ກະຊວງການເງິນຢຶນຢັນພະນັກງານລະເມີດ ຄໍາສັ່ງເລກທີ 15.ນຍ ຕ້ອງຖືກວິໄນເຂັ້ມງວດ

ພາຍຫລັງກະຊວງການເງິນໄດ້ຮັບຂໍ້ຂ້ອງໃຈຂອງສັງຄົມທີ່ວ່າຈະມີມາດຕະການແກ້ໄຂແນວໃດຕໍ່ພະນັກງານຂະແໜງການເງິນ, ໂດຍສະເພາະຜູ້ທີ່ຄຸ້ມຄອງການເກັບລາຍຮັບຕົວຈິງທີ່ໄດ້ດຳເນີນການປັບໄໝນຳຜູ້ກະທຳຜິດ ຫລື ຜິດລະບຽບກົດໜາຍແບບທັນທີທັນໃດ, ແຕ່ບໍ່ໄດ້ມອບເງິນປັບໃໝເຂົ້າງົບປະມານ, ຊຶ່ງເຮັດໃຫ້ງົບປະມານຮົ່ວໄຫລ ເປັນຕົ້ນແມ່ນການຈັດຕັ້ງປະຕິບັດຄຳສັ່ງເລກທີ 15/ນຍ, ຕໍ່ຂໍ້ສົນໃຈດັ່ງກ່າວກະຊວງການເງິນໄດ້ຊີ້ແຈງວ່າ: ຕາມລະບຽບແລ້ວ ການຢຶດ ຫລື ຮິບຊັບສິນ (ໂດຍສະເພາະໄມ້) ຕ້ອງໄດ້ດໍາເນີນຕາມຂັ້ນຕອນ ແລະ ປະຕິບັດເປັນໜູ່ຄະນະຜ່ານຂະບວນການສືບສວນ-ສອບສວນຫາຜູ້ກະທຳຜິດ, ກວດກາເອກກະສານຢັ້ງຢືນ, ສິດຄອບຄອງການໄດ້ມາ ແລະ ການມອບພັນທະຕ່າງໆ, ຈາກນັ້ນຈຶ່ງລາຍງານຄະນະນໍາຂອງແຂວງ ເພື່ອພິຈາລະນາ ລວມທັງສະເໜີມາດຕະການວິທີແກ້ໄຂ, ໂດຍສະເພາະການຄິດໄລ່ມອບພັນທະຕ່າງໆ ແລະ ຄ່າປັບໄໝຕໍ່ຜູ້ກະທຳຜິດ ເພື່ອລາຍງານການນຳແຂວງເຫັນດີ ແລ້ວຈິງຈັດຕັ້ງປະຕິບັດ, ການຮັບ ແລະ ມອບເງິນຕ້ອງມີເອກະສານຢັ້ງຢືນ ຕາມລະບຽບກົດໜາຍຂອງຂະແໜງການເງິນຈິ່ງຖືວ່າຖືກຕ້ອງ. ກໍລະນີມີພະນັກງານໃດໜຶ່ງດຳເນີນການຢືດໄມ້ໂດຍບໍ່ໄດ້ປະຕິບັດເປັນໜູ່ຄະນະ, ສົມຮູ້ຮ່ວມຄິດກັບຜູ້ປະກອບການຈ່າຍຄ່າປັບໄໝໂດຍບໍ່ມີເອກະສານຢັ້ງຢືນການມອບ ແລະ ຮັບເງິນແລ້ວປ່ອຍໃຫ້ຜູ້ປະກອບການເຄື່ອນຊັບສິນ (ໄມ້), ພ້ອມທັງບໍ່ມອບເງິນເຂົ້າງົບປະມານຖືວ່າເປັນການກະທຳທີ່ບໍ່ຖືກຕ້ອງ, ພະນັກງານດັ່ງກ່າວຕ້ອງຖືກກ່າວເຕືອນປະຕິບັດວິໄນເຂັ້ມງວດ ຫລື ຖືກລົງໂທດຕາມແຕ່ລະກໍລະນີຕາມມາດຕະການທີ່ໄດ້ກຳນົດໄວ້ໃນກົດໜາຍ ແລະ ຄຳສັ່ງເລກທີ 15/ນຍ. ແຕ່ຜູ້ພົບເຫັນຕ້ອງໄດ້ແຈ້ງຂໍ້ມູນລາຍລະອຽດຂໍ້ມູນທີ່ພົບເຫັນໃຫ້ຄະນະນຳຂະແໜງການເງິນ ຫລື ຂະແໜງກ່ຽວຂ້ອງ, ເນື່ອງຈາກການຄຸ້ມຄອງການຂຸດຄົ້ນເຄື່ອນຍ້າຍ ຫລື ຊື້-ຂາຍໄມ້ ປະກອບດ້ວຍຂະແໜງການທີ່ກ່ຽວຂ້ອງຕ່າງໆ (ບໍ່ສະເພາະແຕ່ຂະແໜງການເງິນ) ແລະ ປັດຈຸບັນມີຄະນະສະເພາະກິດທີ່ໄດ້ຮັບການແຕ່ງຕັ້ງຈາກທ່ານນາຍົກລັດຖະມົນຕີ ເພື່ອດຳເນີນການເຄື່ອນໄຫວຕິດຕາມກວດກາ ແລະ ຈັດຕັ້ງປະຕິບັດຄຳສັ່ງດັ່ງກ່າວ.

ຂໍ້ມູນຈາກ: http://www.laophattananews.com