ກອງປະຊຸມ ສພຊ ຄັ້ງປະຖົມມະລືກ ຊຸດທີ VIII ໄດ້ອັດລົງຢ່າງຈົບງາມ!!

ກອງປະຊຸມສະພາແຫ່ງຊາດ ຄັ້ງປະຖົມມະລືກ ຊຸດທີ VIII ໄດ້ອັດລົງຢ່າງຈົບງາມ


ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນໃນລະຫວ່າງວັນທີ 20-22 ເມສາ 2016 ນີ້, ທີ່ຫໍສະພາແຫ່ງຊາດ, ນະຄອນຫຼວງວຽງຈັນ, ໂດຍການເປັນປະທານ ຂອງທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ ຊຸດທີ VIII, ການນໍາພັກ-ລັດ, ສະມາຊິກລັດຖະບານ, ອະດີດການນໍາຂັ້ນສູງພັກ-ລັດ, ພະນັກງານອາວຸໂສ-ບໍານານ, ພະນັກງານລັດຖະກອນ, ແຂກຕ່າງປະເທດ ແລະ ສະມາຊິກສະພາທັງໝົດ 149 ທ່ານ, ຍິງ 41 ທ່ານເຂົ້າຮ່ວມ.


ກອງປະຊຸມສະພາແຫ່ງຊາດ ຄັ້ງປະຖົມມະລືກ ຊຸດທີ VIII ຄັ້ງນີ້, ໄດ້ຮັບຮອງເອົາການເລືອກຕັ້ງ ທ່ານ ນາງ ປານີ ຢາທໍ່ຕູ້ ເປັນປະທານສະພາແຫ່ງຊາດ ຊຸດທີ VIII ສະໄໝທີສອງ, ທັງເປັນປະທານຄະນະປະຈໍາສະພາແຫ່ງຊາດ. ການເລືອກຕັ້ງຮອງປະທານສະພາແຫ່ງຊາດ ທັງເປັນຮອງປະທານຄະນະປະຈໍາສະພາແຫ່ງຊາດ 4 ທ່ານຄື: ທ່ານ ພົນໂທ ແສງນວນ ໄຊຍະລາດ, ທ່ານ ສົມພັນ ແພງຄໍາມີ, ທ່ານ ບຸນປອນ ລັດຕະນະວົງ ແລະ ທ່ານ ນາງ ສີໃສ ລືເດດມູນສອນ. ຮັບຮອງເອົາບັນດາທ່ານກໍາມະການຄະນະປະຈໍາສະພາແຫ່ງຊາດຈໍານວນ 9 ທ່ານ. ຮັບຮອງເອົາກົງຈັກການຈັດຕັ້ງຂອງສະພາແຫ່ງຊາດ ຊຶ່ງປະກອບດ້ວຍ 8 ກໍາມາທິການ ແລະ ຄະນະເລຂາທິການ, ຮັບຮອງເອົາການສະເໜີແຕ່ງຕັ້ງປະທານກໍາມາທິການ, ເລຂາທິການ ແລະ ຮອງປະທານກໍາມາທິການສະພາແຫ່ງຊາດ.

 

ພ້ອມນັ້ນ, ກອງປະຊຸມໄດ້ຮັບຮອງເອົາການເລືອກຕັ້ງທ່ານ ບຸນຍັງ ວໍລະຈິດ ເປັນປະທານປະເທດ ສປປ ລາວ, ທ່ານ ພັນຄໍາ ວິພາວັນ ເປັນຮອງປະທານປະເທດ. ທ່ານ ທອງລຸນ ສີສຸລິດ ເປັນ ນາຍົກລັດຖະມົນຕີ, ທ່ານ ບຸນທອງ ຈິດມະນີ ເປັນຮອງນາຍົກລັດຖະມົນຕີ ທັງເປັນປະທານອົງການກວດກາລັດຖະບານ ແລະ ຫົວໜ້າຄະນະກໍາມະການຕ້ານການສໍ້ລາດບັງຫຼວງຂັ້ນສູນກາງ, ທ່ານ ສອນໄຊ ສີພັນດອນ ເປັນຮອງນາຍົກລັດຖະມົນຕີ ແລະ ທ່ານ ສົມດີ ດວງດີ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງການເງິນ.

ຮັບຮອງເອົາການແຕ່ງຕັ້ງບັນດາລັດຖະມົນຕີ 18 ກະຊວງ ແລະ 3 ອົງການທຽບເທົ່າຂຶ້ນກັບລັດຖະບານລາວ ແລະ ຮັບຮອງເອົາຫົວໜ້າອົງການໄອຍະການປະຊາຊົນສູງສຸດ, ປະທານສານປະຊາຊົນສູງສຸດ.

 

ພ້ອມນີ້, ຍັງໄດ້ຮັບຮອງເອົາວິໄສທັດ ຮອດປີ 2030, ຍຸດທະສາດຮອດປີ 2025 ແລະ ທິດທາງແຜນການ 5 ຂອງສະພາແຫ່ງຊາດ ດ້ວຍຄະແນນສຽງ 146 ສຽງ ກວມ 100% ຂອງຄະແນນສຽງທັງໝົດ ແລະ ແຜນການສ້າງ ແລະ ປັບປຸງກົດໝາຍ 5 ປີຂອງສະພາແຫ່ງຊາດ ຊຸດທີ VIII ດ້ວຍຄະແນນສຽງ 144 ສຽງ ກວມ 100 % ຂອງຄະແນນສຽງທັງໝົດ.

 

ຂໍ້ມູນຈາກ: CRI-FM93

ບົດຄວາມໃຫມ່ໆ