ກອງປະຊຸມໃຫຍ່ ຄັ້ງທີ I ອົງຄະນະພັກ ກະຊວງພາຍໃນ ໄຂຂຶ້ນຢ່າງເປັນທາງການ

​ກອງປະຊຸມໃຫຍ່ ຄັ້ງທີ I ອົງຄະນະພັກ ກະຊວງ​ພາຍ​ໃນ ໄດ້ໄຂຂຶ້ນຢ່າງເປັນທາງການ​​ ໃນວັນທີ 10 ກັນຍາ 2015 ນີ້ ຢູ່ຫໍ​ປະຊຸມ​ແຫ່ງ​ຊາດ ​ຫລັກ 6ນະຄອນຫລວງ​ວຽງ​ຈັນ, ​​ໂດຍ​ການ​ເປັນ​ປະທານ​ຂອງ ສະຫາຍ ຄໍ​າໝັ້ນ ສູນວິ​ເລີດ ກໍາມະການ​ສູນ​ກາງ​ພັກ, ​ເລຂາ​ຄະນະ​ພັກ, ລັດຖະມົນຕີ​ວ່າການ ​ກະຊວງ​ພາຍ​ໃນ, ເປັນ​ກຽດ​ເຂົ້າ​ຮ່ວມໂດຍ ສະຫາຍ ອາຊາ​ງ ລາວ​ລີ  ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ພ້ອມດ້ວຍຜູ້ແທນສົມບູນ 183ສະຫາຍ, ຍິງ 57 ສະຫາຍ, ພ້ອມບັນດາ​ສະມາຊິກ​ພັກ​ ອາວຸ​ໂສ​ບໍານານ ​ແລະ ​ແຂກ​ຖືກ​ເຊີນ​ຈໍານວນ​ໜຶ່ງ.
ກອງປະຊຸມ ຜູ້ແທນໄດ້ເປັນເຈົ້າການ ຄົ້ນຄວ້າພິຈາລະນາຄືນ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IX ຂອງພັກ ​ແລະ ການຈັດຕັ້ງ​ປະຕິບັດ​ວຽກ​ງານ​ ພັດທະນາ​ຂະ​ແໜງພາຍ​ໃນ 5 ປີ (2011-2015), ພ້ອມຈະ​ໄດ້ຮັບຮອງ​ເອົາເປົ້າ​ໝາຍສູ້ຊົນ ແລະ ໜ້າທີ່ວຽກງານໃນປີ 2016-2020.
ສະຫາຍ ຄໍາ​ໝັ້ນ ສູນ​ວິ​ເລີດ ​ໄດ້ຕາງ​ໜ້າ​ຄະນະ​ພັກ​ກະຊວງ​ ລາຍ​ງານ​ການ​ເມືອງຕໍ່​ກອງ​ປະຊຸມ​ໃຫຍ່​ ຄັ້ງ​ທີ I ອົງຄະ​ນະ​ພັກ ​ກະຊວງ​ພາຍ​ໃນ ​ວ່າ: 5 ປີ ຜ່ານ​ມາ ຄະນະພັກ​ກະຊວງ​ພາຍ​ໃນ​ ໄດ້​ເອົາ​ໃຈ​ໃສ່​ຊີ້​ນໍາ-ນໍາພາ ຈັດ​ຕັ້ງ​ຜັນ​ຂະຫຍາຍ​ມະຕິ, ​ຄໍາ​ສັ່ງຂອງ​ພັກ ​ໂດຍ​ສະ​ເພາະ ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ IX ຂອງ​ພັກ, ​ແຜນ​ພັດທະນາ ​ເສດຖະກິດ-ສັງຄົມ ​ແຫ່ງ​ຊາດ 5 ປີ​ ຄັ້ງ​ທີ VII ທີ່​ພົວພັນ​ເຖິງ​ຄວາມ​ຮັບຜິດຊອບ​ ຂອງ​ຂະ​ແໜງ​ພາຍ​ໃນ ​ໄດ້​ຫັນ​​ເປັນ​ແຜນ​ງານ, ​ແຜນການ ​ແລະ ​ໂຄງການ​ທີ່​ມີ​ຜົນ​ສໍາ​ເລັດ ​ໃນ​ແຕ່ລະ​ຂົງ​ເຂດ​ເປັນ​ຕົ້ນ ​​ຂົງ​ເຂດ​ການ​ປົກຄອງ-ບໍ​ລີ​ຫານ ວຽກ​ງານ​ປັບປຸງ​ກົງຈັກ​ການຈັດ​ຕັ້ງ ​​ໃຫ້​ກະທັດ​ຮັດ​ແທດ​ເໝາະ​ກັບ ​ແຕ່ລະ​ໜ້າ​ທີ່​ການຈັດ​ຕັ້ງ​ ໂດຍ​ການ​ສົມທົບ​ກັບ​ບັນດາ​ກະຊວງ-​ອົງການ ​ແລະ ທ້ອງ​ຖິ່ນ ທົບ​ທວນຄືນ ພາລະ​ບົດບາດໜ້າ​ທີ່ ​ແລະ ຂອບ​ເຂດ​ ​ແຕ່​ລະ​ອົງການ​ຈັດ​ຕັ້ງ​ຄືນ​ໃໝ່​ ໂດຍ​ສະ​ເພາະ ​ແມ່ນ​ການ​ແບ່ງ​ຂັ້ນ, ​ແບ່ງ​ຄວາມ​ຮັບ​ຜິດຊອບ ລະຫວ່າງ ສູນ​ກາງ ​ແລະ ທ້ອງ​ຖິ່ນ ​ແລະ ​ຢູ່​ແຕ່ລະ​ຂັ້ນ​ຂອງ​ອົງການ​ປົກຄອງ​ທ້ອງ​ຖິ່ນ ຕາມ​ທິດ​ 3 ​ສ້າງ, ​ໄດ້​ສືບ​ຕໍ່​ແນະ​ນໍາ​ບັນດາ​ ກະຊວງ-ອົງການ​ ທີ່​ໄດ້​ຮັບ​ການ​ຊັບຊ້ອນ ​ແລະ ສ້າງ​ຕັ້ງ​ຂຶ້ນ​ໃໝ່ 7 ກະຊວງ​ ເຮັດ​ໃຫ້​ກົງຈັກ​ການຈັດ​ຕັ້ງ​ ມີ​ສະຖຽນ​ລະ​ພາບ ​ແລະ ມີ​ຄວາມ​ສະຫງົບ, ວຽກ​ງານ​ບໍລິຫານ ​ແລະ ນິຕິ​ກໍາ ​ໄດ້​ທົບ​ທວນຄືນ ​ແລະ ປັບປຸງ​ບັນດາ​ນິຕິ​ກໍາ​ຕ່າງໆ​ ທີ່​ມີ​ແລ້ວ​ໃຫ້​ສອດຄ່ອງ​ ກັບ​ນະ​ໂຍບາຍ​ 3 ​ສ້າງ, ວຽກ​ງານ​ການ​ປົກຄອງ​ຄະນະ​ພັກ​ ໄດ້​ນໍາພາ​ປັບປຸງ​ການ​ບໍລິຫານ​ລັດ​ ຢູ່​ຂັ້ນ​ທ້ອງ​ຖິ່ນ, ຂັ້ນ​ແຂວງ, ​ເມືອງ ​ແລະ ຂັ້ນ​ຮາກ​ຖານ​ບ້ານ​ໃຫ້​ກາຍ​ເປັນ​ອົງການ​ບໍລິຫານ​ທ້ອງ​ຖິ່ນ ​ເພື່ອ​ບໍລິການ​ແກ່​ປະຊາຊົນ ​ເອົາ​ໃຈ​ໃສ່​ປັບປຸງ​ວຽກ​ງານ​ຄຸ້ມ​ຄອງ ​ອົງການ​ຈັດ​ຕັ້ງ​ທາງ​ສັງຄົມ ​ໃຫ້​ເຂົ້າ​ສູ່​ລະບຽບ​ການ ​ເຮັດ​ໃຫ້ການ​ຈັດ​ຕັ້ງ ​ແລະ ການ​ເຄື່ອນ​ໄຫວ ​ຂອງ​ອົງການ​ຈັດ​ຕັ້ງ​ທາງ​ສັງຄົມ ​ມີ​ດ້ານ​ຕັ້ງໜ້າ ​ແລະ ດີ​ຂຶ້ນ. ປັດຈຸບັນ​ ມີ​ສະມາຄົມ, ມູນ​ນິທິ​ໄດ້​ຮັບ​ອະນຸມັດ​ລົງທະບຽນ​ແລ້ວ​ ​ຢູ່​ຂັ້ນ​ກະຊວງ,ຂັ້ນ​ແຂວງ​ທັງ​ໝົດ ຈໍານວນ 149 ຫົວໜ່ວຍ, ​ໃນ​ນັ້ນ​ມີ​ມູນ​ນິທິ 10 ຫົວໜ່ວຍ, ວຽກ​ງານ​ຊົນ​ເຜົ່າ ​ແລະ ສາສະໜາ ​ເປັນ​ວຽກ​ໜຶ່ງ​ທີ່​ສໍາຄັນ ​ແລະ ຫລໍ່​ແຫລມ​ຂອງ​ ພັກ-ລັດຖະບານ ຄະນະ​ພັກ​ໄດ້​ເອົາ​ໃຈ​ໃສ່​ນໍາພາ​ ປັບປຸງ​ບັນດາ​ນິຕິ​ກໍາ ​ແລະ ລະບຽບ​ການ​ຕ່າງ​ໆ​ທີ່​ກ່ຽວ ຂ້ອງ​ກັບ​ຊົນ​ເຜົ່າ ​ແລະ ສາສະໜາ. ຂົງ​ເຂດ​ເຕັກນິກ​ການ​ປົກຄອງ ​ວຽກ​ງານ​ຄຸ້ມ​ຄອງ​ສໍາ​ເນົາ​ເອກະສານ ​ເພື່ອ​ປັບປຸງ​ລະບົບ​ປົກ​ປັກ​ຮັກສາ ​ບັນດາ​ເອກະສານ​ທີ່​ສໍາຄັນ​ ຂອງ​ພັກ​-ລັດ ​ທີ່​​ເປັນ​ຂໍ້​ມູນ​ທາງ​ດ້ານ​ການ​ເມືອງ, ປະຫວັດສາດ, ​ເສດຖະກິດ-ສັງຄົມ, ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ແລະ ອື່ນໆ. ກອງປະຊຸມ ຈະ​ດໍາ​ເນີນ​ໄປ​ເປັນ​ເວລາ 2 ວັນ ​ແລະ ຍັງຈະໄດ້ປ່ອນບັດເລືອກຕັ້ງ ຄະນະບໍລິຫານງານພັກ ກະຊວງຊຸດໃໝ່ ແລະ ເລືອກເອົາຜູ້ແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ X ຂອງພັກປະຊາຊົນ ປະຕິວັດລາວ.

.....................................................................................................................................................................................................................

ທີ່ມາ: www.kpl.gov.la