ກອງປະຊຸມໃຫຍ່ ຄັ້ງທີ VI ອົງຄະນະພັກນະຄອນຫຼວງວຽງຈັນ ໄຂຂຶ້ນຢ່າງເປັນທາງການ

 ກອງ​ປະຊຸມ​ໃຫຍ່ ຄັ້ງ​ທີ VI ອົງຄະ​ນະ​ພັກ​ນະຄອນຫຼວງ​ວຽງຈັນ (ນວ) ໄດ້​ໄຂ​ຂຶ້ນ​ຢ່າງ​ສະຫງ່າຜາ​ເຜີຍ​ ໃນ​ວັນ​ທີ 19 ສິງຫາ 2015 ຢູ່​ຫໍ​ປະຊຸມ​ແຫ່ງ​ຊາດ ໂດຍ​ເປັນປະທານ​ຂອງ​ສະຫາຍ ​ດຣ. ສິນ​ລະ​ວົງ ຄຸດ​ໄພທູນ ກຳມະການ​ສູນກາງ​ພັກ ເລຂາ​ຄະນະ​ພັກ ເຈົ້າ​ຄອງ ນວ ໃຫ້​ກຽດ​ເຂົ້າ​ຮ່ວມ​ຂອງສະຫາຍ ຈູມ​ມາລີ ໄຊ​ຍະ​ສອນ ເລຂາທິການ​ໃຫຍ່​ຄະນະ​ບໍລິຫານງານ​ສູນ​ກາງ​ພັກ ປະທານ​ປະເທດ ແຫ່ງ ​ສປປ ລາວ ພ້ອມ​ດ້ວຍ​ຮອງເລຂາ​ຄະນະ​ພັກ ຄະນະ​ປະຈຳ​ພັກ ຄະນະ​ພັກ​ຮາກ​ຖານ ຜູ້​ແທນ​ສົມບູນ 313 ສະຫາຍ ຍິງ 46 ສະຫາຍ ແລະ ແຂກ​ຖືກ​ເຊີນ.

  ກອງ​ປະຊຸມ​ໃຫຍ່ ຄັ້ງ​ທີ VI ອົງຄະ​ນະ​ພັກ ນວ ແມ່ນ​ມີ​ຄວາມ​ໝາຍ​ສຳຄັນ​ຫຼາຍ ເຊິ່ງ​ຈະ​ສຸມ​ໃສ່​ຕີ​ລາຄາ​ຜົນ​ການຈັດຕັ້ງ​ປະຕິ ບັດ​ ມະຕິ​ກອງ​ປະຊຸມ​ໃຫຍ່ ​ຄັ້ງ​ທີ V ອົງຄະ​ນະ​ພັກ ແລະ ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VII ຂອງ ນວ ພ້ອມ​ທັງ​ຖອດຖອນ​ບົດຮຽນ​ຈາກ​ພຶດຕິ​ກຳ​ຕົວ​ຈິງ ຄົ້ນຄວ້າ​ກຳນົດ​ທິດ​ທາງໜ້າທີ່​ລວມ ແລະ ຄາດໝາຍ​ໃຫຍ່​ໃນ​ການ​ພັດ ທະນາ ນວ ໃນ​ໄລຍະ​ກາງ​ທົດ​ສະ​ວັດ​ທີ 2 ແລະ ທີ 3 ຂອງ​ສະຕະວັດ​ທີ 21 ແລະ ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VIII (2016-2020) ຜູ້​ແທນ​ສົມບູນ​ຍັງ​ຈະ​ໄດ້​ປ່ອນ​ບັດ​ຄັດ​ເລືອກ​ເອົາ​ຄະນະ​ບໍລິຫານ​ງານ​ພັກ ນວ ສະໄໝ​ທີ VI ແລະ ຄັດ​ເລືອກ​ເອົາ​ຜູ້​ແທນ​ໄປ​ຮ່ວມ​ກອງ​ປະຊຸມ​ໃຫຍ່ ​ຄັ້ງ​ທີ X ຂອງ​ພັກ ພິເສດ​ຍັງ​ຈະ​ຮັບ​ຟັງ​ການ​ໂອ້​ລົມ​ຈາກ​ສະຫາຍ​ເລຂາທິການ ໃຫຍ່ ​ຄະນະ​ບໍລິຫານ​ງານ​ສູນ​ກາງພັກ ປະທານ​ປະເທດ ຕື່ມ​ອີກ.

 ສະຫາຍ ​ດຣ. ສິນ​ລະ​ວົງ ຄຸດ​ໄພທູນ ໄດ້​ຜ່ານ​ບົດ​ລາຍ​ງານ​ການເມືອງ​ຂອງ​ຄະນະ​ບໍລິຫານ​ງານພັກ ສະໄໝ​ທີ V ຂອງ​ອົງຄະ​ນະ ພັກ ນວ ເຊິ່ງ​ໄດ້​ຍົກ​ໃຫ້​ເຫັນ​ຜົນງານ​ພົ້ນ​ເດັ່ນ ເປັນຕົ້ນ 5 ປີ​ຜ່ານມາ​ ເສດຖະກິດ​ມີ​ການ​ຂະຫຍາຍຕົວຢ່າງ​ຕໍ່​ເນື່ອງ ລວມ​ຍອດ​ຜະລິດຕະ​ພັນ​ພາຍ​ໃນ ສົກ 2011-2015 ບັນລຸ 124.900 ກວ່າ​ຕື້​ກີບ ອັດຕາ​ການ​ເຕີບ​ໂຕ 12% ຕໍ່​ປີ ສະເລ່ຍ​ລາຍ​ໄດ້ສົກ​ປີ 2014-2015 ເທົ່າ​ກັບ 4.390 ໂດ​ລາ​ສະຫະລັດ ຫຼື ປະມານ 35,9 ລ້ານ​ກີບຕໍ່​ຄົນ ຕໍ່​ປີ ເພີ່ມ​ຂຶ້ນ​ເກືອບ 2 ເທົ່າ ທຽບໃສ່​ປີ 2010 ໂຄງ​ປະກອບ​ເສດຖະ​ກິດ​ປ່ຽນແປງ​ຕາມ​ກົນ​ໄກ​ຕະຫຼາດ ໃນ​ນີ້ ກະສິກຳ-ປ່າໄມ້​ເພີ່ມຂຶ້ນ 8% ກວມ 17% ອຸດ​ສາ​ຫະກຳ​ເພີ່ມ​ຂຶ້ນ 18% ກວມ 47% ແລະ ການ​ບໍລິການ​ເພີ່ມ​ຂຶ້ນ 12% ກວມ 36% ລະດົມ​ການລົງທຶນ​ໄດ້ 84.200 ກວ່າ​ຕື້​ກີບ ການ​ພັດທະນາ​ຕົວ​ເມືອງ ແລະ ຊານເມືອງ​ໄດ້​ມີ​ບາດກ້າວ​ດີ​ຂຶ້ນ ໃນ​ນີ້ ໄດ້​ບູລະນະ​ຄຸ້ມ​ເມືອງເກົ່າ ພັດທະນາ​ແຄມ​ຂອງ ​ປະຕິ​ສັງຂອນ​ວັດຖຸ ບູຮານ​ຈຳນວນ​ໜຶ່ງ ເອົາໃຈໃສ່​ໂຄງການ​ສ້າງ​ຕົວເມືອງ​ໜ້າ​ຢູ່ ສ້າງ​ສວນ ແລະ ຂະຫຍາຍ​ກິດຈະການ​ສາທາລະນະປະໂຫຍດ​ຫຼາຍ​ແຫ່ງ ເດັ່ນ​ກວ່າ​ໝູ່ແມ່ນ​ສວນ​ເຈົ້າ​ອະນຸວົ ສ້າງ​ເຂດພັດທະນາ ເຊັ່ນ: ເຂດ​ບຶງ​ທາດຫຼວງ ລ່ອງ​ແທ່ງ-ວຽງ​ຈັນ ເຂດ​ກີລາ​ຊີເກມ ໂນນ​ທອງ ໄຊ​ເຊດ​ຖາ ໜອງ​ທາ ໜອງ​ປີງ ແລະ ອື່ນໆ ໄດ້​ປະກອບສ່ວນ​ສຳຄັນ​ໃນ​ວຽກງານ​ປ້ອງ​ກັນ​ຊາດ-ປ້ອງ​ກັນ ຄວາມ​ສະຫງົບ ຕິດ​ພັນ​ກັບ​ການ​ກໍ່ສ້າງ​ຮາກ​ຖານ ສ້າງ​ເມືອງ​ເປັນຫົວໜ່ວຍ​ເຂັ້ມແຂງ​ຮອບດ້ານ ສ້າງ​ບ້ານ​ເປັນ​ຫົວໜ່ວຍ​ພັດ​ທະນາ ໃນ​ນີ້ ນວ ສາມາດ​ລຶບລ້າງຄອບຄົວ​ທຸກ​ຍາກ​ໄດ້ 99,99% ຂອງ​ຄອບຄົວ​ທັງ​ໝົດ ສ້າງ​ຄອບຄົວ ແລະ ບ້ານ​ພັດ ທະນາ​ໄດ້ແລ້ວ 140.252 ຄອບຄົວ 353 ບ້ານ​ສຳເລັດ​ການ​ເຮັດ​ທົດ​ລອງ 3 ສ້າງ​ຢູ່ 10 ບ້ານ ຂອງ​ເມືອງ​ຈັນທະ​ບູ​ລີ ສີ​ສັດຕະ​ນາກ ແລະ ເມືອງ​ສັງ​ທອງ ສ່ວນ​ເມືອງ​ອື່ນໆກໍ່​ໄດ້​ເອົາໃຈໃສ່​ຕໍ່​ວຽກ​ງານ​ຮາກຖານ ໂດຍ​ປະຕິບັດ 4 ເນື້ອ​ໃນ 4 ຄາດໝາຍ ອັນ​ໄດ້​ເຮັດ​ໃຫ້​ວຽກງານ​ປ້ອງ​ກັນ​ຊາດ-ປ້ອງ​ກັນຄວາມ​ສະຫງົບ​ຢູ່​ຂັ້ນ​ຮາກ​ ຖານ​ດີຂຶ້ນ ສາມາດ​ຮັບປະກັນ​ຄວາມສະຫງົບ​ປອດ​ໄພ​ໄດ້​ໂດຍ​ພື້ນຖານ ດ້ານ​ວັດທະນະທຳ-ສັງຄົມ ກໍ່​ໄດ້ຮັບ​ການ​ພັດທະນາ​ທຸກ​ຂະແໜງການ ແລະ ທຸກ​ພື້ນ​ທີ່ເປົ້າ​ໝາຍສະຫັດ​ສະ​ວັດ​ດ້ານ​ການ​ພັດ​ທະນາ (MDG) 1, 4, 5, 6, 7 ແມ່ນ​ບັນລຸ​ໄດ້​ແລ້ວ ສ່ວນ​ເປົ້າໝາຍ 2, 3 ແລະ 8 ກໍ່​ຫຍັບ​ເຂົ້າໃກ້​ຄາດໝາຍ.

  ຄຽງ​ຄູ່​ກັບ​ຜົນງານ​ທີ່​ຍາດມາ​ໄດ້ ກໍ່​ຍັງ​ມີ​ຂໍ້ຄົງຄ້າງ​ທີ່​ຈະຕ້ອງ​ໄດ້​ເອົາໃຈໃສ່​ແກ້​ໄຂ ເປັນຕົ້ນ ເສດຖະກິດ​ຂະ​​ຫຍາຍ​ຕົວ​ສູງ ແຕ່ ຄຸນະພາບ​ຖານ​ຂອງ​ການ​ເຕີບ​ໂຕບໍ່​ທັນ​ໜັກ​ແໜ້ນ ການ​ພັດທະນາຕົວ​ເມືອງ​ຍັງ​ຊັກ​ຊ້າ ການ​ຄຸ້ມຄອງ​ຕາມ​ແຜນຜັງ​ບໍ່​ທັນ​ເຂັ້ມ​ງວດ ການ​ແກ້​ໄຂ​ປາກົດການ​ຫຍໍ້ທໍ້​ບໍ່ທັນ​ໄດ້​ດີ ແລະ ອື່ນໆ ສຳລັບ​ຄາດໝາຍ​ການ​ພັດທະນາ ແຕ່​ປີ 2016-2020 ຕ້ອງ​ຮັບປະກັນ​ໃຫ້ ນວ ມີ​ສະຖຽນ​ລະ​ພາບ​ດ້ານ​ການເມືອງ ມີ​ຄວາມ​ສະຫງົບ​ປອດ​ໄພ ແລະ ເປັນ​ລະບຽບ​ຮຽບ​ຮ້ອຍ​ດ້ານສັງຄົມ​ຢ່າງ​ໜັກ​ແໜ້ນ ສູ້​ຊົນສ້າງ​ໜ່ວຍ​ພັກ​ແຂງ-ຮູ້​ນຳພາຮອບດ້ານ​ໃຫ້​ໄດ້ 80% ຂອງໜ່ວຍ​ພັກ​ທັງ​ໝົດ ສະມາຊິກ​ພັກແຂງ-ຮູ້​ນຳພາ​ຮອບດ້ານ 75% ຂອງ​ສະມາຊິກ​ທັງ​ໝົດ ສູ້​ຊົນ​ໃຫ້ລວມ​ຍອດ​ຜະລິດ​ຕະ​ພັນ​ພາຍ​ໃນເພີ່ມ​ຂຶ້ນ ສະເລ່ຍ 11% ຕໍ່​ປີ ໂຄງ ປະກອບ​ເສດຖະກິດ​ຫັນປ່ຽນຕາມ​ກົນ​ໄກ​ເສດຖະກິດ​ຕະຫຼາດ ແລະ ບັນລຸ​ຄາດໝາຍ ໃນ​ນີ້ ກະສິ​ກຳ ​ເພີ່ມ​ຂຶ້ນ 7% ກວມ 14% ອຸດສາຫະກຳ ເພີ່ມ​ຂຶ້ນ 16% ກວມ 49% ແລະ ການ​ບໍລິການ ເພີ່ມ​ຂຶ້ນ 11% ກວມ 37% ຂຸດຄົ້ນ​ແຫຼ່ງ​ທຶນ​ເຂົ້າ​ໃນ​ການ​ພັດ​ທະນາ​ໃຫ້​ໄດ້ 35-36% ຂອງ​ລວມຍອດ​ຜະລິດ​ຕະ​ພັນ​ພາຍ​ໃນ ຫຼື ປະມານ 83.600 ຕື້​ກີບ ຂຸດ​ຄົ້ນແຫຼ່ງ​ລາຍ​ຮັບ​ງົບປະມານ​ໃຫ້​ໄດ້ 28-30% ຂອງ​ລວມ​ຍອດ​ຜະລິດຕະ​ພັນ​ພາຍ​ໃນ ແກ້​ໄຂ​ໜີ້​ສິນ​ເກົ່າ (ກ່ອນ​ປີ 2015) ໃຫ້​ຫຼຸດ​ລົງ​ມາ​ລະດັບ 40% ແລະ ຢັບ​ຢັ້ງ​ການ​ສ້າງໜີ້​ໃໝ່ ແລະ ອື່ນໆ.

 ກອງ​ປະຊຸມ​ຍັງ​ໄດ້​ຮັບ​ຟັງການ​ຜ່ານ​ແຜນ​ພັດທະນາ​ເສດ​ຖະກິດ-ສັງຄົມ 5 ປີ ຄັ້ງ​ທີ VIII (2016-2020) ຈາກ​ສະຫາຍ ​ດຣ. ອະ ນຸ​ພາບ ຕຸ​ນາ​ລົມ ຄະນະປະຈຳ​ພັກ ຮອງ​ເຈົ້າ​ຄອງ ນວ ແລະ ການ​ປະກອບ​ຄຳ​ເຫັນ​ຈາກພາກສ່ວນ​ຕ່າງໆ​ຕື່ມ​ອີກ ເຊິ່ງ​ວາລະ​ກອງ​ປະຊຸມ​ຈະ​ດຳເນີນ​ແຕ່​ວັນທີ 19-21 ສິງຫາ 2015 ຈຶ່ງ​ສຳເລັດ.

ທີ່ມາ vientiane  mai