ກອງປະຊຸມໃຫຍ່ ຄັ້ງທີ X ຂອງອົງຄະນະພັກ ແຂວງອັດຕະປື ໄດ້ໄຂຂື້ນຢ່າງເປັນທາງການ

ກອງປະຊຸມ​ໃຫຍ່ ຄັ້ງ​ທີ X ຂອງ​ອົງຄະ​ນະ​ພັກ ​ແຂວງ​ອັດ​ຕະປື ​ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ ​ໃນວັນທີ 11-13 ສິງຫາ 2015 ນີ້ ທີ່ສະໂມສອນ ໃຫ່ຍຂອງແຂວງ, ໂດຍພາຍໃຕ້ການ ເປັນປະທານຂອງສະຫາຍ ດຣ. ນາມ ວິຍະເກດ ກຳມະການສູນກາງພັກ, ເລຂາຄະນະພັກແຂວງ ເຈົ້າແຂວງໆອັດຕະປື, ໂດຍການໃຫ້ກຽດ ເຂົ້າຮ່ວມຂອງ ສະຫາຍ ດຣ. ບຸນປອນ ບຸດຕະນະວົງ ກໍາມະການ ກົມການເມືອງ ສູນກາງພັກ ຮອງນາຍົກລັດຖະມົນຕີ, ເຊິ່ງມີຜູ້ແທນສົມບູນ 191 ສະຫາຍ, ຍິງ 30 ສະຫາຍ ເຊິ່ງເປັນຕົວແທນ ໃຫ້ແກ່ບັນດາ ສະຫາຍສະມາຊິກພັກ ໃນທົ່ວແຂວງ ຈຳນວນ 7.095 ສະ ຫາຍ, ມີຜູ້ຕາງໜ້າຈາກ ຄະນະບໍລິຫານງານພັກ ແຂວງຈໍາປາ​ສັກ, ສາລະວັນ, ເຊກອງ,  ພະນັກງານ ປະຕິວັດອາວຸໂສ ແລະ ແຂກຖຶກເຊີນເຂົ້າຮ່ວມ.

ສະຫາຍ ດຣ. ນາມ ວິຍະເກດ  ໄດ້ກ່າວເປີດກອງປະຊຸມ ຢ່າງເປັນທາງການ ແລະ ຜ່ານບົດລາຍງານການເມືອງ, ຜ່ານການຊີ້ນຳ-ນຳພາ ໃນການຈັດຕັ້ງ ປະຕິບັດວຽກງານ ຕະຫລອດໄລຍະ 5 ປີ ທີ່ຜ່ານມາເຮັດໃຫ້ທົ່ວ ແຂວງອັດ​ຕະປື ມີຄວາມສະຫງົບ, ມີສະຖຽນລະພາບ ທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມເປັນ ລະບຽບຮຽບຮ້ອຍ ໂດຍພື້ນຖານ ເຮັດໃຫ້ການພັດທະນາ ເສດຖະກິດສັງຄົມ ໄດ້ຮັບການພັດທະນາ, ຊີວິດການເປັນຢູ່ ຂອງປະຊາຊົນບັນດາເຜົ່າ ໄດ້ຮັບການ ປັບປຸງດີຂື້ນ ເປັນກ້າວໆປະຊາຊົນບັນດາເຜົ່າ ມີຄວາມສາມັກຄີ ເປັນປຶກແຜ່ນໝັກແໝ້ນ, ເສດຖະກິດຂອງແຂວງ ໄດ້ມີການຂະຫຍາຍຕົວຢ່າງຕໍ່ເນື່ອງ ແລະ ໄດ້ມີການຫັນປ່ຽນ ຕາມທິດພັດທະນາ ກະສິກຳ-ປ່າໄມ້ ຕິດພັນກັບອຸດສາຫະກຳ ປຸງແຕ່ງ ແລະ ການບໍລິການ ເຮັດໃຫ້ອັດຕາລວມຍອດ ຜະລິດຕະພັນພາຍໃນ GDP 5 ປີ ບັນລຸໄດ້ໂດຍ ສະເລ່ຍ 13,82 % ຕໍ່ປີ, ລາຍໄດ້ສະເລ່ຍ ໃສ່ຫົວຄົນບັນລຸໄດ້ 9.450.000 ກວ່າກີບຕໍ່ຄົນຕໍ່ປີ ຫລື ເທົ່າກັບ 1.770 ໂດລາສະຫະລັດ, ທຽບໃສ່ປີ 2010 ເພີ່ມຂື້ນ​ເກືອບ 3 ເທົ່າຕົວ, ການ​ຂະຫຍາຍຕົວ​ດັ່ງກ່າວ​ ໄດ້​ເຮັດໃຫ້​ໂຄງ​ປະກອບ​ ຂອງ​ການ​ຜະລິດ​ເສດຖະກິດ​ ຫັນ​ໄປ​ຕາມທິດ​ທີ່​ໄດ້​ກໍານົດ​ໄວ້, ຫັນ​ໄປ​ສູ່​ການ​ຜະລິດ​ເປັນ​ສິນຄ້າ ​ແລະ ອຸດສາຫະກໍາ​ທັນ​ສະ​ໄໝ​​ແຕ່​ຫົວທີ ສ້າງລາຍຮັບ ແລະ ປັບປຸງຊີວິດການເປັນຢູ່ ຂອງປະຊາຊົນ ນັບມື້ນັບດີຂື້ນກ່ວາເກົ່າ ເຮັດໃຫ້ຈຳນວນຄອບຄົວ ທຸກຍາກຫລຸດລົງເຫລື​ອ 10,84% ແລະ ບ້ານທຸກຍາກ ຫລຸດລົງເຫລື​ອ 14,44%; ການສ້າງບ້ານພັດທະນາເພີ່ມຂື້ນ 43,84% ໂຄງປະກອບເສດຖະກິດ ໄດ້ມີການຫັນປຽ່ນຕາມທິດທີ່ຕັ້ງໝ້າ, ການຜະລິດກະສິກຳ ໄດ້ມີຄວາມໝັ້ນທຽ່ງ ທາງດ້ານສະບຽງອາຫານ, ຊາວກະສິກອນ ໄດ້ພັດທະນາ ກຳລັງການຜະລິດ ຂື້ນສູ່ຄູນນະພາບ​ໃໝ່, ໂດຍຫັນປຽ່ນວິທີການຜະລິດ ແບບດັ່ງເດີມ ຫັນໄປສູ່ການຜະລິດ ທີ່ນຳໃຊ້ກົນຈັກ ແລະ ເຕັກນິກໃໝ່ ທີ່ທັນສະໄໝເທື່ອລະກ້າວ, ການຜະລິດກະສິກຳ ເປັນສິນຄ້າຕິດພັນກັບ ການປຸງແຕ່ງ, ການ​ລ້ຽງສັດ ​ແລະ ຂະບວນປູກພືດ, ບັນດາພື້ນຖານໂຄງລ່າງ ທາງດ້ານເສດຖະກິດ ໄດ້ຮັບການປັບປຸງ ກໍ່ສ້າງຂຶ້ນໃໝ່ຢ່າງຕັ້ງໜ້າ, ໄດ້ກໍ່ສ້າງເສັ້ນທາງເຂົ້າເຖິງ ບັນດາໝູ່ບ້ານຈຸດສຸມ ພັດທະນາ; ວຽກງານການສຶກສາ ແລະ ກິລາ ກໍໄດ້ເອົາໃຈໃສ່ຂະຫຍາຍຕາໝ່າງ ການສຶກສາ ໄປສູ່ຊົນນະບົດ​ຫ່າງໄກຊອກຫລີກ ເຮັດໃຫ້ແຕ່ລະບ້ານ ໄດ້ຮັບການບໍລິການ ດ້ານການສຶກສາ ຢ່າງທົ່ວເຖິງ, ວຽກງານສາທາລະນະສຸກ ໄດ້ຂະຫຍາຍໄປສູ່ບ້ານ ແລະ ກຸ່ມບ້ານພັດທະນາຢ່າງທົ່ວເຖິງ, ໄດ້ປັບປຸງຄຸນນະພາບ ການບໍລິການປິ່ນປົວ, ຍົກລະດັບສຸກສາລາ ຂຶ້ນເປັນໂຮງໝໍນ້ອຍ; ໂຄສະນາສຸຂະສືກສາ, ສົ່ງເສີມການອອກກຳລັງກາຍ ເພື່ອສຸຂະພາບ, ຄວບຄຸມການລະບາດ ຂອງພະຍາດເຊັ່ນ: ວຽກງານແມ່ ແລະ ເດັກ, ການສັກຢາກັນພະຍາດ, ການແຜ່ລະບາດ ຂອງພະຍາດຕິດແປດ, ຈັດຫານ້ຳສະອາດ, ປະຕິບັດນະໂຍບາຍການປິ່ນປົວ ບໍ່ເສຍຄ່າໃຫ້ແມ່ຍິງ-ເດັກນ້ອຍ ແລະ ຜູ້ທຸກ ຍາກ-ດ້ອຍໂອກາດ; ວຽກງານປ້ອງກັນຊາດ-ປ້ອງກັນ ຄວາມສະຫງົບ ໄດ້ຮັບການຈັດຕັ້ງ ເຊື່ອມຊຶມຢ່າງທົ່ວເຖິງ ເປັນຕົ້ນແມ່ນ ແຜນຍຸດທະສາດ ໃນການ ກໍ່ສ້າງກຳລັງ ຕາມທິດສ້າງທ່າສະໜາມ 3 ຂັ້ນຄື: ການສ້າງບ້ານໃຫ້ເປັນ ບ້ານປ້ອມໝັ້ນ-ກຸ່ມບ້ານ ສູ້ຮົບລຽນຕິດ, ສ້າງເມືອງເປັນຫົວໜ່ວຍ ສູ້ຮົບເອກະລາດ ແລະ ສ້າງແຂວງໃຫ້ ມີຄວາມສາມາດ ປ້ອງກັນທິດໜຶ່ງຂອງປະເທດ ຕິດພັນກັບການພັດທະນາ ຊົນນະບົດຮອບດ້ານຕາມ 4 ເນື້ຶອໃນ 4 ຄາດໝາຍ, ບົນຈິດໃຈ 4 ບຸກທະລຸ ແລະ ຕິດພັນກັບການພັດທະນາ ເສດຖະກິດ-ສັງຄົມ; ວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຍົກລະດັບໃຫ້ເຂົ້າສູ່ລະບົບ ທັນສະໄໝເທື່ອລະກ້າວ, ສະໜອງຂໍ້ມູນຂ່າວສານ ໃຫ້ແກ່ປະຊາຊົນ ໄດ້ຢ່າງທົ່ວເຖິງ, ໄດ້ເອົາໃຈໃສ່ນຳພາ ອະນຸລັກຮັກສາ ແລະ ເສີມຂະຫຍາຍວັດທະນະທຳ ອັນດີງາມຂອງຊາດ ຂອງທ້ອງຖີ່ນ ແລະ ຂອງເຜົ່າ ໄວ້ໃຫ້ຍືນຍົງ. ໄດ້ເອົາໃຈໃສ່ຊີ້ນໍາ-ນໍາພາ ການສ້າງຄົນ, ສ້າງຄອບຄົວ ແລະ ສ້າງບ້ານວັດທະນະທຳ ຢ່າງເປັນລະບົບ ແລະ ຕໍ່ເນື່ອງ.

ກອງປະຊຸມ ຈະດໍາເນີນເປັນເວລາ 3 ວັນ ຈຶ່ງຈະສຳເລັດ ​ເຊິ່ງໃນນີ້ກອງປະຊຸມ ຈະ​ໄດ້ພອ້ມ​ກັນ​ໃຊ້​ສິດ ​ປະຊາທິປະ​ໄຕ​ ປ່​ອນບັດ​ຄັດ​ເລືອກ​ເອົາ​ ຄະນະ​ພັກຊຸດ​ໃໝ່ ​ແລະ ພ້ອມ​ກັນປະກອບ ຄວາມຄິດຄວາມເຫັນ ເຂົ້າໃສ່ບົດລາຍງານການເມືອງ ທັງສາມພາກ ແລະ ລາຍງານການຈັດຕັ້ງປະຕິບັດ ວຽກງານຂອງບັນດາເມືອງ, ພະແນກການ, ກົມກອງ; ຄອບຄົວຕົວແບບ ໃນການຜະລິດກະສິກຳ; ພ້ອມດຽວກັນ ກໍຈະໄດ້ຮ່ວມກັນວາງແຜນ ແກ້ໄຂ ບັນຫາຂໍ້ຄົງຄ້າງ; ປະກົດການຫຍໍ້ທໍ້ ໃນສັງຄົມ ແນໃສ່ເຮັດໃຫ້ແຂວງ ມີຄວາມສະຫງົບປອດໄພ, ເສດຖະກິດ ມີການຂະຫຍາຍຕົວ, ລາຍຮັບຂອງ ປະຊາຊົນເພີ່ມຂຶ້ນ ຊີວິດການເປັນຢູ່ ໄດ້ຮັບການພັດທະນາ ເພື່ອພ້ອມກັນຫລຸດພົ້ນອອກ ຈາກຄວາມທຸກຍາກ.

......................................................................................................................................................................................................................................................................................

ທີ່ມາ: www.kpl.gov.la