ການພັດທະນາຕົວເມືອງ ຕ້ອງໄປຕາມແຜນຜັງຊີ້ນຳລວມ ເພື່ອຄວາມສົມດຸນລະຫວ່າງເຂດແຄວ້ນ

ກອງ​ປະຊຸມ​ກ່ຽວ​ກັບ​ການ​ຄຸ້ມຄອງ​ການ​ປຸກ​ສ້າງ ຢູ່​ນະຄອນຫຼວງ​ວຽງ​ຈັນ (ນວ) ແລະ ການສະເຫຼີມສະຫຼອງ​ວັນ​ເຄຫາ​ສະຖານ​ໂລກ ຄົບຮອບ 30 ປີ ຈັດ​ຂຶ້ນວັນ​ທີ 2 ຕຸລາ 2015 ທີ່​ສູນ​ການຄ້າ​ລາວ-ໄອ​ເຕັກ ໂດຍ​ມີ​ທ່ານ ​ດຣ. ສິນ​ລະ​ວົງ ຄຸດ​ໄພທູນ ເຈົ້າຄອງ​ນະຄອນຫຼວງ​ວຽງ​ຈັນ ທ່ານນາງ ວິໄລ​ຄຳ ໂພ​ສາ​ລາດ ລັດ​ຖະມົນຕີ​ຊ່ວຍ​ວ່າການ​ກະຊວງ​ໂຍທາທິ​ການ ແລະ ຂົນສົ່ງ ມີ​ບັນດາທ່ານ​ຮອງ​ເຈົ້າ​ຄອງ ນວ ຮອງ​ເຈົ້າແຂວງ ຫົວໜ້າ​ຫ້ອງການ ກົມ ສະ​ຖາ​ບັນ ພະ​ແນກ ເຈົ້າເມືອງ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ທ່ານ ແກ້ວ​ພິລາ​ວັນ ອາ​ໄພລາດ ຮອງ​ເຈົ້າ​ຄອງ ນວ ກ່າວວ່າ: ກອງ​ປະຊຸມ​ໃຫຍ່ ຄັ້ງ​ທີ VI ຂອງ​ອົງຄະ​ນະ​ພັກ ນວ ໄດ້​ກຳນົດ ແລະ ຮັບຮອງ​ແຜນ​ຍຸດ​ທະ​ສາດການ​ພັດທະນາ​ສ້າງ ນວ ຕາມທິດ​ໃຫ້​ເປັນ​ເມືອງ​ໜ້າ​ຢູ່ (6ສ) ຂະຫຍາຍ​ຕົວ​ສົມສ່ວນ ແລະ ຍືນຍົງ ໂດຍ​ຢຶດ​ຖື​ການ​ພັດທະນາຕາມ​ແຜນຜັງ​ກວມ​ລວມ ແຜນຜັງພັດທະນາ​ຕາມ​ແຕ່​ລະ​ຕົວ​ເມືອງ ແລະ ແຜນຜັງ​ສະເພາະ​ແຕ່​ລະເຂດ ແຕ່​ລະ​ຖະໜົນ ຍົກ​ລະດັບພື້ນຖານ​ໂຄງ​ລ່າງ​ຂອງ​ເຂດ​ເມືອງເກົ່າ (ຄຸ້ມ​ຄອງ​ເມືອງເກົ່າ) ໃຫ້​ພໍເໝາະ ແລະ ກາຍເປັນ​ເມືອງທ່ອງ​ທ່ຽວ ເຂດ​ບໍລິການ ສູນ​ການຄ້າຂະໜາດ​ກາງ ແລະ ຂະໜາດ​ນ້ອຍ ເປັນ​ບ່ອນ​ຕັ້ງ​ສຳນັກງານ-ອົງການ ສະ​ຖາ​ບັນ​ສັງຄົມ ສ້າງ​ເຂດ​ຊານເມືອງ ຕ້ອງ​ໃຫ້ກາຍເປັນ​ເທສະ​ບານ ຫຼື ເມືອງນ້ອຍ ທີ່​ມີ​ທຳ​ມະ​ຊາດ​ແວດ​ລ້ອມທີ່​ດີ ບັນລຸ​ມາດຖານ (ສ ສີຂຽວ) ເປັນ​ຊົນນະບົດ​ໃໝ່​ສີວິໄລ ສ້າງເຂດ​ພັດທະນາ​ເຂດ​ບຶງ​ທາດຫຼວງ ເປັນ​ຄຸ້ມ​ເມືອງ​ທັນ​ສະໄໝ ເຂດອຸດສາຫະກຳ​ໄຊ​ເຊດ​ຖາ ທັງ​ເປັນສວນ ແລະ ເປັນ​ເຂດ​ອຸດ​ສາ​ຫະກຳ​ໜັກ ເຂດ​ນິຄົມ​ໂຄກ​ສະອາດ ເປັນ​ເຂດ​ອຸດສາຫະກຳ​ເບົາ ເຂດກະສິກຳ​ສົ່ງ​ອອກ ແລະ ເຂດ​ການຄ້າ​ສາກົນ ເຂດ​ດົງ​ໂພ​ສີ​ເປັນ​ເຂດການ​ສຶກ​ສາ ເຂດ​ສະໜາມ​ກີລາຊີເກມ ເປັນ​ເຂດ​ກີລາ ແລະ ສວນວັດທະນະທຳ ແລະ ອື່ນໆ.

ເພື່ອ​ຜັນ​ຂະຫຍາຍ​ເນື້ອ​ໃນ​ຄຳຂວັນ ວັນ​ເຄຫາ​ສະຖານ​ໂລກ ຄົບຮອບ 30 ປີ ໃນ​ຫົວຂໍ້ສະຖານທີ່ສາທາລະນະ​ເປັນ​ຂອງ​ທຸກ​ຄົນ ເຮັດ​ແນວໃດ​ໃຫ້​ກາຍເປັນ​ຮູບ​ປະທຳ ຂ້າພະເຈົ້າ​ຂໍ​ຮຽກຮ້ອງ​ມາ​ຍັງທຸກ​ພາກສ່ວນ​ເສດຖະກິດ ອົງການ​ປົກຄອງ​ທຸກ​ຂັ້ນ​ທີ່​ກ່ຽວຂ້ອງ ຈົ່ງ​ໄດ້​ເອົາໃຈໃສ່​ຜັນ​ຂະຫຍາຍ ແລະ ຈັດ​ຕັ້ງ​ປະຕິບັດຕາມ​ມະຕິກອງ​ປະຊຸມ​ໃຫຍ່ ​ຄັ້ງ​ທີ VI ຂອງອົງຄະ​ນະ​ພັກ ນວ ກ່ຽວ​ກັບ​ການພັດທະນາ​ຕົວ​ເມືອງ​ແບບ​ຍືນ​ຍົງ ໃຫ້​ກາຍເປັນ​ພຶດຕິ​ກຳ​ຕົວ​ຈິງ ໂດຍສະເພາະ ຂະແໜງການ​ກ່ຽວຂ້ອງ​ຫຼັກ ຕ້ອງ​ໄດ້​ເອົາໃຈໃສ່​ໃນການ​ແກ້​ໄຂ​ບັນຫາ​ສິ່ງ​ທ້າ​ທາຍຕ່າງໆ​ໃນ​ຕົວ​ເມືອງ ເຊັ່ນ: ການແກ້​ໄຂ​ບັນຫາ​ສິ່ງ​ປຸກ​ສ້າງ ການຂຸດ​ດິນ ຖົມ​ດິນ ບັນຫາ​ການ​ຈະລາ​ຈອນ ບັນຫາ​ຂົນສົ່ງ ບັນຫາການ​ລະບາຍ​ນ້ຳ ການ​ປ້ອງ​ກັນໄພ​ນ້ຳ​ຖ້ວມ ບັນຫາ​ສິ່ງ​ເສດ​ເຫຼືອ ການ​ເກັບ​ມ້ຽນ​ຂີ້​ເຫຍື້ອ ບັນຫາສິ່ງແວດລ້ອມ​ຕົວ​ເມືອງ ແລະ ອື່ນໆ.

ທີ່ມາ vientianemai