມກາ​ເຟມີໂອກາດສ່ຽງຕໍ່ການເສຍຊີວິດຕໍ່າກວ່າເລັກນ້ອຍ ເມື່ອທຽບກັບຜູ້ທີ່ບໍ່ດື່ມກາ​ເຟ.

ຜົນຂອງກາ​ເຟຕໍ່ການມີອາຍຸຍືນຍາວຂຶ້ນນັ້ນ ພົບໃນຜູ້ດື່ມກາ​ເຟທັງແບບສໍາເລັດຮູບ ກາ​ເຟສົດ ຫຼື ກາ​ເຟທີ່ສະກັດສານຄາເຟອີນ.

ການສຶກສາຄັ້ງນີ້ ນັບວ່າເປັນການສຶກສາໃຫຍ່ອັນທໍາອິດທີ່ແນະນຳປະໂຫຍດຂອງການດື່ມກາ​ເຟແມ້ແຕ່ໃນຜູ້ທີ່ມີຄວາມບົກພ່ອງດ້ານພັນທຸກໍາທີ່ມີຜົນຕໍ່ການນໍາຄາເຟອີນໄປໃຊ້ໃນຮ່າງກາຍ.

ຈາກການເຝົ້າຕິດຕາມເບິ່ງຜູ້ຮ່ວມການສຶກສາວິໄຈເປັນໄລຍະເວລາ 10 ປີພົບວ່າໂດຍລວມແລ້ວຜູ້ດື່ມກາ​ເຟມີແນວໂນ້ມທີ່ຈະເສຍຊີວິດໜ້ອຍກວ່າຜູ້ທີ່ບໍ່ດື່ມກາ​ເຟ 10-15 ເປີເຊນ ແລະ ຜົນແຕກຕ່າງຈາກປະລິມານກາ​ເຟທີ່ດື່ມ ແລະ ຄວາມແຕກຕ່າງທາງພັນທຸກໍານັ້ນມີພຽງເລັກໜ້ອຍເທົ່ານັ້ນ.

ຢ່າງ​ໃດກໍຕາມທ່ານ Alice Lichtenstein ຜູ້ຊ່ຽວຊານດ້ານໂພຊະນາການແຫ່ງມະຫາວິທະຍາໄລ Tufts University ​ເຊິ່ງບໍ່ໄດ້ມີສ່ວນໃນການສຶກສາໃນຄັ້ງນີ້ກ່າວວ່າຜົນການສຶກສານີ້ບໍ່ສາມາດພິສູດໄດ້ວ່າ ກາ​ເຟຈະປຽບ​ເໝືອນຍາອາຍຸວັ​ດທະນະ ຫຼື ຄວນຈະເປັນສາເຫດໃຫ້ຄົນຫັນມາດື່ມກາ​ເຟກັນ ຫຼື ບໍ່ແຕ່ຜົນການສຶກສານີ້ກໍຊ່ວຍສະໜັບສະໜຸນການສຶກສາຄັ້ງກ່ອນ ແລະ ຍັງຊ່ວຍເພີ່ມຄວາມໝັ້ນໃຈໃຫ້ແກ່ຜູ້ທີ່ມັກດື່ມກາ​ເຟອີກດ້ວຍ.

ໂດຍຜົນການສຶກສາສະບັບນີ້ຕີພິມໃນວາລະສານ JAMA Internal Medicine.

ທ່ານ Erikka Loftfield ນັກວິໄຈທີ່ສະຖາບັນມະເຮັງແຫ່ງຊາດສະຫະລັດ ຜູ້ນໍາການວິໄຈຄັ້ງນີ້ກ່າວວ່າຍັງບໍ່ເປັນທີ່ແນ່ຊັດວ່າການດື່ມກາ​ເຟສົ່ງຜົນຕໍ່ການມີຊີວິດຍືນຍາວໄດ້ຢ່າງ​ໃດແຕ່ອາດເປັນເພາະກາ​ເຟປະກອບໄປດ້ວຍສານເຄມີຕ່າງໆກວ່າ 1,000 ຊະນິດ ລວມໄປເຖິງສານຕ້ານອະນຸມູນອິດສະລະ​ເຊິ່ງຊ່ວຍປົກປັກ​ຮັກສາເຊນຕ່າງໆບໍ່ໃຫ້ເກີດຄວາມເສຍຫາຍ.

ແລະ​ ວ່າການສຶກສາສະບັບອື່ນໆ ຊີ້ວ່າສານຕ່າງໆໃນກາແຟອາດຊ່ວຍລົດພາວະອັກເສບ ແລະ ຊ່ວຍໃຫ້ຮ່າງກາຍສາມາດນໍາອິນຊູລິນໄປໃຊ້ໄດ້ດີຍິ່ງຂຶ້ນ ​ເຊິ່ງຊ່ວຍລົດຄວາມສ່ຽງຕໍ່ການເປັນໂລກເບົາຫວານອີກດ້ວຍ.