ກອງປະຊຸມ ສໍາມະນາເຜີຍແຜ່ ຜົນກອງປະຊຸມ ສຸດຍອດອາຊຽນ ຄັ້ງທີ 26 ແລະ ກະກຽມຄວາມພ້ອມ ໃນການເຂົ້າ ປະຊາຄົມອາຊຽນ ທ້າຍປີ 2015

ໃນວັນທີ 27-28 ສິງຫາ 2015 ທີ່​ຜ່າ​ນມາ​ນີ້, ທີ່ຫ້ອງປະຊຸມ​ເຮືອນພັກເບີ 1 ແຂວງຄໍາມ່ວນ,  ທ່ານ ອາລຸນແກ້ວ ກິດຕິຄຸນ,​ ລັດຖະມົນຕີຊ່ວຍວ່າການ ກະຊວງການຕ່າງປະເທດ, ທັງເປັນຫົວໜ້າ ເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ເປັນປະທານກອງປະຊຸມ ສຳມະນາເຜີຍແຜ່ ຜົນຂອງກອງປະຊຸມ ສຸດຍອດອາຊຽນ ຄັ້ງທີ 26 ​ເຊິ່ງ​​ໄດ້​ຈັດ​ຂຶ້ນ ​ໃນ​ວັນ​ທີ 26-27 ​ເມສາ 2015 ທີ່ ກົວ​ລາ​ລໍາ​ເປີ ​ແລະ ລັງກາ​ວີ, ມາ​ເລ​ເຊຍ; ການກະກຽມຄວາມພ້ອມຂອງ ສປປ ລາວ ໃນການເຂົ້າປະຊາຄົມອາຊຽນ ໃນທ້າຍປີ 2015 ແລະ ການກະກຽມ ເປັນເຈົ້າພາບ ແລະ ປະທານອາຊຽນ ໃນປີ 2016 ຂອງ ສປປ ລາວ ໃຫ້ບັນດາ ຈຸດປະສານງານອາຊຽນ ໃນທົ່ວປະເທດ, ໂດຍມີຜູ້ເຂົ້າຮ່ວມ ຈຳນວນ 100 ກວ່າທ່ານ ຈາກບັນດາຈຸດປະສານງານອາຊຽນ ຂອງບັນດາແຂວງທົ່ວປະເທດ ແລະ ນັກວິ​ທະ​ຍາກອນ ຈາກບັນດາກະຊວງ ທີ່ຮັບຜິດຊອບແຕ່ລະເສົາ​ຄໍ້າ​ປະຊາ​ຄົມ​ອາຊຽນ ຄື: ການເມືອງ- ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ.
ໃນ​ກອງ​ປະຊຸມ​ສຳ​ມະ​ນາຄັ້ງນີ້,  ​ບັນດາ​ຈຸດ​ປະສານງານ​ອາຊຽນ ຈາກທຸກແຂວງທົ່ວ​ປະ​ເທດ​ ໄດ້ຮັບຊາບ ຜົນ​ຂອງ​ກອງ​ປະຊຸມ ​ສຸດ​ຍອດ​ອາຊຽນ ຄັ້ງ ທີ 26 ທີ່​ຜ່ານ​ມາ ​ເຊິ່ງໄດ້​ຈັດ​ຂຶ້ນ ​ໃນ​ວັນ​ທີ 26-27 ​ເມສາ 2015 ທີ່ ກົວ​ລາ​ລໍາ​ເປີ ​ແລະ ລັງກາ​ວີ, ມາ​ເລ​ເຊຍ; ​ຄວາມ​ຄືບໜ້າຂອງ​ການ​ ກະກຽມຄວາມ​ພ້ອມ​ຂອງ ສປປ ລາວ ​ ເພື່ອ​ເຂົ້າປະຊາ​ຄົມ​ອາຊຽນ ​ໃນທ້າຍ​ປີ 2015 , ການ​ກະກຽມ​ເປັນ​ເຈົ້າພາບ  ​ແລະ  ປະທານ​ອາຊຽນ ​ໃນ​ປີ 2016 ຂອງ​ ສປປ ລາວ ​.
ພ້ອມດຽວກັນນີ້, ກອງປະຊຸມ ຍັງໄດ້ຮັບຟັງການລາຍງານກ່ຽວກັບ ການກະກຽມຄວາມພ້ອມ ໃນແຕ່ລະດ້ານຂອງບັນດາແຂວງ​ ໃນທົ່ວປະເທດ​ ໂດຍ​ສະ​ເພາະແມ່ນ ສະພາບການພັດທະນາ ເສດຖະກິດ-ສັງຄົມ ພາຍໃນແຂວງ, ການລົງທຶນພາຍໃນ ແລະ ຕ່າງປະເທດ, ບັນດາລາຍການສິນຄ້າ ທີ່ເປັນທ່າແຮງ ຂອງແຂວງ, ຄວາມຕື່ນຕົວ ແລະ ຄວາມພ້ອມຂອງນັກທຸລະກິດລາວ ໃນແຂວງຂອງຕົນ​ ເພື່ອ​ຮັບ​ມື​ໃນ​ການ​ກະກຽມເຂົ້າຮ່ວມປະຊາຄົມເສດຖະກິດອາຊຽນອີກ​ດ້ວຍ.
ກອງປະຊຸມສຳມະນາໃນຄັ້ງນີ້ ໄດ້ເຫັນດີວ່າ ການເປັນປະທານອາຊຽນຂອງ ສປປ ລາວ ໃນປີ 2016 ເປັນກຽດ ແລະ ພັນທະສໍາລັບ ສປປ ລາວ ​ເຊິ່ງທຸກພາກສ່ວນຂອງ ສປປ ລາວ ລວມທັງບັນດາແຂວງອ້ອມຂ້າງສູນກາງ ຈະໄດ້ຮ່ວມມືຮ່ວມໃຈກັນກະກຽມຮອບດ້ານ ເພື່ອຮັບປະກັນຜົນສຳເລັດຂອງ ການເປັນ ປະທານອາຊຽນ ໃນປີ 2016.

……………………………………………………………………………………………………………………………

ທີ່ມາ: www.kpl.gov.la.