ກອງປະຊຸມນາດີ ຄັ້ງທີ 9 ຈັດຂຶ້ນຢ່າງເປັນທາງການ

ຂປລ. ກອງປະຊຸມເຄືອຂ່າຍ ສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນ ຄັ້ງທີ 9 (9th NADI) ຈັດຂຶ້ນຢ່າງເປັນທາງການ ລະຫວ່າງ ວັນທີ 24-25 ມີນາ ນີ້ ທີ່ນະຄອນຫລວງວຽງຈັນ, ໂດຍການເປັນປະທານ ຂອງທ່ານ ພັອ ສຸລິວັນ ແສງຈັນ ຮອງຫົວໜ້າກົມ ວິທະຍາສາດ-ປະຫວັດສາດ ການທະຫານ, ກະຊວງປ້ອງກັນປະເທດແຫ່ງ ສປປ ລາວ, ມີບັນດາຫົວໜ້າ ສະຖາບັນປ້ອງກັນຊາດ ແລະ ຄວາມໝັ້ນຄົງ ຈາກປະເທດສະມາຊິກອາຊຽນ, ພ້ອມດ້ວຍພາກສ່ວນ ທີ່ກ່ຽວຂ້ອງເຂົ້າຮ່ວມ.

ທ່ານ ພັອ ສຸລິວັນ ແສງຈັນ ກ່າວວ່າ: ກອງປະຊຸມຄັ້ງນີ້ ແມ່ນມີຄວາມໝາຍສໍາຄັນຫລາຍ ເຊິ່ງຈະໄດ້ປຶກສາຫາລື ເຖິງວິໄສທັດດ້ານການເມືອງ ແລະ ຄວາມໝັ້ນຄົງ ໃນພາກພື້ນກ່ຽວກັບທ່າອ່ຽງ ແລະ ສິ່ງທ້າທາຍ, ເພີ່ມທະວີການຮ່ວມມື ດ້ານວຽກງານປ້ອງກັນຊາດ ເພື່ອຮັບມືກັບ ໄພຂົ່ມຂູ່ ແລະ ສິ່ງທ້າ ທາຍທີ່ບໍ່ແມ່ນ ດ້ານການທະຫານ, ຮັກສາການຮ່ວມມື ດ້ານວຽກງານປ້ອງກັນຊາດ ເພື່ອຄວາມເຂັ້ມແຂງຂອງປະຊາຄົມເສດຖະກິດອາຊຽນ.

ກອງປະຊຸມດັ່ງກ່າວ, ຈັດຂຶ້ນຫລັງຈາກການສ້າງຕັ້ງ ປະຊາຄົມອາຊຽນ ແລະ ເປັນຄັ້ງທໍາອິດ ທີ່ມີການຈັດຕັ້ງປະຕິບັດ ແຜນງານອາຊຽນ ໃນປີ 2025 ຮ່ວມກັນ ໂດຍສະເພາະ ແຜນແມ່ບົດດ້ານການເມືອງ ແລະ ຄວາມໝັ້ນຄົງ ແລະ ແຜນແມ່ບົດ ຂອງປະຊາຄົມອາຊຽນ ໃນປີ 2025, ເຊິ່ງມັນສະແດງໃຫ້ເຫັນວ່າ ປະຊາຊົນ ແລະ ສະມາຊິກລັດອາຊຽນ ສາມາດດໍາລົງຊີວິດຢູ່ຮ່ວມກັນໄດ້ໂດຍສັນຕິ, ມີປະຊາທິປະໄຕ ແລະ ມີສະພາບແວດລ້ອມທີ່ດີ.

ທ່ານ ກ່າວຕື່ມວ່າ: ນັບແຕ່ການສ້າງຕັ້ງ ສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນ ກອງປະຊຸມ (ນາດີ) ກໍມີບົດບາດສໍາຄັນ ຕໍ່ການສ້າງຄວາມ ໄວ້ເນື້ອເຊື່ອໃຈ ແລະ ສ້າງຄວາມສະນິດແໜ້ນ ລະຫວ່າງ ສະຖາບັນຄັງປັນຍາ ແລະ ສະຖາບັນຄົ້ນຄວ້າ ກ່ຽວກັບການຮ່ວມມື ດ້ານວຽກງານປ້ອງກັນຊາດ ແລະ ຄວາມໝັ້ນຄົງ. ເພື່ອສະເໜີນະໂຍບາຍຕ່າງໆ ໄປຍັງກອງປະຊຸມ ລັດຖະມົນຕີປ້ອງກັນ ປະເທດອາຊຽນ (ADMM). ໃນນັ້ນ, ການເປັນປະທານອາຊຽນ ແລະ ການເປັນປະທານ ກອງປະຊຸມ ADMM ລ້ວນແຕ່ມີຈຸດປະສົງ ສົ່ງເສີມການຮ່ວມມື ລະຫວ່າງ ກອງທັບອາຊຽນດ້ວຍກັນ ແລະ ລະຫວ່າງ ອາຊຽນກັບປະເທດບວກ ເພື່ອເສີມຂະຫຍາຍສັນຕິພາບ ໃນພາກພື້ນ, ສະຖຽນລະພາບ ແລະ ການພັດທະນາ. ກອງປະຊຸມປີນີ້ ແມ່ນໄດ້ຈັດຂຶ້ນພາຍໃຕ້ຄໍາຂັວນ “ວິໄສທັດການຮ່ວມມື ທາງດ້ານວຽກງານປ້ອງກັນຊາດ ແລະ ຄວາມໝັ້ນຄົງອາຊຽນ ຫລັງຈາກການສ້າງຕັ້ງ ປະຊາຄົມເສດຖະກິດອາຊຽນ”.

ແຫຼ່ງຂ່າວ: Pathedlao Lao.