ກະແສມາແຮງ! ເລື່ອງ "ລົດດັບເພີງ" ຍັງບໍ່ຈົບ!!

     

ປະ​ເດັນ​ທີ່​ສະ​ຖາ​ບັນ​ການ​ເງິນ​ແຫ່ງໜຶ່ງ​ໄດ້​ໃຊ້​ລົດ​ດັບ​ເພີງ ​ເຂົ້າ​ໃນ​ການສະ​ເຫຼີມສະຫຼອງບຸນປີ​ໃໝ່ລາວ​ຂອງ​ໂຮງຮຽນ ​ເຊິ່ງ​ໃນ​ນັ້ນກໍ​ເຮັດ​ໃຫ້​ເລື່ອງ​ເລັກ​ນ້ອຍ​ຈົນ​ກາຍ​ເປັນ​ເລື່ອງ​ໃຫຍ່​ຂ້າມ​ໄປ​ເຖິງ​ຕ່າງ​ແດນ ອອກ​ຂ່າວ​ຊ່ອງ 7 (ປະ​ເທດ​ໄທ) ​ແລະ ​ເພ​ຈ໌ດັງ​ຕ່າງໆ ທີ່​ເຂົ້າມາ​ໃຫ້​ຄວາມ​ສົນ​ໃຈ​ໃນ​ປະ​ເດັນ​ດັ່ງກ່າວ.

ຫຼັງຈາກ​ນັ້ນ ກໍ​ມີຫຼາຍຄົນ​ອອກ​ມາສະ​ແດງ​ຄວາມ​ຄິດ​ເຫັນ​ຕ່າງໆນາໆ​ໃນ​ເພ​ຈ໌ດັງ​ຄື ​ໂທລະ​ໂຄ່ງ ​ເຊິ່ງບາງ​ຄົນ​ກໍ​ວ່າ​ພຶດຕິ​ກໍາ​ດັ່ງກ່າວ​ເປັນ​ພຶດຕິ​ກຳ​ທີ່​ບໍ່​ເໝາະສົມ​ຜິດ​ລະບຽບ, ບາງ​ຄົນ​ກໍ​ບອກ​ວ່າ​ເປັນ​ພຽງຄວາມ​ສັງ​ສັນ​ມ່ວນ​ຊື່ນ ປີໜຶ່ງມີ​ເທື່ອ​ດຽວກໍ​ຢາກ​ໃຫ້​ມ່ວນ​ຢ່າງ​ເຕັມທີ່, ບາງ​ຄົນ​ກໍ​ວ່າ​ລົດ​ດັບ​ເພີງ​ເປັນ​ລົດ​ທີ່​ໃຊ້​ສະ​ເພາະ​ກິດ ​ເປັນ​ຫຍັງ​ຈຶ່ງ​ມາ​ນໍາ​ໃຊ້​ໃນ​ຮູບ​ແບບ​ນີ້, ອີກ​ຫຼາຍຄວາມ​ຄິດ​ຄວາມ​ເຫັນ​ທີ່ ​ເຫັນ​ວ່າ​ເປັນ​ເລື່ອງ​ທໍາ​ມະ​ດາ ​ແລະ ອີກຫຼາຍຄວາມ​ເຫັນ​ກໍ​ບອກ​ວ່າ​ເປັນ​ເລື່ອງ​ທີ່​ບໍ່ສົມຄວນຢ່າງ​ຍິ່ງ. ດັ່ງນັ້ນ, ຈຶ່ງ​ເຮັດ​ໃຫ້​​ເລື່ອງ​ດັ່ງກ່າວ​ເປັນ​ປະ​ເດັນ​ສໍາຄັນ​ຂຶ້ນ​ໃນ​ຊ່ວງ​ນີ້ ​ເພາະ​ຊ່ວງ​ນີ້​ເປັນ​ຊ່ວງ​ທີ່​ກໍ​າລັງ​ຫ້າງ​ຫາ​ກະກຽມຫຼິ້ນບຸນ​ສົງການ​ປີ​ໃໝ່ລາວ ​ເຊິ່ງ​ແນ່ນອນ​ວ່າ​ໃນ​ຕອນ​ນີ້ ຫຼາຍອົງ​ກອນ ຫຼື ບໍລິສັດ​ໃຫຍ່​ທີ່​ຈະຈັດ​ງານ​ຂຶ້ນ ​ໃນ​ປີນີ້ມີ​ຄວາມ​ຕ້ອງການ​ທາງ​ດ້ານ​ເລື່ອງ​ນໍ້າຫຼາຍສົມຄວນ, ​ເນື່ອງ​ຈາກ​ອາກາດ​ຮ້ອນ​ຢ່າງ​ຮ້າຍ​ແຮງ ​ຈຶ່ງ​ເຮັດ​ໃຫ້​ມີ​ການ​ໃຊ້​ລົດ​ດັບ​ເພີງ​ຊ່ວຍ​ໃນ​ການ​ສີດ​ພົ່ນ​ນໍ້າ ​ເພື່ອ​ເປັນ​ການບັນ​ເທົາ​ຄວາມ​ຮ້ອນ​ດັ່ງກ່າວ.

ຖ້າ​ຫາກ​ວ່າ​ເລື່ອງ​ມັນ​ເປັນ​ໄປ​ໃນ​ລັກ​ສະ​ນະ​ນີ້​ ​ໃນ​ປີ​ໃໝ່ສົງການຈະ​ຕ້ອງ​ມີ​ຜູ້​ຄົນຫຼິ້ນນໍາ​ຢ່າງຫຼວງຫຼາຍ ​ແລະ ກໍ​ຢາກ​ໄດ້​ລົດ​ດັບ​ເພີງ​ໄປ​ຮັບ​ໃຊ້​ຢ່າງ​ແນ່ນອນ ​ແຕ່​ບັນຫາ​ມັນ​ມີ​ຢູ່​ບ່ອນ​ວ່າ​ເຮົາ​ຈະ​ມີ​ລົດ​ພຽງພໍ​ບໍ? ໜ່ວຍງານ​ຮັບຜິດຊອບກໍຈະ​ຕ້ອງ​ໄດ້​​ເພີ່ມ​ຈໍາ​ນວນ​ລົດ​ດັບ​ເພີງຫຼາຍຂຶ້ນ​ ​ເພື່ອ​ເອົາ​ໄວ້​ຮອງ​ຮັບ​ຄວາມ​ຮຽກຮ້ອງ​ຕ້ອງການ​ຂອງ​ປະຊາຊົນໃນ​ການສະຫຼອງປີ​ໃໝ່ລາວ​ ​ແລ້ວ​ບັນຫາ​ນີ້​ເຮົາ​ຈະ​ແກ້​ແນວ​ໃດ ຫຼື ​ເຮົາ​ຄວນ​ພິຈາລະນາ​ແນວ​ໃດ​ຕື່ມ. ​​ໃນ​ກໍລະນີ​ທີ່​ໃນ​ຊ່ວງ​ດັ່ງກ່າວ​ມີ​ການ​ໃຊ້​ລົດ​ດັບ​ເພີງ​ເປັນ​ຈໍານວນຫຼວງຫຼາຍ ​ແລ້ວ​ຖ້າ​ຫາກ​ເກີດ​ອັກຄີ​ໄພ​ຂຶ້ນ​ແລ້ວ​ໄປ​ມອດ​ໄຟ​ບໍ່ທັນ ​ເລື່ອງ​ນີ້ຜິດ​ບໍ? ຫຼື ຖ້າ​ຈະ​​ເອົາ​ລົດ​ດັບ​ເພີງ​ຄັນໜຶ່ງອອກ​ໄປ​ໃຊ້​ແຕ່ລະຄັ້ງ​ເຮົາ​ຕ້ອງ​ຜ່ານ​ໃຜ​ແດ່ ຫຼື ​ໃຜ​ອະນຸຍາ​ດກ່ອນ​ທີ່​ຈະ​ເອົາ​ໄປ​ໄດ້? ນີ້​ອາດ​ຈະ​ເປັນ​ຄໍາ​ຖາມ​ທີ່ຫຼາຍຄົນ​ໃຫ້​ຄວາມ​ສົນ​ໃຈ​ໃນ​ຕອນ​ນີ້ ສ່ວນ​ຄວາມ​ຄິດ​ເຫັນ​ເພີ່ມ​ຕື່ມ​ສາມາດ​ອ່ານ​ເບິ່ງໄດ້​ດັ່ງ​ລຸ່ມ​ນີ້​:

      ກັບ​ເຫດການ​ທີ່​ເກີດ​ຂຶ້ນດັ່ງກ່າວ​ພວກ​ເຮົາ​ບໍ່ສາມາດ​ທີ່​ຈະ​ສະຫຼຸບ​ໄດ້​ວ່າ: ຜູ້​ໃດ​ຖືກ ຫຼື ຜູ້​ໃດ​ຜິດ ​ເພາະ​ຕາມ​ແຕ່ລະ​ຄົນ​ທີ່​ເວົ້າມາ​ທຸກ​ຄົນ​ຕ່າງ​ກໍ​ມີ​ເຫດຜົນ​ຂອງ​ໃຜລາວ ຖ້າ​ເຮົາ​ຍັງມົວ​ແຕ່​ຖຽງກັນ​ຢູ່​ເລື່ອງ​ມັນ​ກໍ​ຈະ​ບໍ່ສິ້ນສຸດ​ຈັກ​ເທື່ອ​ທາງ​ທີ່​ດີ​ຄວນ​ປຶກສາ​ຫາລື​ຫາ​ທາງ​ອອກ​ຊ່ວຍ​ກັນ ​ເພາະ​ເຖິງ​ແນວ​ໃດ​ມັນ​ກໍ​​ເກີດ​ຂຶ້ນ​ແລ້ວ ຄົນ​ລາວ​ນໍາ​ກັນຄວນ​ທີ່​ຈະ​​ຮັກ​ແພງ​ກັນ​ດີກ​ວ່າ​ຈະ​ມາ​ຊັງ​ກັນ​ເອງ.​ ສຸດ​ທ້າ​ຍນີ້​ກໍ​ຂໍ​ອວຍພອນ​ໄຊ​ໃຫ້​ທຸກ​ທ່ານຫຼິ້ນປີ​ໃໝ່ຢ່າງ​ມີ​ຄວາມສຸກ ລະມັດລະວັງ​ການ​ໄປ​ການ​ມາ ​ແລະ ທີ່​ສໍາຄັນ​ເມົາ​ຫ້າມ​ຂັບ ດ້ວຍ​ຄວາມ​ປາຖະໜາດີ​ຈາກ​ທີ​ມງານ​ Kidork.com