ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ສິ້ນສຸດລົງຢ່າງຈົບງາມ

        ກອງປະຊຸມ ສຸດຍອດອາຊຽນ ຄັ້ງທີ 28, 29 ແລະ ກອງປະຊຸມສຸດຍອດ ທີ່ກ່ຽວຂ້ອງ ໄດ້ອັດລົງ ດ້ວຍຜົນສຳເລັດ ຢ່າງຈົບງາມ ໃນຕອນແລງ ວັນທີ 8 ກັນຍາ 2016 ໂດຍການເປັນປະທານ ແລະ ເຈົ້າພາບຂອງ ສປປ ລາວ, ພາຍໃຕ້ຄຳຂວັນ ຫັນວິໄສທັດ ໃຫ້ເປັນຮູບປະທຳ ເພື່ອຄວາມເຂັ້ມແຂງ ຂອງປະຊາຄົມອາຊຽນ ພາຍຫລັງ ທີ່ໄດ້ດຳເນີນ ມາແຕ່ວັນທີ 6 ກັນຍາ ນີ້ ໂດຍມີບັນດາປະມຸກລັດ, ຫົວໜ້າລັດຖະບານ, ເລຂາທິການໃຫຍ່ອາຊຽນ ແລະ ຄະນະຜູ້ແທນ ຈາກປະເທດສະມາຊິກອາຊຽນ ເຂົ້າຮ່ວມຢ່າງພ້ອມພຽງ.

         ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໃນນາມປະທານອາຊຽນ ໄດ້ຖະແຫລງຂ່າວ ຕໍ່ສື່ມວນຊົນ ທັງພາຍໃນ ແລະ ຕ່າງປະເທດ ເຊິ່ງກ່ອນອື່ນ ໄດ້ສະແດງ ຄວາມພູມໃຈ ທີ່ໄດ້ຮັບກຽດ ເປັນເຈົ້າພາບຄັ້ງທີສອງ ເຊິ່ງເປັນປີທີ່ອາຊຽນ ພວມສຸມຄວາມ ພະຍາຍາມໃນການຈັດຕັ້ງ ຜັນຂະຫຍາຍວິໄສທັດ ປະຊາຄົມອາຊຽນ 2025 ໃຫ້ປະກົດຜົນເປັນຈິງ. ປີ 2016 ອາຊຽນ ໄດ້ຈັດກອງປະຊຸມ ສຸດຍອດຄັ້ງທີ 28 ແລະ 29 ຕໍ່ເນື່ອງກັນ ເຊິ່ງຜູ້ນຳອາຊຽນ ໄດ້ພົບປະກັບບັນດາ ຜູ້ນຳຈາກ ສະມັດຊາ ລັດຖະສະພາ ລະຫວ່າງ ຊາດອາຊຽນ, ຊາວໜຸ່ມອາຊຽນ ແລະ ທີ່ປຶກສາ ທຸລະກິດອາຊຽນ. ພ້ອມນັ້ນ, ຍັງໄດ້ເຂົ້າຮ່ວມ ກອງປະຊຸມສຸດຍອດ ກັບບັນດາຜູ້ນຳ ຂອງຄູ່ເຈລະຈາ ພາຍໃຕ້ຂອບຮ່ວມມື ອາຊຽນ+1, ອາຊຽນ+3 ແລະ ກອງປະຊຸມສຸດຍອດ ອາຊີຕາເວັນອອກ ລວມທັງ ກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ. ນອກນີ້ ບັນດາຜູ້ນຳອາຊຽນ ຍັງໄດ້ພົບປະສອງຝ່າຍ ຢ່າງຫລວງຫລາຍ.

         ໃນທຸກກອງປະຊຸມອາຊຽນ ໄດ້ມີການປຶກສາຫາລືກັນ ຢ່າງກວ້າງຂວາງ, ກົງໄປກົງມາ, ສ້າງສັນ ແລະ ມີໝາກຜົນ ໂດຍສະເພາະ ກອງປະຊຸມສຸດຍອດ ຄັ້ງທີ 28 ແລະ 29 ໄດ້ມີການປຶກສາຫາລື ກ່ຽວກັບການ ຈັດຕັ້ງປະຕິບັດ ວິໄສທັດປະຊາຄົມ ອາຊຽນ 2025 ແລະ ການເສີມຂະຫຍາຍ ການພົວພັນຮ່ວມມື ກັບພາຍນອກ ຂອງອາຊຽນ. ອາຊຽນ ໄດ້ຢໍ້າຄືນ ຄວາມໝາຍໝັ້ນສືບຕໍ່ ສ້າງປະຊາຄົມອາຊຽນ ໃຫ້ມີຄວາມເຂັ້ມແຂງ ແລະ ຈະເລີນກ້າວໜ້າ ດ້ວຍການຈັດຕັ້ງຜັນຂະຫຍາຍ ວິໄສທັດ ປະຊາຄົມອາຊຽນ 2025 ກໍຄືແຜນແມ່ບົດ 3 ເສົາຄໍ້າ ແລະ ໄດ້ຮັບຮອງເອົາແຜນງານ ຂໍ້ລິເລີ່ມ ເພື່ອການເຊື່ອມໂຍງອາຊຽນ ສະບັບທີ 3 ແລະ ແຜນແມ່ບົດ ການເຊື່ອມຈອດອາຊຽນ 2025. ຜູ້ນຳອາຊຽນ ໄດ້ລົງນາມຮັບຮອງ ຖະແຫລງການອາຊຽນ ວ່າດ້ວຍການ ເປັນໜຶ່ງດຽວ ໃນການຕອບໂຕ້ໄພພິບັດ; ອາຊຽນເປັນໜຶ່ງດຽວ ໃນການຕອບໂຕ້ ໄພພິບັດໃນພາກພື້ນ ແລະ ນອກພາກພື້ນ, ພ້ອມທັງຮັບຮອງ ເອົາເອກະສານອື່ນໆ ຈຳນວນໜຶ່ງ ເພື່ອຈັດຕັ້ງ ຜັນຂະຫຍາຍ 8 ບູລິມະສິດ ຂອງປະທານອາຊຽນ 2016 ກໍຄືວິໄສທັດ ປະຊາຄົມອາຊຽນ 2025.

          ອາຊຽນໄດ້ຢໍ້າຄືນ ຄວາມສຳຄັນ ໃນການສືບຕໍ່ ຮັດແໜ້ນການພົວພັນ ກັບພາຍນອກ ກໍຄືເສີມຂະຫຍາຍ ຄວາມເປັນແກນກາງ ຂອງອາຊຽນ ໃນໂຄງສ້າງພາກພື້ນ ທີ່ພວມຜັນແປ ໂດຍຜ່ານບັນດາກົນໄກ ທີ່ອາຊຽນເປັນຜູ້ລິເລີ່ມ ຄື: ອາຊຽນ+1, ອາຊຽນ+3, ກອງປະຊຸມ ລັດຖະມົນຕີ ປ້ອງກັນປະເທດ ອາຊຽນບວກ, ເວທີພາກພື້ນອາຊຽນ ແລະ ກອງປະຊຸມ ສຸດຍອດອາຊີ ຕາເວັນອອກ. ພ້ອມນີ້ ກອງປະຊຸມ ຍັງເຫັນດີສືບຕໍ່ ຄົ້ນຄວ້າວິທີການ ທີ່ເໝາະສົມ ເພື່ອຮ່ວມມືກັບ ບັນດາປະເທດທີ່ສົນໃຈ ສ້າງສາຍພົວພັນ ກັບອາຊຽນ ບົນພື້ນຖານຕ່າງຝ່າຍ ຕ່າງມີຜົນປະໂຫຍດ ແລະ ປະກອບສ່ວນ ເຂົ້າໃນການສ້າງ ປະຊາຄົມອາຊຽນ. ກອງປະຊຸມ ສຸດຍອດຄັ້ງນີ້ ໄດ້ຮັບເອົາປະເທດ ຊີເລ, ເອຢິບ ແລະ ມາຣົກ ເຂົ້າເປັນພາຄີ ສົນທິສັນຍາໄມຕີຈິດ ແລະ ການຮ່ວມມື ໃນອາຊີ ຕາເວັນອອກສ່ຽງໃຕ້.  

         ທ່ານນາຍົກລັດຖະມົນຕີ ຊີ້ໃຫ້ເຫັນຕື່ມວ່າ ສຳລັບກອງປະຊຸມ ສຸດຍອດກັບພາຍນອກ, ບັນດາຜູ້ນຳອາຊຽນ ໄດ້ມີການພົບປະ ຫາລືກັບ ປະເທດຄູ່ເຈລະຈາ ຄື: ສປ ຈີນ, ຢີ່ປຸ່ນ, ສ.ເກົາຫລີ, ອິນເດຍ, ສະຫະລັດ ອາເມລິກາ, ອົດສະຕຣາລີ ແລະ ອົງການ ສປຊ ເຊິ່ງເຫັນດີ ສືບຕໍ່ຮັດແໜ້ນການຮ່ວມມື ໃນທຸກຂົງເຂດ ໃຫ້ມີປະສິດທິພາບ ແລະ ປະສິດທິຜົນກວ່າເກົ່າ ເປັນຕົ້ນ: ການຄ້າ, ການລົງທຶນ, ການເຊື່ອມຈອດ, ການທ່ອງທ່ຽວ, ການໄປມາຫາສູ່ກັນ ແລະ ອື່ນໆ ບົນພື້ນຖານ ຕ່າງຝ່າຍຕ່າງມີ ຜົນປະໂຫຍດ.

          ໃນພິທີປິດ ກອງປະຊຸມສຸດ ຍອດອາຊຽນ ຄັ້ງທີ 28 ແລະ 29, ສປປ ລາວ ໄດ້ມອບໜ້າທີ່ປະທານອາຊຽນ ໃຫ້ແກ່ປະເທດ ຟີລິບປິນ ແຕ່ ສປປ ລາວ ຈະສືບຕໍ່ເປັນ ປະທານອາຊຽນ ຈົນຮອດ ວັນທີ 31 ທັນວາ 2016. ການເປັນປະທານອາຊຽນ ຂອງ ຟີລິບປິນ ຈະເລີ່ມແຕ່ ວັນທີ 1 ມັງກອນ 2017 ເຊິ່ງເປັນວັນ ຄົບຮອບ 50 ປີ ແຫ່ງການສ້າງຕັ້ງອາຊຽນ ແລະ ບັນດາປະເທດ ສະມາ ຊິກອາຊຽນ ຈະສະເຫລີມສະຫລອງ ປີທີ່ມີຄວາມໝາຍ ສຳຄັນນີ້ ລວມທັງສົ່ງເສີມ ການທ່ອງທ່ຽວ ອາຊຽນ ເປັນເປົ້າໝາຍ ການທ່ອງທ່ຽວໜຶ່ງດຽວ ພາຍໃຕ້ຄຳຂວັນ ຢ້ຽມຢາມອາຊຽນ ໃນໂອກາດ ສະເຫລີມສະຫລອງ ຄົບຮອບ 50 ປີ ຕາມທີ່ຜູ້ນຳອາຊຽນ ໄດ້ປະກາດ ໃນພິທີເປີດ ກອງປະຊຸມ ສຸດຍອດອາຊຽນ ຄັ້ງນີ້.

         ນອກຈາກຈະມີ ການສະເຫລີມສະຫລອງ ອາຊຽນ ຄົບຮອບ 50​ ປີ ຢ່າງມີຄວາມໝາຍແລ້ວ, ປະຊາຄົມ ອາຊຽນ ກໍຈະສືບຕໍ່ ມີຜົນສຳເລັດອັນໃໝ່ ປະກອບສ່ວນ ເຂົ້າໃນການ ຈັດຕັ້ງ ຜັນຂະຫຍາຍວິໄສທັດ ປະຊາຄົມອາຊຽນ 2025 ໃຫ້ເປັນຮູບປະທຳ. ສປປ ລາວ ຈະສືບຕໍ່ ໃຫ້ການສະໜັບສະໜູນ ການເປັນປະທານອາຊຽນ ຂອງຟີລິບປິນ ຢ່າງເຕັມປ່ຽມ ແລະ ຮ່ວມມືກັບ ບັນດາປະເທດ ສະມາຊິກ ອາຊຽນ, ຄູ່ເຈລະຈາ ອາຊຽນ ກໍຄື ບັນດາຄູ່ຮ່ວມມື ພາຍນອກ ແລະ ປະເທດເພື່ອນມິດ ແລະ ອົງການ ຈັດຕັ້ງພາກພື້ນ ແລະ ສາກົນຕ່າງໆ ເພື່ອປະກອບສ່ວນ ສ້າງຄວາມເຂັ້ມແຂງ ໃຫ້ປະຊາຄົມອາຊຽນ ແລະ ຮັດແໜ້ນ ການພົວພັນຮ່ວມມື ກັບພາຍນອກ ຕາມວິຖີທາງອາຊຽນ ກໍຄື ບັນດາຫລັກກການ ຂອງອາຊຽນ.

ແຫຼ່ງຂ່າວ: ສໍານັກຂ່າວສານປະເທດລາວ.