ກອງປະຊຸມ ບໍ່ເປັນທາງການຜູ້ບັນຊາການທະຫານສູງສຸດ ອາຊຽນ ຄັ້ງທີ 13

ໃນວັນທີ 14 ມີນາ ນີ້, ກອງທັບປະຊາຊົນລາວ ໄດ້ເປັນເຈົ້າພາບກອງປະຊຸມ ບໍ່ເປັນທາງການຂອງຜູ້ບັນຊາການທະຫານສູງສຸດ ອາຊຽນ ຄັ້ງທີ 13 ໄຂຂຶ້ນຢ່າງເປັນທາງການ ທີ່ນະຄອນ ຫລວງວຽງຈັນ. ໂດຍການເປັນປະທານຂອງທ່ານ ພົນຕີ ສຸວອນ ເລືອງບຸນມີ ຫົວໜ້າກົມໃຫຍ່ເສນາທິການ ກອງທັບປະຊາຊົນລາວ, ມີບັນດາຕົວແທນຈາກກອງທັບ 10 ປະເທດສະມາຊິກອາຊຽນເຂົ້າຮ່ວມຢ່າງພ້ອມພຽງ.
ທ່ານ ພົນຕີ ສຸວອນ ເລືອງບຸນມີ ກ່າວວ່າ: ກອງປະຊຸມຄັ້ງນີ້ແມ່ນມີຄວາມໝາຍສຳຄັນຢ່າງຍິ່ງ ເພາະຈັດຂຶ້ນໃນລະຫວ່າງປະຊາຄົມອາຊຽນ ໄດ້ຮັບການສ້າງຕັ້ງຂຶ້ນຢ່າງເປັນທາງການໃນວັນທີ 31 ທັນວາ 2015 ຜ່ານມາ ເຊິ່ງເປັນການເພີ່ມທະວີການພົວພັນຮ່ວມມື ລະຫວ່າງປະເທດສະມາຊິກອາ ຊຽນດ້ວຍກັນ ແນໃສ່ເຮັດໃຫ້ພາກພື້ນນີ້ກາຍເປັນພາກພື້ນແຫ່ງສັນຕິພາບ ມີຄວາມໝັ້ນຄົງ ແລະ ມີຄວາມວັດທະນາຖາວອນຢ່າງແທ້ຈິງ. ໃນປັດຈຸບັນ ສະພາບການຂອງໂລກ ແລະ ພາກພື້ນ ຍັງຜັນແປໄປຢ່າງສະຫລັບສັບຊ້ອນ ມີທັງສິ່ງເອື້ອອຳນວຍ ແລະ ສິ່ງທ້າທາຍທົດສອບ ເຊິ່ງຍາກຈະຄາດຄະເນໄດ້, ດ້ວຍເຫດນີ້ການຮ່ວມມືເພື່ອປົກປັກຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການພັດທະນາຂອງພາກພື້ນ ແມ່ນມີຄວາມຈຳເປັນ ແລະ ພາວະວິໃສ, ທັງແມ່ນຄວາມມຸ່ງມາດປາຖະໜາຂອງປະຊາຊົນພາກພື້ນ. ກອງປະຊຸມຄັ້ງນີ້ຈະເປັນປະກອບສ່ວນອັນສຳຄັນໃນການເສີມສ້າງຄວາມເຂົ້າໃຈ, ຄວາມໄວ້ວາງໃຈ ແລະ ເປັນການກຳນົດແຜນການຮ່ວມມື ຂອງກອງທັບອາຊຽນ ເພື່ອຮ່ວມກັນຮັບມືກັບສິ່ງທ້າທາຍຕ່າງໆຕໍ່ຄວາມໝັ້ນຄົງ ທັງຮູບແບບເກົ່າ ແລະ ໃໝ່ ທີ່ກຳລັງເກີດຂຶ້ນໃນປັດຈຸ ບັນ ແລະ ອະນາຄົດ ເຊິ່ງມັນສອດຄ່ອງກັບຫົວຂໍ້ກອງປະຊຸມທີວ່າ “ສົ່ງເສີມການຮ່ວມມືດ້ານວຽກ ງານປ້ອງກັນຊາດ ເພື່ອຄວາມເຂັ້ມແຂງຂອງປະຊາຄົມອາຊຽນ”.
ທ່ານ ຫົວໜ້າກົມໃຫຍ່ເສນາທິການ ກອງທັບປະຊາຊົນລາວ ກ່າວຕື່ມວ່າ: ກອງປະຊຸມບໍ່ເປັນທາງການຂອງຜູ້ບັນຊາການທະຫານສູງສຸດ ອາຊຽນ ຄັ້ງທີ 13 ໄດ້ມີການປຶກສາຫາລືແລກປ່ຽນຄຳຄິດຄຳເຫັນຫລາຍບັນຫາ ເຊິ່ງລ້ວນແຕ່ມີຄວາມໝາຍສຳຄັນ ໃນການເສີມຂະຫຍາຍການພົວພັນຮ່ວມມືຂອງກອງທັບອາຊຽນ ເພື່ອປົກປັກຮັກສາສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ, ສິ່ງສຳຄັນໄດ້ເປັນເອກະພາບຕໍ່ແຜນການຮ່ວມມື 2 ປີ 2016-2018 ຂອງທະຫານອາຊຽນ ເຊິ່ງມີການລົງນາມໃນຖະແຫລງການຮ່ວມຂອງກອງປະຊຸມເທື່ອນີ້.

ແຫຼ່ງຂ່າວ: Pathedlao Lao (ຂປລ).