ກອງເຕຊິວລາງວັນນັກເຕະເທບຂອງພີເອຟເອ

 

ເອັນໂກໂລ ກອງເຕ ມິດຟິວຂອງ ເຊວຊີ ໄດ້ລາງວັນນັກເຕະດີເດັ່ນຂອງ ພີເອຟເອ ປະຈຳລະດູການນີ້ຫຼັງຈາກທີ່ເຮັດຜົນງານໄດ້ສຸດເທບເຮັດໃຫ້ເຂົາເປັນນັກເຕະຝຣັ່ງຄົນທີ 4 ທີ່ໄດ້ຮັບລາງວັນນີ້.

 

ເອັນໂກໂລ ກອງເຕ ກອງກາງຂອງ ເຊວຊີ ສະໂມສອນຍັກໃຫຍ່ຂອງ ພຣີເມຍລີກ ໄດ້ຮັບເລືອກໃຫ້ເປັນຜູ້ຊະນະລາງວັນດີເດັ່ນແຫ່ງປີຂອງສະມາຄົມບານເຕະອາຊີບອັງກິດ ຫຼື ພີເອຟເອ ປະຈຳລະດູການ 2016-2017 ຫຼັງຈາກທີ່ເຂົາເຮັດຜົນງານໄດ້ດີ.

 

ກອງເຕ ຫາກໍຍ້າຍມາຈາກ ເລສເຕີ ຊີຕີ ເມື່ອຊ່ວງຊຳເມີທີ່ຜ່ານມາແຕ່ພຽງລະດູການທຳອິດເຂົາກໍໂຊຟອມເທບໄດ້ຢ່າງໂດດເດັ່ນຈົນເປັນໜຶ່ງໃນກຳລັງສຳຄັນທີ່ຊ່ວຍໃຫ້ ເຊວຊີ ເປັນຈ່າຝູງຂອງລີກໃນຕອນນີ້ ລວມທັງຍັງເຮັດໃຫ້ ເຊວຊີ ຜ່ານເຂົ້າຮອບຊິງຊະນະເລີດຂອງລາຍ ເອຟເອ ຄັບ ອີກດ້ວຍ.

 

ຈາກຜົນງານດັ່ງກ່າວເຮັດໃຫ້ ກອງເຕ ໄດ້ຮັບຄະແນນສຽງຫຼາຍກວ່າທ້າຊິງຄົນອື່ນໆເຊັ່ນ ເອເດນ ອາຊາ, ແຮຣີ ເຄນ, ໂຣເມລູ ລູກາກູ, ຊະລາຕັນ ອິບຣາຮິໂບວິດ ແລະ ອະເລັກຊິດ ຊານເຊດ ໄປໄດ້ ໂດຍມັນເຮັດໃຫ້ເຂົາເປັນນັກເຕະຝຣັ່ງຄົນທີ 4 ທີ່ໄດ້ລາງວັນນີ້ຕໍ່ຈາກ ເທຍຣີ ອັອງຣີ (2 ສະໄໝ), ເອຣິກ ຄັນໂຕນາ (1 ສະໄໝ) ແລະ ດາວິດ ຊິໂນລາ (1ສະໄໝ) ນອກຈາກນີ້ເຂົາຍັງເປັນນັກເຕະຈາກ ເຊວຊີ ຄົນທີ 3 ທີ່ໄດລາງວັນນີ້ໂດຍ 2 ຄົນກ່ອນໜ້ານີ້ແມ່ນ ຈອນ ເທຣີ ກັບ ເອເດນ ອາຊາ.

 

ຂະນະທີ່ລາງວັນນັກເຕະດາວລຸ້ງດີເດັ່ນແຫ່ງປີຂອງສະມາຄົມບານເຕະອາຊີບອັງກິດໃນລະດູການນີ້ຕົກເປັນຂອງ ເດເລ ອາລີ ກອງກາງຟອມລະເບີດຂອງ ທັອດແນມ ຮັອດສະເປີ ເຊິ່ງເປັນເຮັດໃຫ້ເຂົາໄດ້ຮັບລາງວັນນີ້ເປັນລະດູການທີ່ສອງຕິດຕໍ່ກັນ.