ກອງປະຊຸມປຶກສາຫາລື ໂບອ່າວ ເພື່ອອາຊີ

ຂປລ. ວັນທີ 24 ມີນາ ນີ້ ທີ່ເມືອງໂບອ່າວ ແຂວງຮ່າຍນານ, ສປ ຈີນ ໄດ້ຈັດກອງປະຊຸມ ປຶກສາຫາລື ໂບອ່າວ ເພື່ອອາຊີ ພາຍໃຕ້ຫົວ ຂໍ້: “ອະນາຄົດໃໝ່ ຂອງອາຊີ‑ຄວາມຫລາກຫລາຍ ແລະ ວິໄສທັດໃໝ່”,ໂດຍໃຫ້ກຽດເປັນປະທານ ຂອງທ່ານ ຫລີ ເຄີ້ຊຽງ ນາຍົກລັດຖະມົນຕີ ສປ ຈີນ, ມີບັນດາຜູ້ນໍາ ຂອງທະວີບອາຊີ ລວມທັງໝົດ 11 ປະເທດ ແລະ ບັນດານັກທຸລະກິດ, ນັກລົງທຶນ, ນັກຄົ້ນຄວ້າ ທີ່ມີຊື່ສຽງ ໃນອາຊີ ແລະ ທະວີບອື່ນໆ ຈໍານວນທັງໝົດກວ່າ 2.000 ຄົນ. ຄະນະຜູ້ແທນລາວ ເຮົາແມ່ນນໍາໂດຍ ທ່ານ ທອງສິງ ທໍາມະວົງ ນາຍົກລັດຖະມົນຕີ ພ້ອມດ້ວຍຄະນະ ອີກ 12 ທ່ານ ເຂົ້າຮ່ວມກອງປະຊຸມ.
ກອງປະຊຸມ ປຶກສາຫາລືຄັ້ງນີ້ ແມ່ນເປັນເວທີໜຶ່ງ ທີ່ເບິ່ງໄປຂ້າງໜ້າ ໂດຍມີຈຸດປະສົງ ເພື່ອຂັບເຄື່ອນກົນໄກ ການຮ່ວມມືທີ່ມີປະສິດທິຜົນ ໃນພາກພື້ນອາຊີ ເຊິ່ງຈະນໍາຜົນປະໂຫຍດຕົວຈິງ ມາສູ່ປະຊາຊົນໃນປະເທດສະມາຊິກ ກໍຄື ປະເທດຕ່າງໆໃນອາຊີ, ເປັນຕົ້ນແມ່ນຂົງເຂດ ການເມືອງ- ຄວາມໝັ້ນຄົງ, ການຮ່ວມມື ທາງດ້ານເສດຖະກິດ, ການພັດທະນາແບບຍືນຍົງ ແລະ ການພົວພັນ ລະຫວ່າງ ປະຊາຊົນດ້ວຍກັນ. ກົນໄກການຮ່ວມມືດັ່ງກ່າວ ຈະເຮັດໃຫ້ພວກເຮົາສາມາດ ສ້າງຄວາມເຊື່ອໝັ້ນ, ຊ່ວຍເຫລືອເຊິ່ງກັນ ແລະ ກັນ ແລະ ເຫັນອົກເຫັນໃຈກັນຫລາຍຂຶ້ນ. ຄຽງຄູ່ກັນນັ້ນ, ກໍເພື່ອຕ້ອງການສ້າງຂົງເຂດອາຊີ ໃຫ້ມີສັນຕິພາບ, ມີປະຊາທິປະໄຕ ແລະ ມີຄວາມປອດໄພ ພາຍໃນພາກພື້ນນັ້ນເອງ.
ໃນໂອກາດດັ່ງກ່າວ, ທ່ານ ທອງສິງ ທໍາມະວົງ ນາຍົກລັດຖະມົນຕີ ກໍໄດ້ຊົມເຊີຍ ລັດຖະບານ ສປ ຈີນ ທີ່ໄດ້ຕົກລົງປ່ອຍນໍ້າ ຈາກເຄື່ອນຂອງຈີນ ເພື່ອຫລຸດຜ່ອນຜົນກະທົບ ຂອງໄພແຫ້ງແລ້ງ ຂອງປະເທດຢູ່ລຸ່ມແມ່ນໍ້າຂອງ. ພ້ອມດຽວກັນນີ້, ກໍໄດ້ເນັ້ນເຖິງ ການຕົກລົງປ່ອຍນໍ້າ 1.100 ແມັດກ້ອນ ຕໍ່ວິນາທີ ຈາກບັນດາເຂື່ອນຕ່າງໆ ຢູ່ຕາມສາຂາຂອງ ແມ່ນໍ້າຂອງໃນ ສປປ ລາວ ເພື່ອແນໃສ່ແກ້ໄຂບັນຫາ ໄພແຫ້ງແລ້ງ ທີ່ບັນດາປະເທດ ໃນອ່າວແມ່ ນໍ້າຂອງ ກໍາລັງປະເຊີນຢູ່ໃນປະຈຸບັນ.
ປີນີ້ໃນຖານະທີ່ ສປປ ລາວ ເປັນປະທານອາຊຽນ, ທ່ານ ນາຍົກລັດຖະມົນຕີ ໄດ້ແຈ້ງຕໍ່ທີ່ປະຊຸມວ່າ: ສປປ ລາວ ໄດ້ຖືບູລິມະສິດ ໃນການ ຮ່ວມມືກັບທຸກປະເທດ ສະມາຊິກອາຊຽນ ປະກອບສ່ວນເຂົ້າໃນ ການປັບປຸງປະຊາຄົມອາຊຽນ ໃຫ້ນັບມື້ນັບເຂັ້ມແຂງ ແລະ ຈະຮ່ວມມືກັບບັນດາ ປະເທດຄູ່ຮ່ວມຂອງອາຊຽນ ບົນພື້ນຖານ 8 ບູລິມະສິດ ທີ່ ສປປ ລາວ ເຮົາກໍານົດໄວ້.
ນອກນັ້ນ, ທ່ານ ນາຍົກລັດຖະມົນຕີ ຍັງໄດ້ຊີ້ແຈງຕື່ມວ່າ: ລັດຖະບານ ສປປ ລາວ ພວມມີຄວາມ ພະຍາຍາມເປີດກວ້າງ ແລະ ດຳເນີນການເຊື່ອມໂຍງ ແລະ ເຊື່ອມຈອດກັບບັນດາ ປະເທດເພື່ອນບ້ານຢ່າງຕັ້ງໜ້າ ໂດຍໄດ້ລົງທຶນປັບປຸງເສັ້ນທາງເຊື່ອມຕໍ່ ກັບປະເທດໃກ້ຄຽງ ເພື່ອຈະເຮັດໃຫ້ປະເທດ ສາມາດກາຍເປັນປະເທດ ທາງຜ່ານໃນການເຊື່ອມຕໍ່ກັບ ປະເທດຕ່າງໆ ເຊິ່ງຈະອຳນວຍຄວາມສະດວກ ໃຫ້ແກ່ການແລກປ່ຽນ, ການຈໍລະຈອນສິນຄ້າ, ການໂທລະຄົມມະນາຄົມ ກໍຄືການໄປມາຫາສູ່ກັນ ລະຫວ່າງປະຊາຊົນ ພາຍໃນຂົງເຂດ ໃຫ້ນັບມື້ນັບຫລາຍຂຶ້ນ.

ແຫຼ່ງຂ່າວ: Pathedlao Lao.