ການປະພັນວັນນະຄະດີກັບການພິມຈໍາໜ່າຍ ເພື່ອຜູ້ອ່ານໃນຍຸກໃໝ່

ວັນທີ 14 ສິງຫານີ້, ທີ່ສູນການຄ້າລາວໄອເຕັກ ນະຄອນຫຼວງວຽງຈັນ, ກະຊວງ ຖວທ ໄດ້ຈັດກອງປະຊຸມສໍາມະນາ ຫົວຂໍ້: “ ການປະພັນວັນນະຄະດີກັບການພິມຈໍາໜ່າຍ ເພື່ອຜູ້ອ່ານໃນຍຸກໃໝ່ ”. ໂດຍການເປັນປະທານ ທ່ານ ສະຫວັນຄອນ ຣາຊມົນຕຣີ ລັດຖະມົນຕີຊ່ວຍວ່າການກະຊວງ ຖວທ ມີບັນດານັກຂຽນ, ນັກຂ່າວ ແລະ ບັນດາຜູ້ສໍາມະນາກອນ, ນັກວິທະຍາກອນຕາງໜ້າຈາກພາກລັດ ແລະ ເອກະຊົນເຂົ້າຮ່ວມ.
ທ່ານ ສະຫວັນຄອນ ຣາຊມົນຕຣີ ກ່າວວ່າ: ການປະຊຸມຄັ້ງນີ້, ພວກອ້າຍເອື້ອຍນ້ອງຊື່ງລ້ວນແຕ່ແມ່ນພະນັງານ, ຄູອາຈານ, ນັກຄົ້ນຄວ້າ, ນັກວິຈານ, ນັກປະພັນ, ນັກກະວີ ທີ່ເປັນຜູ້ເຮັດຕົວຈິງ ແລະ ມີບົດຮຽນປະສົບການໃນວຽກງານ ແລະ ວິຊາການຄົງຈະຄົ້ນຄວ້າເຫັນບັນຫາ ແລະ ວິທີແກ້ໄຂ, ທາງອອກທີ່ພໍເປັນໄປໄດ້ໃນປັດຈຸບັນ ເພື່ອເຮັດໜ້າທີ່ວຽກງານການປະພັນ, ການພິມຈໍາໜ່າຍ ແລະ ການສົ່ງເສີມການອ່ານ ຂອງພວກເຮົາໄດ້ຮັບການພັດທະນາກ້າວໜ້າຄູູ່ກັບວຽກງານດັ່ງກ່າວຂອງປະເທດໄກ້ຄຽງ ແລະ ສາກົນ. ປະຕິບັດໜ້າທີ່ສຶກສາອົບຮົມມະຫາຊົນແນວທາງນະໂຍບາຍຂອງພັກ, ແຜນພັດທະນາເສດຖະກິດສັງຄົມຂອງຊາດເຮົາ.
ຫຼັງຈາກນັ້ນ, ນັກວິທະຍາກອນ ແລະ ນັກສໍາມະນາກອນທີ່ເຂົ້າຮ່ວມກໍໄດ້ປະກອບຄໍາຄິດຄໍາເຫັນ ແລກປ່ຽນບົດຮຽນເພື່ອເປັນຄວາມຮູ້ ຄວາມສາມາດ ຄວາມຄິດ ຄວາມເຫັນອັນເປັນປະໂຫຍດ ແລະ ໃຫ້ມີຄວາມຮັບຜິດຊອບສູງ. ໂດຍສະເພາະການປະພັນວັນນະຄະດີກັບການພິມຈໍາໜ່າຍ ເພື່ອຜູ້ອ່ານໃນຍຸກໃໝ່. ຕອນບ່າຍຂອງມື້ດຽວກັນ, ຍັງຈະມີກອງປະຊຸມສໍາມະນາຫົວຂໍ້: “ ພາສາລາວໃນການໂຄສະນາ ”

ທີ່ມາ CRI-FM93