ການພົບປະແລກປ່ຽນ ສອງສະມາຄົມນັກຂ່າວ ລາວ-ຈີນ

ໃນ​ວັນ​ທີ 14 ກັນຍາ 2015 ນີ້ ທີ່ສະມາຄົມ​ນັກ​ຂ່າວ ​ແຫ່ງ ປະ​ເທ​ດລາວ ​ໄດ້​ມີ​ການ​ພົບ​ປະ​ແລກປ່ຽນ ລະ​ຫວ່າງສະມາຄົມ​ນັກ​ຂ່າວ​ ແຫ່ງ ​ສປປ ລາວ ​ແລະ ສະມາຄົມ​ນັກ​ຂ່າວ ​ແຫ່ງ ສປ ຈີ​ນ ນຳ​ໂດຍ​ທ່ານWang Jun Ben ຮອງ​ຫົວໜ້າບັນນາທິການ​ກຸ່ມ​ໜັງສືພິມ​ລາຍ​ວັນ​ ເຫີ​ໜານ, ​​ໃຫ້​ກຽດ​ຕ້ອນຮັບ ​ໂດຍ ​ທ່ານ ສູນ​ທອນ ຄັນທະ​ວົງ ຜູ້ອຳນວຍການ​ສຳນັກ​ຂ່າວສານ​ປະ​ເທດລາວ, ຮອງ​ຫົວໜ້າສະມາຄົມ​ນັກ​ຂ່າວ​ ແຫ່ງ ສປປ ລາວ   ພ້ອມ​​ຄະນະ​ເຂົ້າ​ຮ່ວມ.​ໃນການ​ພົບ​ປະ​ຄັ້ງ​ນີ້ ທັງ​ສອງ​ຝ່າຍ​ໄດ້​ແຈ້ງ​ສະພາບ​ການ ​ແລະ ຜົນສຳ​​ເລັດ​ໃນ​ການ​​ຮ່ວມ​ມື​​ໃຫ້ກັນຊາບ, ເພີ່ມ​ການ​ໂຄສະນາ​ຮ່ວມ​ກັນໃຫ້​ຫລາຍ​ຂຶ້ນ​ພ້ອມ​​ວາງທິດ​ທາງ​ແຜນການ​ຮ່ວມມື​​ໃນ​ຕໍ່ໜ້າ ​ໂດຍ​ສະ​ເພາະ​ ການ​ແລກປ່ຽນຂໍ້​ມູນ​ຂ່າວສານ, ການ​ບຳລຸງສ້າງ​​ບຸກຄະ​ລາກ​ອນ ​ແລະ ​ເພ່ີມ​ທະວີການ​ໂຄສະນາ​​ໃຫ້​ແກ່​ການ​ພົວພັນຮ່ວມ​ມື ລະຫວ່າງ ປະຊາຊົນ​ສອງ​ຊາດ​ລາວ-ຈີນ ​ເວົ້າ​ລວມ, ​ເວົ້າ​ສະ​ເພາະ ​ແມ່ນ ສອງສະມາຄົມ​ນັກ​ຂ່າວ ​ແຫ່ງ ສປປ ລາວ ​ແລະ ສປຈີນ ​ໃຫ້​ແໜ້ນ​ແຟ້ນຍິ່ງ​ຂຶ້ນ.ການພົບ​ປະ​ຄັ້ງ​ນີ້ ເປັນ​ການ​ປະກອບສ່ວນ​ສຳຄັນ​ເຂົ້າ​ໃນ​ການ​ເພີ່ມ​ທະວີ​ ການ​ຮ່ວມ​ມື ລະຫວ່າງ ສອງ​ປະ​ເທດ​ລາວ-ຈີນ ​ທີ່​ມີ​ມາ​ແຕ່​ດົນ​ນານ​ນັ້ນ ​ໃຫ້​ແຕກ​ດອກ​ອອກຜົນ​ງອກ​ງາມ​ຍິ່ງໆຂຶ້ນ.

ທີ່ມາ kpl.gov.la