ກອງປະຊຸມພັດທະນາຊົນນະບົດແລະລຶບລ້າງຄວາມທຸກຍາກ ອາຊຽນ ຄັ້ງທີ 9

ຕອນເຊົ້າວັນທີ 17 ຕຸລາ 2015 ທີ່ ຫໍວັດທະນະທຳແຫ່ງຊາດ ນະຄອນຫຼວງວຽງຈັນ, ໄດ້ມີພິທີເປີດກອງປະຊຸມ ລັດຖະມົນຕີ ພັດທະນາຊົນນະບົດແລະລຶບລ້າງຄວາມທຸກຍາກອາຊຽນຄັ້ງທີ 9 ໂດຍໃຫ້ກຽດເຂົ້າຮ່ວມ ຂອງທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ, ທ່ານ ເລ ເລືອງ ມິງ ເລຂາທິການໃຫ່ຍອາຊຽນ, ທ່ານ ບຸນເຮືອງ ດວງພະຈັນ ລັດຖະມົນຕີປະຈຳຫ້ອງວ່າການລັດຖະບານ ພ້ອມດ້ວຍລັດຖະມົນຕີຜູ້ຮັບຜິດຊອບວຽກງານພັດທະນາຊົນນະບົດແລະລຶບລ້າງຄວາມທຸກຍາກ ປະເທດສະມາຊິກອາຊຽນ ອົງການຈັດຕັ້ງສັງຄົມກໍ່ໄດ້ເຂົ້າຮ່ວມ.
ທ່ານ ທອງສິງ ທໍາມະວົງ ນາຍົກລັດຖະມົນຕີ ສປປ ລາວ ກ່າວວ່າ: ຕະຫຼອດໄລຍະຜ່ານມາເຫັນວ່າ ການຮ່ວມມືດ້ານການພັດທະນາຊົນນະບົດ ແລະລຶບລ້າງຄວາມທຸກຍາກອາຊຽນກໍ່ໄດ້ຮັບຜົນສໍາເລັດອັນໜ້າເພິ່ງພໍໃຈແລະສິ່ງສຳຄັນແມ່ນການສົ່ງເສີມຄວາມເຂົ້າໃຈອັນດີ ແລະແລກປ່ຽນບົດຮຽນຊຶ່ງກັນແລະກັນ ເພື່ອຮັດແໜ້ນການຮ່ວມມືພາຍໃນອາຊຽນ ເລັ່ງໃສ່ສູ້ຊົນເຮັດໃຫ້ປະຊາຊົນໄດ້ດຳລົງຊີວິດຢູ່ໃນເງື່ອນໄຂທີ່ດີ ແລະມີຄວາມຜາສຸກ , ບັນດາປະເທດອາຊຽນກໍ່ກ້າວເຂົ້າສູ່ການເປັນປະຊາຄົມອາຊຽນປະກອບດ້ວຍສາມເສົາຄ້ຳຄື: ປະຊາຄົມການເມືອງ, ຄວາມໝັ້ນຄົງ , ປະຊາຄົມເສດຖະກິດອາຊຽນ ແລະປະຊາຄົມວັດທະນະທຳ-ສັງຄົມອາຊຽນ ໃນໂອກາດດຽວກັນ ສປປ ລາວ ກໍ່ຈະເປັນປະທານໝູນວຽນ ອາຊຽນໃນປີ 2016. 


ການພັດທະນາຊົນນະບົດແລະລຶບລ້າງຄວາມທຸກຍາກ ຈື່ງໄດ້ເນັ້ນໃສ່ຂົງເຂດການພັດທະນາພື້ນຖານໂຄ່ງລ່າງ , ສົ່ງເສີມການເຂົ້າເຖິງບໍລິການສາທາລະນະຢູ່ຊົນນະບົດ , ຄ້ຳປະກັນສະບຽງອາຫານ ແລະສົ່ງເສີມການຜະລິດເປັນສິນຄ້າ ຂະຫຍາຍການບໍລິການການສຶກສາ ແລະສາທາລະນະສຸກ , ແກ້ໄຂການເຄື່ອນຍ້າຍແບບຊະຊາຍຂອງພົນລະເມືອງຕິດພັນກັບການຈັດສັນພູມລຳເນົາແບບຖາວອນແລະການຫັນປ່ຽນແບບວິທີທຳມາຫາກິນໃຫ້ແກ່ປະຊາຊົນບັນດາເຜົ່າ. 
ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ແລະສູ້ຊົນພັດທະນາປະເທດໃຫ້ຫຼຸດພົ້ນອອກຈາກ ສະຖານະພາບຄວາມດ້ອຍພັດທະນາໃນປີ 2020 ແລະ ກ້າວໄປສູ່ ປະເທດທີ່ມີລາຍຮັບປານກາງສູງ ຕາມທິດການພັດທະນາແບບຍືນຍົງໃນປີ 2013 . ເພື່ອບັນລຸຄາດໝາຍສູ້ຊົນ ຈຶ່ງໄດ້ລະດົມທຸກທ່າແຮງບົ່ມຊ້ອນ ແລະສຶບຕໍ່ເພີ່ມທະວີການເຮັດວຽກຮ່ວມກັບພາກສ່ວນຕ່າງໆຂອງສັງຄົມ ເພື່ອສົມທົບໃສ່ການຮ່ວມມືຊ່ວຍເຫຼືອຈາກບັນດາປະເທດເພື່ອນມິດ ກໍຄືບັນດາປະເທດອາຊຽນ.

ທີ່ມາ CRI-FM93