ກອງປະຊຸມ ອົງຄະນະພັກ ກະຊວງແຜນການ ແລະ ການລົງທຶນ ປິດລົງດ້ວຍຜົນສຳເລັດ

 

      ກອງປະຊຸມໃຫຍ່ ຄັ້ງທີ III ຂອງອົງຄະນະພັກ ກະຊວງແຜນການ ແລະ ການລົງທຶນ ປິດລົງດ້ວຍ ຜົນສຳເລັດ ອັນຈົບງາມ ໃນວັນທີ 20 ສິງຫາ 2015 ນີ້, ໃນນັ້ນກອງປະຊຸມ ໄດ້ເຫັນດີເປັນເອກະພາບ ຮັບຮອງເອົາມະຕິ ຂອງກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງ ແລະ ຜົນຂອງການປ່ອນບັດເລືອກຕັ້ງ ເອົາຄະນະພັກ ກະຊວງສະໄໝທີ III ຈຳນວນ 15 ສະຫາຍ ໂດຍກອງປະຊຸມ ຄັ້ງປະຖົມມະລຶກ ໄດ້ເລືອກເອົາສະຫາຍ ສົມດີ ດວງດີ ເປັນເລຂາຄະນະພັກ, ສະຫາຍນາງ ຄຳຈັນ ວົງແສນບູນ ເປັນຮອງເລຂາຄະນະພັກ, ສະຫາຍ ຄຳລຽນ ພົນເສນາ ເປັນປະທານກວດກາ, ສະຫາຍ ພູວົງ ພິມມະສອນ, ສະຫາຍ ສົມບູນ ຂັນຕິວົງ ແລະ ສະຫາຍ ພູໄຊ ເພັດສີຄາມ ເປັນຮອງປະທານກວດກາ.

    ໃນໂອກາດນີ້, ກອງປະຊຸມ ຍັງໄດ້ຮັບຟັງການໂອ້ລົມ ເພື່ອຊີ້ທິດເຍືອງທາງ ໃນການປະຕິບັດໜ້າທີ່ວຽກງານ ຈາກ ສະຫາຍ ບຸນປອນ ບຸດຕະນະວົງ ກຳມະການ ກົມການເມືອງ ສູນກາງພັກ, ຮອງນາຍົກລັດຖະມົນຕີ, ຜູ້​ຊີ້​ນຳ​ວຽກ​ງານ​ຂົງ​ເຂດ​ເສດຖະກິດ​ ມະຫາ​ພາກ ​ແລະ ການ​ບໍລິການ ໂດຍໄດ້ເນັ້ນໜັກໃຫ້ ຄະນະພັກຊຸດໃໝ່ ເອົາໃຈໃສ່ປະຕິບັດ ພາລະໜ້າທີ່ ຊີ້ນຳ-ນຳພາ ດ້ານການເມືອງແນວຄິດ ແລະ ການຈັດຕັ້ງປະຕິບັດ ວຽກງານວິຊາສະເພາະ ຢ່າງມີຜົນສຳເລັດ ໂດຍການແບ່ງງານ, ແບ່ງໜ້າທີ່ຮັບຜິດຊອບ ຢ່າງຈະແຈ້ງ, ກ້າຄິດ, ກ້າເຮັດ ແລະ ກ້າຮັບຜິດຊອບຕໍ່ຜົນໄດ້, ຜົນເສຍຂອງການປະຕິບັດ  ໜ້າທີ່ວຽກງານ, ຜ່ານຜ່າຄວາມຫຍຸ້ງຍາກຕ່າງໆ ເພື່ອສຳເລັດໜ້າທີ່ການເມືອງຕົນ. ສຳລັບດ້ານວຽກງານ ວິຊາສະເພາະ ຕ້ອງເອົາໃຈໃສ່ນຳພາ ຂະແໜງການຂອງຕົນ ຈັດຕັ້ງຜັນຂະຫຍາຍ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ VII (2016-2020), ຍຸດທະສາດປີ 2025 ແລະ ວິໄສທັດຮອດປີ 203 ໃຫ້ກາຍເປັນແຜນງານ, ໂຄງການລະອຽດ ພ້ອມທັງ ວາງຄາດໝາຍສູ້ຊົນ ແລະ ວາງມາດຕະການ ອັນເໝາະສົມ ເປັນແຕ່ລະໄລຍະ, ພ້ອມດຽວກັນນີ້ ວຽກງານການລົງທຶນ ຕ້ອງຫັນເຂົາສູ່ ລະບຽບຫລັກການ, ປະຕິບັດຕາມກົດໝາຍ ການລົງທຶນຂອງລັດ, ບໍ່ໃຫ້ມີໂຄງການນອກແຜນ, ແຕ່ລະໂຄງ ການຕ້ອງຜ່ານການປະເມີນ ແລະ ໄດ້ຮັບການຢັ້ງຢືນດ້ານເຕັກນິກ ຈາກພາກສ່ວນທີ່ກ່ຽວຂ້ອງ, ສ່ວນວຽກສົ່ງເສີມການລົງທຶນ ຕ້ອງສ້າງເງື່ອນໄຂອຳນວຍ ຄວາມສະດວກ ໃຫ້ແກ່ນັກລົງທຶນ, ບໍລິການປະຕູດຽວ ຢ່າງວ່ອງໄວ ແລະ ມີຄວາມໂປ່ງໃສ, ການຄົ້ນຄວ້າ ແລະ ອະນຸມັດການລົງທຶນ ຕ້ອງຄຳນຶງເຖິງຜົນປະໂຫຍດ ຂອງປະຊາຊົນ ແລະ ປະເທດຊາດ ເປັນຕົ້ນຕໍ, ສູ້ຊົນຂະຫຍາຍການລົງທຶນ ໄປສູ່ເຂດຊົນນະບົດ ຫ່າງໄກສອກຫລີກ ເພື່ອປະກອບສ່ວນແກ້ໄຂ ຄວາມທຸກຍາກຂອງ ປະຊາຊົນບັນດາເຜົ່າ ແລະ ນຳພາປະເທດຊາດ ຫລຸດພົ້ນອອກຈາກ ສະຖານະພາບ ປະເທດດ້ອຍພັດທະນາ ເທື່ອລະກ້າວ.

=====================================================================

ທີ່ມາ: kpl.gov.la