ກະຊວງແຮງງານກຽມເປີດໂທລະສັບສາຍດ່ວນ ເພື່ອຮັບຟັງຄຳຄິດເຫັນຈາກປະຊາຊົນ

ກະຊວງແຮງງານ ແລະ ສະຫວັດດີການສັງຄົມ ພວມກະກຽມເປີດໂທລະສັບສາຍດ່ວນ ເພື່ອຮັບຟັງຄຳຄິດເຫັນຈາກປະຊາຊົນ ກໍຄືຜູ້ໃຊ້ແຮງງານ, ຜູ້ອອກແຮງງານໃນທົ່ວປະເທດ, ແນໃສ່ພັດທະນາວຽກງານແຮງງານໃຫ້ມີຄຸນນະພາບ ແລະ ປະລິມານພຽງພໍກັບຄວາມຕ້ອງການຂອງຕະຫລາດແຮງງານເທື່ອລະກ້າວ.

ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ພາຍຫລັງມີການເປີດສາຍດ່ວນຂອງລັດຖະບານ 1516 ເຫັນວ່າມີຜົນຕອບຮັບດີຫລາຍຈາກສັງຄົມ, ມີຫລາຍບັນຫາທີ່ຕິດພັນກັບບັນດາກະຊວງຕ່າງໆ ເພື່ອໃຫ້ມີການແກ້ໄຂບັນຫາຂອງປະຊາຊົນຜູ້ໂທເຂົ້າມາໄດ້ຢ່າງທັນການ, ຫ້ອງການສຳນັກງານນາຍົກລັດຖະມົນຕີ ໄດ້ຮຽກຮ້ອງໃຫ້ບັນດາກະຊວງຕ່າງໆ ເປີດສາຍດ່ວນຂອງຕົນຂຶ້ນ ເພື່ອຮັບຟັງບັນຫາທີ່ກ່ຽວຂ້ອງ, ໃນນັ້ນ ກະຊວງແຮງງານ ແລະ ສະຫວັດດີການສັງຄົມ ກໍພວມກະກຽມເປີດສາຍດ່ວນເຊັ່ນກັນ ເພື່ອຮັບຟັງ ແລະ ຕອບຂໍ້ຂ້ອງໃຈບັນຫາຕ່າງໆຂອງຊາວຜູ້ອອກແຮງງານ, ໂດຍສະເພາະບັນຫາການເອົາປຽບຜູ້ປະກອບການ, ກົດຂີ່ຂູດຮີດແຮງງານ, ບໍ່ປະຕິບັດຕາມໃບສັນຍາແຮງງານ ແລະ ອື່ນໆ ເພື່ອໃຫ້ບັນຫາດັ່ງກ່າວຫລຸດລົງ ຈຶ່ງມີຄວາມຈຳເປັນໃນການເປີດສາຍດ່ວນໃນມໍ່ໆນີ້. ເຖິງຢ່າງໃດກໍຕາມປັດຈຸບັນຫາກຊາວຜູ້ອອກແຮງງານມີບັນຫາຂ້ອງຄາໃຈ ແມ່ນໃຫ້ຕິດຕໍ່ ຫລື ພົວພັນໂດຍກົງກັບກົມຄຸ້ມຄອງແຮງງານ, ກະຊວງແຮງງານ ແລະ ສະຫວັດດີການສັງຄົມ ຕັ້ງຢູ່ຖະໜົນບາງຄຳ, ບ້ານສີສະເກດ, ເມືອງຈັນທະບູລີ ນະຄອນຫລວງວຽງຈັນ (ຫລັງໂຮງແຮມລາວ ພລາຊາ) ໄດ້ທຸກວັນ, ໃນໂມງລາດຊະການ.

ຈາກການສຳຫລວດສະພາບກຳລັງແຮງງານ ແລະ ແຮງງານເດັກໃນປີ 2010, ມີພົນລະເມືອງທັງໝົດ 5,8 ລ້ານກວ່າຄົນ, ຍິງ 2,9 ລ້ານກວ່າຄົນ, ໃນນັ້ນ ແຮງງານໃນເກນອາຍຸ 15-64 ປີມີ 3,5 ລ້ານກວ່າຄົນ, ຍິງ 1,8 ລ້ານກວ່າຄົນ, ມາຮອດປີ 2015 ມີກຳລັງແຮງງານເພື່ອບັນຈຸເຂົ້າໃນຕຳແໜ່ງເກົ່າ ແລະ ໃໝ່ 3,2 ລ້ານຄົນ, ແຕ່ສາມາດສະໜອງກຳລັງແຮງງານໄດ້ພຽງແຕ່ 3,1 ລ້ານຄົນ, ໃນນີ້ ແຮງງານເພີ່ມຂຶ້ນໃໝ່ມີພຽງແຕ່ 2 ແສນກວ່າຄົນເທົ່ານັ້ນ, ເຖິງຢ່າງໃດກໍຕາມ ຫົວໜ່ວຍທຸລະກິດການຜະລິດ ແລະ ໂຄງການລົງທຶນທຸກລະດັບ ຈັດຕັ້ງການຝຶກວິຊາຊີບ ແລະ ພັດທະນາສີມືແຮງງານ ໄດ້ຜະລິດແຮງງານອອກຮັບໃຊ້ສັງຄົມ 2 ແສນກວ່າຄົນ, ໃນນັ້ນ ຂະແໜງກະສິກຳ 97 ພັນກວ່າຄົນ, ອຸດສາຫະກຳ ແລະ ກໍ່ສ້າງ 61 ພັນກວ່າຄົນ ແລະ ບໍລິການ 89 ພັນກວ່າຄົນ.

ຂໍ້ມູນຈາກ: ໜັງສືພີມລາວພັດທະນາ Laophattana News