ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຈັດພິທີມອບ-ຮັບ ຕຶກສໍານັກງານຫຼັງໃໝ່ ຂອງກະຊວງ

    ໂຄງການກໍ່ສ້າງຕຶກສໍານັກງານກະຊວງຊັບພະຍາກອນທໍາມະຊາດ ແລະ ສິ່ງແວດ ລ້ອມ ຫຼັງໃໝ່ ເຊິ່ງຕັ້ງຢູ່ແຄມຖະໜົນ ຕັດໃໝ່ ດົງນາໂຊກ-ໜອງບຶກ ເມືອງສີໂຄດຕະບອງ ນະຄອນຫຼວງວຽງຈັນ ໂດຍແມ່ນບໍລິສັດລັດວົງໄທ ກໍ່ສ້າງສ້ອມແປງ ເຄຫາສະຖານ ຈໍາກັດຜູ້ດຽວເປັນຜູ້ລົງທຶນກ່ອນ 100% ໃນກໍານົດເວລາ 2 ປີ ມີມູນຄ່າການກໍ່ສ້າງທັງໝົດຫຼາຍກວ່າ 169 ຕື້ກີບ ເຊິ່ງໄດ້ເລີ່ມລົງມືກໍ່ສ້າງມາແຕ່ເດືອນມິຖຸນາ 2013 ມາຮອດປັດຈຸບັນໄດ້ສໍາເລັດ 100% ຈິ່ງນໍາສູ່ວາລະພິທີມອບ-ຮັບ ແລະ ໄຂນໍາໃຊ້ຢ່າງເປັນການ ເປັນທີ່ຮຽບຮ້ອຍແລ້ວໃນຕອນເຊົ້າວັນເສົາ ວັນທີ 19 ກັນຍາ 2015 ທີ່ຜ່ານມາ.

    ເຂົ້າຮ່ວມໃນພິທີມອບ-ຮັບ ຕຶກອາຄານສໍານັກງານ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຫຼັງໃໝ່ ມີທ່ານ ນູລິນ ສິນບັນດິດ ລັດຖະມົນຕີວ່າການ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ທ່ານ ດຣ.ລຽນ ທິແກ້ວ ລັດຖະມົນຕີວ່າການກະຊວງການເງິນ ມີບັນດາລັດຖະມົນຕີຊ່ອຍວ່າການກະຊວງແຜນ ການ ແລະ ການລົງທຶນ ກະຊວງພາຍໃນ ກະຊວງວິທະຍາສາດ ແລະ ເຕັກໂນໂລຊີ ບັນດາຫົວໜ້າ-ຮອງຫົວໜ້າກົມ ພະແນກການທີ່ກ່ຽວຂ້ອງ ຜູ້ຕາງໜ້າບໍລິສັດລັດວົງໄທ ກໍ່ ສ້າງສ້ອມແປງເຄຫາສະຖານ ຈໍາກັດຜູ້ດຽວ ແລະ ພະນັກງານ ລັດຖະກອນເຂົ້າຮ່ວມ.

    ທ່ານ ສີສະຫວັດ ວິທະໄຊ ລັດຖະມົນຕີຊ່ອຍວ່າການ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ທັງເປັນຫົວ ໜ້າໂຄງການກໍ່ສ້າງຕຶກສໍານັກງານກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຫຼັງໃໝ່ ໄດ້ກ່າວລາຍງານໃນພິ ທີຄັ້ງນີ້ວ່າ ໂຄງການກໍ່ສ້າງຕຶກສໍານັກງານກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຫຼັງໃໝ່ນີ້ ເລີ່ມຕົ້ນສໍາ ຫຼວດອອກແບບໂດຍບໍລິສັດສະຫງ່າອອກແບບ ແລະ ທີ່ປຶກສາການກໍ່ສ້າງ ມາແຕ່ຕົ້ນປີ 2012 ທີ່ມີການລາຍງານຂໍທິດຊີ້ນໍາ ແລະ ເຫັນດີໃຫ້ດໍາເນີນການກໍ່ສ້າງຈາກທ່ານນາຍົກລັດຖະມົນຕີ ຕາມແຈ້ງການຂອງຫ້ອງວ່າການລັດຖະບານ ເຊິ່ງບໍລິສັດ ລັດວົງໄທ ກໍ່ສ້າງສ້ອມແປງເຄຫາສະຖານ ຈໍາກັດຜູ້ດຽວ ເປັນຜູ້ລົງທຶນກ່ອນ ໃນກໍານົດເວລາ 2 ປີ ຫຼັງຈາກນັ້ນ ຈະຊໍາລະຄືນ ຄ່າກໍ່ສ້າງດ້ວຍເງິນງົບປະມານຂອງລັດຖະບານ ໃນໄລຍະ 5 ປີ ໂດຍໄດ້ລົງມືກໍ່ສ້າງໃນເດືອນມິຖຸນາ 2013 ແລະ ສໍາເລັດການ ກໍ່ສ້າງໃນເດືອນກໍລະກົດ 2015 ທີ່ຜ່ານມາ ການຈັດຕັ້ງປະຕິບັດໂຄງການດັ່ງກ່າວແມ່ນໄດ້ຍ້າຍສະຖານທີ່ກໍ່ສ້າງໃນເມື່ອກ່ອນ ຈະກໍ່ສ້າງຢູ່ບ້ານໂພນປ່າເປົ້າ,ເມືອງສີສັດຕະນາກ,ນະຄອນຫຼວງວຽງຈັນ ມາກໍ່ສ້າງຢູ່ແຄມຖະໜົນຕັດໃໝ່ ດົງນາ ໂຊກ-ໜອງບຶກ ເມືອງສີໂຄດຕະບອງ ນະຄອນຫຼວງວຽງຈັນ ຕາມການເຫັນດີຂອງຫ້ອງວ່າການລັດຖະບານ ເຊິ່ງການດໍາ ເນີນໂຄງການກໍ່ສ້າງແມ່ນມີບໍລິສັດທີ່ປຶກສາເປັນຜູ້ຕິດຕາມການກໍ່ສ້າງ ໂດຍກະຊວງຊັບພະຍາກອນທໍາມະຊາດ ແລະ ສິ່ງ ແວດລ້ອມ ເປັນຜູ້ຊີ້ນໍາໂຄູງການ ປະກອບດ້ວຍ 3 ສັນຍາກໍ່ສ້າງຄື (1) ສັນຍາກໍ່ສ້າງທີ່ເປັນສັນຍາແມ່ມີມູນຄ່າການກໍ່ສ້າງ 132 ຕື້ກວ່າກີບ (2) ສັນຍາກໍ່ສ້າງທີ່ເປັນວຽກເພີ່ມ ມູນຄ່າສັນຍາ 16 ຕື້ກວ່າກີບ (3) ສັນຍາຕິດຕັ້ງວຽກລະບົບໂທລະຄົມມະ ນາຄົມ-ການສື່ສານ ມູນຄ່າສັນຍາ 1 ຕື້ກວ່າກີບ ແລະ ອີກ 2 ສັນຍາເປັນສັນຍາວ່າຈ້າງບໍລິສັດອອກແບບ ແລະ ທີ່ປຶກສາ ໂຄງການ ມູນຄ່າ 4 ຕື້ກວ່າກີບ ເຊິ່ງຈຸດປະສົງ ແລະ ເປົ້າໝາຍຂອງໂຄງການກໍ່ສ້າງດັ່ງກ່າວ ແມ່ນເພື່ອຈັດຕັ້ງປະຕິບັດນະ ໂຍບາຍຂອງພັກ-ລັດ ແລະ ເພື່ອຮອງຮັບແຜນພັດທະນາເສດຖະກິດ-ສັງຄົມຂອງລັດຖະບານ ໂດຍສະເພາະແມ່ນການຍົກ ຍ້າຍສໍານັກງານໄປຍັງເຂດຊານເມືອງທີ່ເໝາະສົມ ແລະ ຫຼຸດຜ່ອນຄວາມແອອັດຢູ່ໃຈກາງເມືອງ ທັງນີ້ກໍເພື່ອຮອງຮັບການ ຂະຫຍາຍໂຕດ້ານພື້ນຖານໂຄງລ່າງສໍານັກງານຫ້ອງການແບບຍືນຍົງ.

    ໂຄງການກໍ່ສ້າງຕຶກສໍານັກງານກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຫຼັງໃໝ່ ປະກອບມີ 8 ໜ້າວຽກ ໃຫຍ່ຄື (1) ວຽກລອກໜ້າດິນເກົ່າອອກ ແລະ ຖົມດິນໂລອັດແໜ້ນ (2) ວຽກກໍ່ສ້າງຕານ່າງໄຟຟ້າແຮງກາງ ແລະ ໄຟເຍືອງ ທາງ (3) ວຽກກໍ່ສ້າງຕຶກອາຄານ (4) ວຽກກໍ່ສ້າງລະບົບເສັ້ນທາງ ແລະ ຮ່ອງລະບາຍນໍ້າ (5) ວຽກກໍ່ສ້າງຮົ້ວອ້ອມອາຄານ ສະຖານທີ່ຈອດລົດໃນຮົ່ມ ແລະ ລານຈອດລົດໃຫຍ່ກາງແຈ້ງ (6) ວຽກຕິດຕັ້ງລະບົບນໍ້າດັບເພີງປ້ອງກັນອັກຄີໄພ (7) ວຽກ ຕິດຕັ້ງລະບົບໂທລະສັບ ອິນເຕີເນັດ ແລະ ກ້ອງວົງຈອນ ແລະ (8) ວຽກປະດັບປະດາ ປູກຫຽ້າ ແລະ ຕົ້ນໄມ້ໃຫ້ເປັນຮົ່ມ ຜ່ານການຈັດຕັ້ງປະຕິບັດໂຄງການກໍ່ສ້າງ ມາຮອດປັດຈຸບັນໜ້າວຽກຕ່າງໆແມ່ນສໍາເລັດແລ້ວ 100%.

ທີ່ມາ  http://www.vtetoday.la

 

ບົດຄວາມໃຫມ່ໆ