ການດື່ມ​ເບຍ​ບໍ່​ກ່ຽວ​ກັບ​ຄວາມ​ຕຸ້ຍ ແລະ ທ້ອງ​ໃຫຍ່

ນັກ​ວິ­ໄຈ​ຈາກ​ປະ­ເທດ​ອັງ­ກິດ ແລະ ສາ​ທາລະ­ນະ​ລັດ​ເຊັກ ເກີດ​ນຶກ​ສົງ­ໄສ​ໃນ​ການ​ທີ່​ວ່າ​ດື່ມ​ເບຍ ແລ້ວ​ພາ­ໃຫ້​ຕຸ້ຍພວກ​ເຂົາ​ຈິ່ງ​ໄດ້​ເຮັດ​ການ​ສຳ​ຫຼວດ ປະ­ຊາ­ຊົນ​ຊາວ​ເຊັກ​ເກືອບ 2.000 ຄົນ ຊຶ່ງ​ເປັນ​ທີ່​ຮູ້​ກັນ​ດີ​ວ່າ​ຊາວ​ເຊັກ​ເປັນ​ນັກ​ດື່ມ​ເບຍ​ມື​ໜຶ່ງ ເພາະ​ປະລິ​ມານ​ການ​ດື່ມ​ເບຍ​ຂອງ​ພວກ​ເຂົາ​ຕໍ່​ຄົນ​ນັ້ນ​ຫຼາຍກວ່າ​ຊາດ​ອື່ນໆ ຫຼັງ​ຈາກ​ນັ້ນ ຄະ­ນະ​ນັກ​ວິ­ໄຈ​ກໍ​ພົບວ່າ: ການ​ມີ​ທ້ອງ​ໃຫຍ່​ກັບ​ການ​ດື່ມ​ເບຍ​ໃນ​ປະ­ລິ­ມານທີ່​ຫຼາຍ​ແມ່ນ​ບໍ່​ມີ​ຄວາມ​ກ່ຽວ­ຂ້ອງ​ກັນ​ເລີຍ

ດັ່ງ­ນັ້ນ ການ​ບອກ​ວ່າ​ຄົນ​ເຮົາ​ຕຸ້ຍ​ເພາະ​ການ​ດື່ມ​ເບຍ​ຈິ່ງ​ເປັນການ​ບໍ່​ຖືກ­ຕ້ອງ ທັງ​ນີ້ ດຣ. ມາຣ໌ຕິນ ໂບ​ບັກ ຈາກ (University College London) ແລະ ຄະ­ນະວິ­ໄຈ​ຈາກ (Institute of Clinical and Experimental Medicine) ໃນ​ນະ­ຄອນ­ຫຼວງປຣາກ ໄດ້​ໃຫ້​ແມ່­ຍິງ 1.098 ຄົນ ແລະ ຊາຍ 891 ຄົນ ມີ​ອາ­ຍຸ​ລະ­ຫວ່າງ 25 ເຖິງ 64 ປີ ເຮັດ​ແບບ​ທົດ​ສອບ ຊຶ່ງ​ເປັນ​ສ່ວນ​ໜຶ່ງ​ຂອງ​ການ​ສຶກ​ສາ ໂດຍ​ບໍ່​ມີ​ການ ກ່າວ​ເຖິງ​ເຄື່ອງ​ດື່ມ​ອື່ນໆ​ທັງ​ໝົດ.


ຈາກ​ການ​ສຳ​ຫຼວດ​ພົບ​ວ່າ: ຊາຍ​ຊາວ​ເຊັກຈະດື່ມ​ເບຍ​ໂດຍ​ສະ­ເລ່ຍ​ປະ­ມານ 3,1 ລິດ​ຕໍ່​ອາ­ທິດ ຂະນະ​ທີ່ແມ່­ຍິງ​ຈະ​ດື່ມ 0,3 ລິດ​ຕໍ່​ອາ­ທິດ ໂດຍ​ໃນ​ຈຳນວນ​ນີ້​ມີ​ຊາຍ​ຢູ່ 3 ຄົນ​ທີ່​ດື່ມ​ເບຍ​ຢ່າງ​ໜັກ ຄື​ດື່ມ ປະ­ມານ 14 ລິດ​ຕໍ່​ອາ­ທິດ ແລະ ມີ​ແມ່­ຍິງ​ພຽງ 5 ຄົນ​ທີ່​ດື່ມ​ເຖິງ 7 ລິດ​ຕໍ່​ອາ­ທິດ ໂດຍ​ກ່ອນແລະຫຼັງດື່ມ​ເບຍ​ຄະ­ນະ​ວິ­ໄຈ​ໄດ້​ໃຫ້​ແພດ​ວັດ­ແທກ​ແອວ, ສະໂພກ​ກົ້ນ, ຊັ່ງ​ນ້ຳ­ໜັກ ແລະ ບັນ­ທຶກ​ດັດ­ຊະ­ນີ​ລວມ ຂອງ​ອາ­ສາ​ສະ­ໝັກ​ເອົາ​ໄວ້ ຫຼັງ​ຈາກ​ນັ້ນ ຄະ­ນະວິ­ໄຈ​ກໍ​ພົບ​ວ່າ: ການ​ມີ​ທ້ອງ​ໃຫຍ່​ບໍ່​ກ່ຽວ­ຂ້ອງ​ກັບ​ການ​ດື່ມ ເບຍ​ໂດຍ​ກ່າວ​ວ່າ­ການ​ຄົ້ນ​ພົບ​ຄັ້ງ​ນີ້​ຊີ້​ໃຫ້​ເຫັນ​ວ່າ:     ການ​ກ່າວ​ອ້າງ​ວ່າ​ຄົນ​ຕຸ້ຍ ຫຼື ມີ​ທ້ອງ​ໃຫຍ່ ເພາະການ​ດື່ມ​ເບຍ​ຫຼາຍ​ເກີນ​ໄປ​ຈິ່ງ​ເປັນ​ສິ່ງ​ທີ່​ບໍ່​ຖືກ­ຕ້ອງ ເພາະ​ນັກ​ວິ­ໄຈ​ຈາກ ອິ​ຕາ​ລີ ກໍ​ຊີ້​ແຈງ​ຄື​ກັນ​ວ່າ ຜູ້​ຊາຍທຸກ​ຄົນ​ມີ​ທ່າ​ອຽງ​ທີ່​ຈະ​ຕຸ້ຍ​ໄດ້​ຕາມ​ການ​ປ່ຽນ­ແປງຂອງ​ຢີນ​ໃນ​ ແຕ່­ລະ­ຄົນ.